ޓީވީ އިންޑަސްޓްރީގެ އިތުރުން ބޮލީވުޑްގައި ވެސް މަސައްކަތް ކޮށްފައިވާ އެކްޓަރު މިތިލޭޝް ޗަތުރުވޭދީ މަރުވެއްޖެއެވެ. މި ތިލޭޝް މަރުވި ލަކްނޯވގެ ހޮސްޕިޓަލެއްގައި ހިތުގެ މައްސަލައަށް ފަރުވާ ހޯދާމުން ދަނިކޮށެވެ. މަރުވި އިރު އޭނާގެ އުމުރަކީ 67 އަހަރެވެ.
މިތިލޭޝް ހޮސްޕިޓަލުގައި އޮންނަތާ ތިން ދުވަސް ވެއްޖެއެވެ. މަރުވީ ހާޓްއެޓޭކެއް ޖެހިގެންނެވެ. މިކަން މިތިލޭޝްގެ ދަރިފުޅު ވަނީ ފޭސްބުކް ގައި ހާމަކޮށްފައެވެ. މި ޚަބަރު ދެމުން އޭނާ ބުނެފައިވަނީ އެއީ ދުނިޔޭގެ އެންމެ "ބެސްޓް" ބައްޕަ ކަމަށެވެ. އަދި ބައްޕައަށް ހެޔޮ ދުއާ ކޮށްދިނުމަށް ވެސް ވަނީ އެދިފައެވެ.
މީގެ އިތުރުން ޑައިރެކްޓަރު ހަންސަލް މެހެތާ ވެސް ވަނީ އެކަން ސޯޝަލް މީޑިއާގައި ހިއްސާ ކޮށްފައެވެ. އަދި ތައުޒިޔާ ކިޔާފައެވެ.
މިތިލޭޝް ވަނީ ބޮލީވުޑްގެ އޭ ލިސްޓްގެ ތަރިންނާއި އެކުގައިވެސް މަސްކަތް ކޮށްފައެވެ. ބޮލިވުޑްގެ ސަޕޯޓިންގ ރޯލުތަކުން ފެންނަ މިތިލޭޝް ވަނީ ރިތިކް ރޯޝަން ސަލްމާން ޚާން އަދި ޝާހްރުކް ޚާން ފަދަ ތަރިންނާއި އެކުގައި މަސައްކަތް ކޮށްފައެވެ. މީގެ އިތުރުން މިތިލޭޝް ވަނީ ބައެއް ޑްރާމާ ސިލްސިލާ ތަކުންވެސް ފެނިގެން ގޮސްފައެވެ.
