އިސްރާއީލުން ފަލަސްތިނުގެ ގާޒާއަށް ދިން އުދުވާނީ ހަމަލާއެއްގައި ފަލަސްތީނުގެ ހަގުރާމަވެރި ޖަމާއަތެއް ކަމުގައިވާ އިސްލާމިކް ޖިހާދުގެ އިސް ހަގުރާމަވެރިއަކު ޝަހީދުވެ، ހަމަލާ ބަދަލު ކުރުން ކޮންޓްރޯލުން ނެއްޓިގެން ހިގައިދާނެކަމުގެ ބިރުވިކަން އުފެދުމާއެކު، މަސްރަހު ހޫނު ނުކުރުމަށް އެމެރިކާއިން ދެފަރާތަށްވެސް ގޮވާލައިފިއެވެ.
"އަރަމެން މިދަނީ އިސްރާއީލާއި ފަލަސްތީން އަދި ސަރަހައްދީ ގައުމުތަކާއެކީ މަސްރަހު ކޮންޓްރޯލުން ނެއްޓިގެން ދިޔަ ނުދިނުމަށް މަސައްކަތް ކުރަމުން. އަދި ހުރިހާ ފަރާތަކަށްވެސް އަހަރެމެން މި ގޮވާލަނީ އިތުރަށް ހަމަނުޖެހުން ނު އުފެއްދުމަށް،" އެމެރިކާގެ ނޭޝަނަލް ސެކިއުރިޓީ ކައުންސިލްގެ ތަރުޖަމާން ޖޯން ކިރުބީ ވިދާޅުވެފައި ވެއެވެ.
ރިޕޯޓަރުންނާއި ވާހަކަ ދައްކަވަމުން ކިރުބީ ވިދާޅުވެފައިވަނީ، އެމެރިކާއިން ވަނީ އިސްރާއީލާއެކީ ކަމަށާއި، އަދި އިސްރާއީލުގެ ސަލާމަަތަށް އެމެރިކާއިން "ނުގުޑާފަދަ" ޔަގީންކަން ދީފައިވާ ކަމުގައެވެ. "އަހަރެމެން ޔަގީނުންވެސް، ޓެރަރިސްޓް ޖަމާއަތްތަކުން އިސްރާއިލު ރައްކާތެރި ކޮށްދިނުމަށް، އަދި ކުށެއްނެތް އިސްރާއީލުގެ ރައްޔިތުން މަރުވަމުން ދިއުން ހުއްޓުވުމަށް އެގައުމަށް އެހީތެރި ވެދޭނަން،" އޭނާ ވިދާޅުވެފައި ވެއެވެ.
މިހަފްތާގެ ހުކުރުދުވަހު އިސްރާއީލުން ގާޒާއަށް ދީފައިވާ އުދުވާނި ހަމަލާތަކުގައި ފަލަސްތީނުގެ އިސްލާމިކް ޖިހާދުގެ އިސް ކޮމާންޑަރެއް ކަމުގައިވާ ތައިސީރު އަލް ޖަބަރި ވަނީ ޝަހީދުވެފައެވެ.
އިސްރާއީލުގެ އުދުވާނީ ހަމަލާތަކުގެ ރައްދުގައި ހަމާސްއިން ވެރިކަން ކުރަމުންދާ ގާޒާގައި ހަރަކާތްތެރި ވަމުންދާ އިސްލާމިކ ޖިހާދުން ބުނެފައިވަނީ ހުކުރުދުވަހު އެ ޖަމާއަތުން އިސްރާއީލަށް 100 އަށްވުރެ ގިނަ ރޮކެޓުން ހަމަލާ ދީފައިވާ ކަމުގައެވެ. އެޖަމާއަތުން ބުނެފައިވާގޮތުގައި ހަމަލާތައް އަމާޒު ކޮށްފައިވާ އިސްރާއީލުގެ ސިޓީތަކުގެ ތެރޭގައި ވެރިރަށް ތެލްއަވީވްވެސް ހިމެނޭ ކަމުގައެވެ. އިސްރާއިލުގެ އެމްބިއުލާންސް ސާވިސްއިން ބުނެފައިވަނީ މިހަމަލާތަކުން އެއްވެސް މީހަލަށް އަނިޔާއެއް ލިބިފައި ނުވާކަމުގައެވެ.
