އިންޑިއާގެ ބާނީ މަހާތުމާ ގާންދީގެ ހަޔާތުގެ މައްޗަށް އުފައްދާ ފިލްމު "ގާންދީ" ޑައިރެކްޓް ކުރާނީ ނެޝަނަލް ފިލްމު އެވޯޑް ހާސިލް ކޮށްފައިވާ ޑައިރެކްޓަރު ހަންސަލް މެހެތާކަން އިއުލާން ކޮށްފިއެވެ.
ހަންސަލް ވަނީ މީގެ ކުރިންވެސް ބަޔޮޕިކް ތައް ގެނެސްދީފައެވެ. ޚަބަރުތައް ބުނާގޮތުގައި މި ފިލްމުގައި ގާންދީގެ ރޯލު ކުޅޭނީ އަނޫޕާމް ކޭރްއެވެ.
ތާރީޚީ ޢިލްމުވެރިޔާ އަދި ލިޔުންތެރިޔާ ރާމަޗަންދުރާ ގުހާގެ "ގާންދީ ބިފޯ އިންޑިއާ" އަދި "ގާންދީ: ދަ ޔިއާސް ދެޓް ޗޭންޖްޑް ދަ ވޯލްޑު" އަށް ބިނާކޮށް އުފައްދާ މި ފިލްމުގައި ގެނެސްދޭނީ ގާންދީގެ ހަޔާރުގެ ކޮން ބާބެއް ކަމެއް އަދި ނޭގެއެވެ.
މި ފިލްމަކީ ހަންސަލް އާއި އެޕްލޯސް އެންޓަޓެއިންމަންޓް ގުޅިގެން ގެނެސްދޭ ފިލްމެކެވެ. މީގެ ކުރިން އެމީހުން ގުޅިގެން އުފެއްދި ފިލްމް "ސްކޭމް 1992″ އަކީ ވެސް ވަރަށް ކާމިޔާބު ފިލްމެކެވެ.
ހަންސަލް ބުނީ ގާންދީ އަކީ އައިކޮނިކް މީހެއް ކަމަށާއި ފިލްމު އުފައްދާ އިރުގައި ހަގީގަތާ އެއްގޮތަށް ކަންކަން ގެެނެސް ދިނުމަށް ވަރަށް ބޮޑަށް މަސައްކަތް ކުރާނެ ކަމަށެވެ.
މި ފިލްމުގެ ޝޫޓިން ފަށާނެ އިރެއް އަދި ހާމައެއް ނުކުރެއެވެ. އަދި ފިލްމުގެ ކާސްޓާ ބެހޭގޮތުން ވެސް ރަސްމީކޮށް މިހާތަނަށް ފިލްމު އުފައްދާ ފަރާތްތަކުން ވާހަކައެއް ނުދައްކައެވެ.
