މިހާރު ހޫނުވެފައިވާ ޗައިނާ-ޓައިވާން މައްސަލާގައި ރާއްޖޭއިން އަދިވެސް އޮތީ "އެއް ޗައިނާ ސިޔާސަތަށް" ތާއީދު ކޮށްގެންކަން ފޮރިންގ މިނިސްޓްރީން ޔަގީން ކޮށްދީފައި ވާކަމަށް ރާއްޖޭގައި ހުންނަ ޗައިނާ އެމްބަސީން ބުނެފިއެވެ.

އެމެރިކާގެ ގާނޫނުހަދާ މަޖިލިހުގެ ރައީސާ ނާންސީ ޕެލޯސީ ޓައިވާނަށް ކުރެއްވި ދަތުރުފުޅާއި ގުޅިގެން ޓައިވާން ކަނޑުގައި ޗައިނާއިން މިހާރު ފަށާފައިވާ ވަރުގަދަ އަސްކަރީ އޮޕަރޭޝަނާއެކު މުޅި ސަރަހައްދުގައި ނުތަނަވަސްކަން އުފެދިފައިވަނިކޮށް ޗައިނާ އެމްބަސީން ކުރި ޓުވީޓެއްގައި ވިދާޅުވެފައިވަނީ، އެމެރިކާގެ ގާނޫނުހަދާ މަޖިލިހުގެ ރައީސާ ޓައިވާނަށް ކުރެއްވި ދަތުރުފުޅާއި ގުޅޭގޮތުން ދިވެހިރާއްޖެއިން ދެކޭގޮތް، މިމަހުގެ 4 ވަނަ ދުވަހު، ފޮރިންގ މިނިސްޓްރީގެ ތަރުޖަމާން ޗައިނާ އެމްބަސީއަށް ސާފު ކޮށްދީފައި ވާކަމުގައެވެ.

On August 4th, the Spokesperson of the Maldivian Ministry of Foreign Affairs expressed the Maldivian Government’s position on Speaker of the U.S. House of Representatives Nancy Pelosi’s visit to China’s Taiwan region in response to inquiry as followings: pic.twitter.com/tT45nmkadj

— Embassy of China in Maldives (@ChinaEmbassy_MV) August 5, 2022

ޗައިނާ އެމްބަސީން ކުރި ޓުވީޓުގައި ވިދާޅުވެފައިވަނީ، ރާއްޖެއިން ޗައިނާއެކީ ގާއިމްކޮށްފައިވާ ސިޔާސީ ގުޅުމުގެ ބިންގާ އެޅިގެން ގޮސްފައިވަނީ "އެއް ޗައިނާ" ސިޔާސަތުގެ (ޓައިވާނަކީ ޗައިނާގެ ބައެއްކަމަށް ގަބޫލުކުމުގެ) މައްޗަށްކަމަށާއި، އަދި ބައިނަލް އަގުވާމީ މަސްރަހުގައިވެސް މިސިޔާސަތު ދެމެހެއްޓުމުގެ މަތީ ރާއްޖެއިން ދެމިއޮންނާނޭކަމުގެ ޔަގީންކަން ދިވެހިރާއްޖެއިން ދީފައި ވާކަމުގައެވެ.

މިޓުވީޓުގައި އިތުރަށް ވިދާޅުވެފައިވަނީ، ދިވެހިރާއްޖެއާއި ޗައިނާއާ ދެމެދު އަބަދުވެސް އޮތީ ވަރަށް ގާތް ގުޅުމެއް ކަމަށާއި ދެފަރާތުގެ މަސްލަހަތު ހިމެނޭ ކަންކަމުގައި އެއްފަރާތުން އަނެއް ފަރާތަށް އިހުތިރާމް ކުރުވަނިވި ގުޅުމެއް ކަމުގައެވެ.

އެމެރިކާގެ ގާނޫނުހަދާ މަޖިލިހުގެ ރައީސާ ނާންސީ ޕެލޯސީ ޓައިވާނަށް ކުރެއްވި ރަސްމީ ދަތުރުފުޅާއި ދެކޮޅު ހެދުމުގެ ގޮތުން، ޓައިވާންގެ ވަށައިގެންވާ ކަނޑުގެ ސަރަހައްދުގައި އަސްކަރީ ވަރުގަދަ ތަމްރީންތަކެއް އިއްޔެ ޗައިނާއިން ވަނީ ފަށާފައެވެ. އަސްލު ހަތިޔާރު ބޭނުންކޮށްގެން ކުރިަޔށް ގެންދާ މި ތަމްރީންތަކުގައި ޗައިނާއިންވަނީ ޓައިވާންގެ ވަށައިގެންވާ ކަނޑުގެ ސަރަހައްދުތަކަށް ވެއްޓޭގޮތަށް ބެލެސްޓިކް މިސައިލްތައްވެސް އުދުއްސާލާފައެވެ.

ޗައިނާގެ ދައުލަތުގެ މީޑިއާއިން ހާމަ ކޮށްފައިވާ ގޮތުގައި، ޓައިވާންގެ ވަށައިގެންވާ ހަ ސަރަހައްދެއްގައި އަސްލު ހަތިޔާރުގެ ބޭނުން ކޮށްގެން ޗައިނާއިން ވަރުގަދަ އަސްކަރީ ހަރަކާތްތަކެއް ފަށާފައިވާ ކަމުގައެވެ. އަދި މި ތަމްރީންތައް އަންނަ އާދީއްތަ ދުވަހާއި ހަމައަށް ކުރިޔަށް ދާނޭކަމަށްވެސް ޗައިނާގެ މީޑިއާތަކުން ރިޕޯޓު ކޮށްފައި ވެއެވެ.

ޕެލޯސީ މިދަތުރުފުޅު ކުރައްވައިފިނަމަ، ބަދަލުގައި ޗައިނާއިން ވަރަށް ވަރުގަދަ ރައްދެއް ދޭނެކަމުގައި ކުރިން އެގައުމުން ބުނެފައި ވެއެވެ. ޗައިނާއިން ބުނެފައިވަނީ މިފަދަ ދަތުރުފުޅެއް ޗައިނާއިން ދެކޭނީ ޗައިނާ ޓައިވާންގެ މައްސަލަ ގަސްތުގައި ގޯސްކުރުމުގެ މަގުސަދުގައި ކުރައްވާ ދަތުރުފުޅަކަށް ކަމުގައެވެ.

މިނިވަންކަން އިއުލާން ކޮށްފައި ނުވިނަމަވެސް ޓައިވާންއަކީ އަމިއްލަ ވެރިކަމެއް ކުރަމުން އަންނަ، ޗައިނާއިން އެގައުމުގެ ބައެއްގެ ގޮތުގައި ދައުވާ ކުރަމުންދާ ގައުމެކެވެ. އަދި އެމެރިކާއިން ދަނީ ނުރަސްމީ ސިފައެއްގައި އަބަދުވެސް ޓައިވާނަށް އަސްކަރީ އެހީތެރިކަން ފޯރުކޮށްދެމުންނެވެ.

ޗައިނާއިން އަބަދުވެސް ބުނަމުން އަންނަނީ ޓައިވާންއިން އެގައުމުގެ މިނިވަންކަން އިއުލާން ކޮށްފިނަމަ އަސްކަރީ ބާރުގެ ބޭނުން ބޭނުންކޮށްގެން ޓައިވާން ހިފާނެކަމުގައެވެ.