ގާޒާގެ ސިއްޙީ އިދާރާތަކުން ބުނެފައިވަނީ، އިސްރާއީލުން އެ ސިޓީއަށް ދީފައުވާ މިސައިލް ހަމަލާތަކުގައި 10 މީހަކު ޝަހީދުވެފައިވާއިރު އޭގެ ތެރޭގައި 5 އަހަރުގެ ކުޑަ ކުއްޖަކުވެސް ހިމެނޭ ކަމުގައެވެ. އަދި އިތުރު 55 މީހަކު ޒަޚަމްވެފައި ވާކަމަށް ބުނެފައި ވެއެވެ.
އިސްރާއީލުން ގާޒާއަށް ހަމަލާ ދީފައި މިވަނީ، ފަލަސްތީނުގެ ހަގުރާމަވެރި ކޮމާންޑަރަކު އިސްރާއީލުން ފާއިުވެދިޔަ ހަފްތާގައި ހައްޔަރު ކުރުމާއި ގުޅިގެން މަސްރަހު ވަރަށް ބޮޑަށް ހޫނުވެފައިވާ ދަނޑިވަޅެއްގައެވެ.
އިސްރާއީލުގެ ކޮމާންޑަރަކު ބުނެފައިވާ ގޮތުގައި އެގައުމުން ގާޒާއަށް ދިން ހަމަލާތަކުގައި އިސްލާމިކް ޖިހާދުގެ ކޮމާންޑަރު ތައިސީރު އަލް ޖަބާރީ މަރާލާފައިވާ ކަމަށާއި އަދި އޭގެ އިތުރުން "15 ޓެރަރިސްޓުން" މަރާލެވިފައިވާ ކަމުގައެވެ. އަދި ބުނެފައިވަނީ، އެގައުމުގެ އަސްކަރިއްޔާއިން އަދިވެސް އިތުރު ހަގުރާމަވެރިން "މަރާނެ" ކަމުގައެވެ.
އިސްލާމިކް ޖިހާދު ޖަމާއަތާއި ހަމާސް ޖަމާއަތާއި ދެމެދު ގުޅުންތައް ދެމެހެއްޓުމުގެ އެންމެ އިސް ދައުރެއް އަދާކުރާކަމަށް އިސްރާއިލުން ތުހުމަތުކުރާ އަލް ޖަބާރީ ޝަހީދުވެފައިވާކަން އިސްލާމި ޖިހާދުންވެސް ވަނީ ޔަގީން ކޮށްދީފައެވެ.
އިސްރާއީލުން ގާޒާގައި ހުންނަ އިސްލާމިކް ޖިހާދުގެ އަމާޒުތަކަށް ހަމާލާ ދީފައި މިވަނީ، ފާއިތުވެދިޔަ ހަފްތާގައި، ހިފާފައިވާ ހުޅަގު އައްސޭރީގެ ޖެނީންގައި އިސްރާއީލުން ހިންގު ރެއިޑެއްގައި އިސްލާމިކް ޖިހާދުގެ އިސް ފަރާތެއް ކަމުގައިވާ ބައްސާމް އަލް ސާދީ ހައްޔަރު ކޮށްފައިވަނިކޮށެވެ.
އޮިސްލާމިކް ޖިހާދުންވަނީ އިސްރާއީލުގެ އުދުވާންގެ ބަދަލު ވަރަށް ވަރުގަދައަށް ހިފާނޭކަމުގެ އިންޒާރު ދީފައެވެ. އަދި ހަމާސްއިން ބުނެފައިވަނި ހުރިހާ ހަގުރާމަވެރިންނަކީވެސް އެއްބަޑު އެއަބަފާ ބައެއް ކަމަށާއި، ހަގުރާމަވެރިންގެ ލޭގެ ބަދަލު ހުރިހާ ޖަމާއަތަކުންވެސް ހިފާނީ އެކަތިގަޑެއްގެ ގޮތުގައި ކަމަށެވެ.
