ކުރީގެ ރައީސް ޔާމީނާއި ރައްޔިތުންގެ މަޖިލީހުގެ ކުރީގެ މެންބަރު ޔޫސުފް ނައީމް ގުޅިގެން ހިންގި ކަމަށް ބުނާ ވ. އާރަށް ވިއްކުމުގައި ހިންގި ހިޔާނާތުގެ މައްސަލާގެ ޝަރީއަތުގައި ކަންކަން ދާގޮތުން ޤާނޫނީ ވަކީލް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު މޫސާ ސިރާޖުގެ ނުރުހުން ސީޕީ ހަމީދަށާއި، ހޯމް މިނިސްޓަރ އިމްރާނަށް އަމާޒު ވެއްޖެއެވެ.

ސިރާޖުގެ ފާޑުކިޔުން މިދެބޭފުޅުންނަށް އަމާޒުވީ އިއްޔެ ކުރިއަށް ދިޔަ އަޑުއެހުމުގައި ދައުލަތުން ހުށަހެޅި ހެއްކެއްގެ ޗެއިން އޮފް ކަސްޓަޑީގެ ތާރީހަކަށް 2026 ވަނަ އަހަރުގެ ތާރީހެއް އޮތުމުން އެކަމާއި ހިތްހަމަ ނުޖެހި ކުރެއްވި ޓުވީޓެއްގައެވެ.

ސިރާޖު ވިދާޅުވީ މިފަދަ ކަންކަމާއި ހެދި ރައީސް ޔާމީނަށް އުފުލާފައިވާ ދައުވާގެ މައްސަލަ ރައީސް ޔާމީނާއި އެއްކޮޅަށް ނިންމުނުން ނިންމުން ގޯސްވާ މީހުން ތިބޭނެކަމަށެވެ. ނަމަވެސް މިފަދަ ކަންކަމަކީ ރަނގަޅަށް ބަލައި ފުލުހުންގެ ތެރެ އިސްލާހު ކުރެވިގެން ނޫނީ ރަނގަޅު ކުރެވޭނެ ކަންކަމެއް ނޫންކަމަށް ސިރާޖު ވިދާޅުވިއެވެ.

ދެން ކޭސް ދެކޮޅަށް ނިންމީމާ ބުނާނީ ނިންމައިފިއޭ ދެކޮޅަށް. ކޯޓާއި ޕީޖީ ކަމަކުނުދެއޭ. ފުލުހުންގެ ހިދުމަތް އިސްލާހު ކުރާނެ/ވާނެ ދުވަހެއް ހަމަ ނާންނާނެ ދޯ؟

– ސީޕީ ހަމީދާއި، ހޯމް މިނިސްޓަރ އިމްރާން ޓެގް ކުރައްވައި ސިރާޖު ކުރެއްވި ޓުވީޓުގައި ވިދާޅުވިއެވެ.

އިއްޔެ ކްރިމިނަލް ކޯޓުގައި ބޭއްވި އަޑުއެހުމަށް ހެކިބަސް ނަގަން ހާޒިރުކުރީ ޑިޕޮސިޓް ސްލިޕްތަކާއި ސިޓީތަކުގައި ކޮށްފައިވާ ސޮއިތަކުގެ ސައްހަކަން ހޯދަން ޑޮކިއުމަންޓް އެގްޒަމިނޭޝަން ރިޕޯޓް ތައްޔާރު ކުރި ފުލުސް އޮފިސަރެވެ. ދައުލަތުން ކުރި ސުވާލެއްގެ ޖަވާބު ދެމުން އެ ފުލުސް މީހާ ބުނެފައިވަނީ އެ ހެކިތައް އޭނާއާ ހަމައަށް ގެނެސްފައިވަނީ ހުރިހާ އިޖުރާއަތްތަކެއް ފުރިހަމަ ކުރުމަށް ފަހު ކަމަށެވެ. އަދި އޭނާއާ ހަމައަށް ގެންނާނީ ވެސް ޗެއިން އޮފް ކަސްޓަޑީގައި އެއްވެސް ގޯހެއް ނެތް ކަން ޔަގީން ކުރުމަށް ފަހު ކަމަށެވެ.

އެހެންވިޔަސް ޗެއިން އޮފް ކަސްޓަޑީގައި އެ ހެކި ހޯދި ކަމަށް ފުލުހުން ލިޔެފައި އޮތީ 23 އޮގަސްޓް 2026 އެވެ. ތާރީހުގައި އެފަދަ އޮޅުމެއް އަރާފައި އޮތް ކަމެއް ތަހުގީގު މަރުހަލާގައި ތެރެއިން ފާހަގަ ނުވާ ކަމަށާއި އޭނާ ފުރަތަމަ ބެލިއިރު ޗެއިން އޮފް ކަސްޓަޑީ އޮތީ ރަނގަޅަށް ކަމަށް ވެސް ބުންޏެވެ.

ޗެއިން އޮފް ކަސްޓަޑީއަކީ ހެކި ހޯދި ގޮތާއި ހެކި ތަހުލީލު ކުރުމުގެ މަރުހަލާގައި އެއް އޮފިސަރުން އަނެއް އޮފިސަރުގެ އަތަށް އެ ހެކި ގެންދެވިފައިވާ ގޮތާއި ތާރީހުތައް ބަޔާންކޮށްފައި އޮންނަ އެކުލެވުމެކެވެ.

މި މައްސަލާގައި މިހާތަނަށް ހެކިބަސް ނަގާފައިވަނީ ހަތަރު ހެކިވެރިއެއްގެ ހެކިބަހެވެ. އެއީ މިއަދު ހެކިބަސް ނެގި އޮފިސަރުގެ އިތުރަށް ޓޫރިޒަމް މިނިސްޓްރީގެ އޮފިޝަލަކާއި، ހަތަރު އައިފޯނަކާއި ޕެންޑްރައިވްތަކެއް ތަހުލީލުކޮށް މޯބައިލް ފޮރެންސިކް ރިޕޯޓެއް ތައްޔާރުކުރި އޮފިސަރަކާއި، އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު ޒިޔަތުގެ ލެޕްޓޮޕް ތަހުލީލު ކުރި އޮފިސަރެވެ.