އިސްރާއީލްގެ އުދުވާންއާއި ދެކޮޅަށް ގާޒާއިން އިސްރާއީލަށް ވަރުގަދަ ރޮކެޓް ހަމަލާތަކެއް ދީފި

އިސްރާއީލުން ފަލަސްތީނުގެ ގާޒާއަށް އަމަޒުކޮށް ދިން ހަމަލާތަކާއި ގުޅިގެން ގާޒާގައި ހަރަކާތަތެރި ވާ އިސްލާމިކް ޖިހާދުން އިސްރާއީލަށް އަމާޒުކޮށް 100 އަށްވުރެ ގިނަ ރޮކެޓް ހަމަލާ ފޮނުވާލައިފިއެވެ.

އިސްރާއީލުން ގާޒާއަށް ދިން އުދުވާނީ ހަމަލާގައި ފަލަސްތީނުގެ 10 މީހުން މަރުވުމާއި ގުޅިގެން އިސްލާމިކް ޖިހާދުން އިސްރާއީލަށް ރޮކެޓް ހަމަލާތައް ފޮނުވަން ފެށުމާއެކު، ދެކުނު އިސްރާއީލުވަނީ ރޮކެޓް ސައިރެންގެ އަޑުން ގުގުމާލާފައެވެ.

އިސްރާއީލުން ގާޒާއަށް ދިން ހަމަލާތަކުގައި އިސްލާމިކް ޖިހާދު ހަރަކާތުގެ އިސް ކޮމާންޑަރަކުވެސް ވަނީ ޝަހީދުވެފައެވެ.

އިސްރާއީލުގައި ރޭގަޑަށް އިރު އޮއްސިގެން ދިއުމާއެކު ރޮކެޓް ހަމަލާތައް އަންނަމުންދާކަން އެންގުމުގެ ގޮތުން ދެކުނާއި އަދި މެދުތެރޭ އިސްރާއީލުގައި ސައިރެންގެ އަޑުތައް ގަދަ ކޮށްފައިވާއިރު، އިސްރާއީލުގެ ލޯކަލް ޓީވީތަކުންވަނީ، އިސްލާމި ޖިހާދުން އެގައުމަށް އުދުއްސާލި ބައެއް މިސައިންތައް އިސްރާއީލުގެ އެއަރ ޑިފެންސް ސިސްޓަމުން ވައްޓާލި މަންޒަރުތައް ދައްކާފައެވެ.

ހަމާސްއިން ވެރިކަން ކުރަމުންދާ ގާޒާގައި ހަރަކާތްތެރި ވަމުންދާ އިސްލާމިކް ޖިހާދުން ބުނެފައިވަނީ ހުކުރުދުވަހު އެ ޖަމާއަތުން އިސްރާއީލަށް 100 އަށްވުރެ ގިނަ ރޮކެޓުން ހަމަލާ ދީފައިވާ ކަމުގައެވެ. އެޖަމާއަތުން ބުނެފައިވާގޮތުގައި ހަމަލާތައް އަމާޒު ކޮށްފައިވާ އިސްރާއީލުގެ ސިޓީތަކުގެ ތެރޭގައި ވެރިރަށް ތެލްއަވީވްވެސް ހިމެނޭ ކަމުގައެވެ. އިސްރާއިލުގެ އެމްބިއުލާންސް ސާވިސްއިން ބުނެފައިވަނީ މިހަމަލާތަކުން އެއްވެސް މީހަލަށް އަނިޔާއެއް ލިބިފައި ނުވާކަމުގައެވެ.

ގާޒާގެ ސިއްޙީ އިދާރާތަކުން ބުނެފައިވަނީ، އިސްރާއީލުން އެ ސިޓީއަށް ދީފައިވާ މިސައިލް ހަމަލާތަކުގައި 10 މީހަކު ޝަހީދުވެފައިވާއިރު އޭގެ ތެރޭގައި 5 އަހަރުގެ ކުޑަ ކުއްޖަކުވެސް ހިމެނޭ ކަމުގައެވެ. އަދި އިތުރު 55 މީހަކު ޒަޚަމްވެފައި ވާކަމަށް ބުނެފައި ވެއެވެ.

އިސްރާއީލުން ގާޒާއަށް ހަމަލާ ދީފައި މިވަނީ، ފަލަސްތީނުގެ ހަގުރާމަވެރި ކޮމާންޑަރަކު އިސްރާއީލުން ފާއިުވެދިޔަ ހަފްތާގައި ހައްޔަރު ކުރުމާއި ގުޅިގެން މަސްރަހު ވަރަށް ބޮޑަށް ހޫނުވެފައިވާ ދަނޑިވަޅެއްގައެވެ.

އިސްރާއީލުގެ ކޮމާންޑަރަކު ބުނެފައިވާ ގޮތުގައި އެގައުމުން ގާޒާއަށް ދިން ހަމަލާތަކުގައި އިސްލާމިކް ޖިހާދުގެ ކޮމާންޑަރު ތައިސީރު އަލް ޖަބާރީ މަރާލާފައިވާ ކަމަށާއި އަދި އޭގެ އިތުރުން "15 ޓެރަރިސްޓުން" މަރާލެވިފައިވާ ކަމުގައެވެ. އަދި ބުނެފައިވަނީ، އެގައުމުގެ އަސްކަރިއްޔާއިން އަދިވެސް އިތުރު ހަގުރާމަވެރިން "މަރާނެ" ކަމުގައެވެ.

އިސްލާމިކް ޖިހާދު ޖަމާއަތާއި ހަމާސް ޖަމާއަތާއި ދެމެދު ގުޅުންތައް ދެމެހެއްޓުމުގެ އެންމެ އިސް ދައުރެއް އަދާކުރާކަމަށް އިސްރާއިލުން ތުހުމަތުކުރާ އަލް ޖަބާރީ ޝަހީދުވެފައިވާކަން އިސްލާމި ޖިހާދުންވެސް ވަނީ ޔަގީން ކޮށްދީފައެވެ.

އިސްރާއީލުން ގާޒާގައި ހުންނަ އިސްލާމިކް ޖިހާދުގެ އަމާޒުތަކަށް ހަމާލާ ދީފައި މިވަނީ، ފާއިތުވެދިޔަ ހަފްތާގައި، ހިފާފައިވާ ހުޅަގު އައްސޭރީގެ ޖެނީންގައި އިސްރާއީލުން ހިންގު ރެއިޑެއްގައި އިސްލާމިކް ޖިހާދުގެ އިސް ފަރާތެއް ކަމުގައިވާ ބައްސާމް އަލް ސާދީ ހައްޔަރު ކޮށްފައިވަނިކޮށެވެ.

އިސްލާމިކް ޖިހާދުންވަނީ އިސްރާއީލުގެ އުދުވާންގެ ބަދަލު ވަރަށް ވަރުގަދައަށް ހިފާނޭކަމުގެ އިންޒާރު ދީފައެވެ. އަދި ހަމާސްއިން ބުނެފައިވަނި ހުރިހާ ހަގުރާމަވެރިންނަކީވެސް އެއްބަޑު އެއަބަފާ ބައެއް ކަމަށާއި، ހަގުރާމަވެރިންގެ ލޭގެ ބަދަލު ހުރިހާ ޖަމާއަތަކުންވެސް ހިފާނީ އެކަތިގަޑެއްގެ ގޮތުގައި ކަމަށެވެ.