1988 ވަނަ އަހަރު ރިލީޒް ކުރި ކާމިޔާބު ފިލްމް "ތޭޒާބް"ގެ ރިމޭކަށް މަޝްހޫރު ބަތަލާ ޝްރައްދާ ކަޕުރު ސޮއި ކޮށްފި ކަމަށް ރިޕޯޓްތައް ބުނެފިއެވެ.
މި ފިލްމަށް އަދި ނަމެއް ދީފައި ނުވި ކަމުގައިވިޔަސް "ތޭޒާބް"ގެ ރިމޭކް ވަނީ އިއުލާން ކޮށްފައެވެ. މީގެ އަސްލު ފިލްމްގެ ލީޑުން ފެނިގެންދިޔައީ އަނިލް ކަޕޫރާއި މާދުރީ ޑިކްސިޓެވެ.
"ތޭޒާބް" ރަސްމީކޮށް އިއުލާން ކޮށްފައިވަނީ އޭގެ ލީޑުން ކާތިކް އާރިޔާން ފެންނާނެ ވާހަކައާއި އެކުގައެވެ. އެއީ އަސްލު ފިލްމުގައި އަނިލް ކަޕޫރު ކުޅުނު ރޯލުންނެވެ. އަދި ޝްރައްދާ ކުޅެއް ހަމަޖެހިފައިވަނީ މާދުރީ ކުޅެފައިވާ ބައެެވެ. މީ ކާތިކާއި ޝްރައްދާ އެކުގައި ފެނިގެން ދާނެ ފުރަތަމަ ފިލްމެވެ.
ކާތިކްގެ އެންމެ ފަހުން ރިލީޒް ކުރި ފިލްމަކީ ބޮޑު ކާމިޔާބެއް ހޯދި ފިލްމު "ބޫލް ބުލައްޔާ2″ އެވެ. އެ ފިލްމުގެ ކާމިޔާބީ އާއެކު ކާތިކް މިހާރު ވަނީ އެންމެ ޑިމާންޑަ ބޮޑު އެއް އެކްޓަރަށް ވެގެން ގޮސްފައެވެ.
ޝްރައްދާ މިހާރު އަންނަނީ ޑައިރެކްޓަރ ލަވް ރަންޖަންގެ، މިހާތަނަށް އަދި ނަމެއް ދީފައިނުވާ ފިލްމެއްގެ މަސައްކަތް ކުރަމުންނެވެ. މި ފިލްމު ގައި ޝްރައްދާއާއެކު ފެނިގެންދާނި ރަންބީރު ކަޕޫރެވެ.
