އެމްޑީޕީ ތެރެއިން ބައެއް ބޭފުޅުން ރައީސް ނަޝީދާއި އެހާބޮޑަށް ޒާތީ ވެގެން އުޅުއްވަނީ ރައީސް ނަޝީދު ވައްކަން ވަރިހަމަ ނުކުރައްވާތީ ކަމުގައި ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު (ވައްޑެ) ވިދާޅުވެއްޖެއެވެ.

ވައްޑެ މިހެން ވިދާޅުވީ ރައީސް ނަޝީދު މަޖިލީހުގެ ރައީސްކަމުން ވަކި ކުރުމަށް އެމްޑީޕީގެ ޕާލިމަންޓްރީ ގްރޫޕްގައި ކުރަމުންދާ މަސައްކަތާއި ގުޅިގެން އެމްޑީޕީ އާންމު މެމްބަރަކު ޓުވިޓާގައި ކުރެއްވި ސުވާލަކަށް ޖަވާބު ދެއްވަމުންނެވެ. އެމީހާވަނީ ފޮޓޯ ނިކުތް މެމްބަރުވެސް އެލިސްޓުގައި ސޮއި ކުރައްވައިފިންތޯ ސުވާލު ކުރައްވާފައެވެ.

އެސުވާލަށް ޖަވާބު ދެއްވަމުން ވައްޑެ ވިދާޅުވީ، އެބޭފުޅުން ހޮވާފައި ހުންނެވި ޑެޕިއުޓީ ލީޑަރުގެ ފޮޓޯއެއް އާންމުވެގެން އުޅުމުންވެސް އެއީ މައްސަލައަކަށް ނުވާކަމަށެވެ. ފޮޓޯ ލީކުވެގެން އުޅޭކަމަށް ވައްޑެ އިޝާރާތް ކުރައްވަނީ އެމްޑީޕީގެ ޕާލިމަންޓްރީ ގްރޫޕްގެ ޑެޕިއުޓީ ޕީޖީ ލީޑަރު ހުސެން ޝަހީމް (އަނދުން ހުސެއިން) ގެ ފޮޓޯއެވެ.

ވައްޑެ ވިދާޅުވީ އަނދުން ހުސެއިންގެ ފޮޓޯ ލީކުވުމުންވެސް އެމްޑީޕީގެ ތެރެއިން ބައެއް ބޭފުޅުންނަށް މައްސަލައަކަށް ވެފައި ނުވާކަމަށެވެ. ނަމަވެސް ރައީސް ނަޝީދުގެ ފަހަތުން ނެއްޓެން ނޭގިގެން އުޅުއްވަނީ އެމަނިކުފާނު ވައްކަމާއި ދެކޮޅު ހައްދަވާތީކަމަށްވެސް ވައްޑެ ވިދާޅުވިއެވެ.

އަސްލުވެސް ޒާހިރުބޭ. އެބޭފުޅުން ހޮވާފައިހުރި ޑެޕިއުޓީ ޕީޖީ ލީޑަރުގެ ފޮޓޯ ނިކުތީމަވެސް، އެ ނުވޭ އެއްވެސް މައްސަލައަކަށް. މުޅިން އެހެން ހަސަދަ ގަޑެއް ބާލަން އުޅޭއުޅުމެއް. ރައީސް ނަޝީދު ވައްކަން ވަރިހަމަ ނުކުރައްވާތީ.

– ވައްޑެ ވިދާޅުވިއެވެ.

Asluves zahirbe. E beyfulhun hovaafa huri deputy pg leader ge photo nukutheema ves, e nuvey evves massala akah. Mulhin ehen hasadha gandeh baalan ulhey ulhuneh. RN vakkan varihama nukuravvaathee. https://t.co/fndCDu6Pf4

— Waddey (@waddey_) August 1, 2022

ރައީސް ނަޝީދު މަޖިލީހުގެ ރައީސްކަމުން ވަކި ކުރުމަށް މަސައްކަތް ކުރަމުންދާއިރު، ނަޝީދުގެ ފަޅިއަށް އަރައި ސަރުކާރުގެ ވިޕްލައިންތަކާ ހިލާފުވާނެ ކަމަށް ފާޅުގައި ވިދާޅުވެފައި ވަނީ މިހާތަނަށް 19 މެމްބަރެކެވެ. އިދިކޮޅު ހުރިހާ ޕާޓީއެއް އެމަނިކުފާނު ސަލާމަތް ކުރަން މަސައްކަތް ކުރިޔަސް ލިބޭނީ 28 ވޯޓެވެ. އޭގެ ބަދަލުގައި ރައީސްގެ ފަޅީގައި 46 މެމްބަރުން އެބަތިއްބެވެ.

ގާނޫނުއަސާސީގައިވާ ގޮތުން ނަމަ ރައްޔިތުންގެ މަޖިލީހުގެ ރައީސްގެ އިތުބާރު ނެތް ކަމަށް ސިމްޕަލް މެޖޯރިޓީން ފާސްވާނެ އެވެ. އެއީ މިހާރު 87 މެމްބަރުން ތިއްބަވާ މަޖިލީހުގެ 43 މެމްބަރުންގެ ވޯޓެވެ. މަޖިލީހުގެ ރައީސްގެ މަގާމުގައި ހުންނަވާ ބޭފުޅަކު މަގާމުން ވަކިކުރަން ހުށަހެޅޭނީ މަޖިލީހުގެ ގަވައިދުގައިވާ ގޮތުން މަޖިލިހުގެ ޖުމުލަ މެމްބަރުންގެ ހަތަރުބައިކުޅަ އެއްބަޔަށް ވުރެ މަދު ނޫން އަދަދެއްގެ މެމްބަރުންގެ ސޮޔާއެކު ހުށަހަޅާ ގަރާރަކުންނެވެ. އެއީ 22 މެމްބަރުންގެ ސޮޔެވެ.