މަޖިލިސް ރައީސް މުހައްމަދު ނަޝީދުގެ އިތުބާރު ނެތްކަމަށް ވޯޓެއް ނަގާނަމަ، އެމްޑީޕީގެ ޕާލިމަންޓްރީ ގްރޫޕްގައި ރައީސް ޞާލިހުގެ އިތުބާރު ނެތްކަމަށް ވޯޓު ދޭނެ ކިތަންމެ މެމްބަރަކުވެސް ތިބޭނެ ކަމަށް ރައްޔިތުންގެ މަޖިލީހުގެ އުނގޫފާރު ދާއިރާގެ މެމްބަރު މުހައްމަދު ވަހީދު ވިދާޅުވެއްޖެއެވެ.

އޭނާ މިހެން ވިދާޅުވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދާއި މަޖިލީހުގެ ނައިބް ރައީސް އީވާ މަގާމުން ވަކިކުރުމަށް ގޮވާލައި އޮންލައިން ޕެޓިޝަނެއްގައި ސޮއިކުރުމަށް މަސައްކަތް ފަށާފައި ދަނޑިވަޅެއްގައި އިދިކޮޅު ޕީއެންސީގެ ނައިބް ރައީސް އާދަމް ޝަރީފް ކުރެއްވި ޓުވީޓަކާއި ގުޅިގެންނެވެ.

އާދަމް ޝަރީފް ވިދާޅުވީ ރައީސް ނަޝީދާއިއެކުގައި ރައީސް ޞާލިހުގެ އިތުބާރު ނެތްކަމަށްވެސް މަޖިލީހަށް ހުށަހެޅުމުގެ ފުރުސަތު ބޮޑު ކަމަށެވެ. އަދި ރައްޔިތުންގެ އިތުބާރެއް މިސަރުކާރަކަށް މިހާރަކު ނެތް ކަމަށްވެސް އާދަމް ޝަރީފް ވިދާޅުވިއެވެ.

އާދަމް ޝަރީފްގެ ވާހަތަކާއި ގުޅިގެން ވައްޑެ ވިދާޅުވީ މަޖިލިސް ރައީސްގެ އިތުބާރު ނެތްކަމުގެ މައްސަލައެއް ނަގާނަމަ، ރައީސުލްޖުމްހޫރިއްޔާގެ އިތުބާރު ނެތްކަމަށް ވޯޓު ދޭނެ އެމްޑީޕީ މެމްބަރުންވެސް މަދު ނުވާނެކަމަށެވެ.

މަޖިލިސް ރައީސްގެ އިތުބާރު ނެތްކަމަށް ނަގާނަމަ އާދަމް ޝަރީފް އެވިދާޅުވާހެން ރައީސުލްޖުމްހޫރިއްޔާގެ އިތުބާރު ނެތްކަމަށް ވޯޓު ދޭނެ ކިތަންމެ މެމްބަރެއް އެމްޑީޕީގައިވެސް ތިބޭނެ.

– ވައްޑެ ވިދާޅުވިއެވެ.

ނަޝީދާއި އީވާ މަގާމުން ވަކިކުރުމަށް ޕެޓިޝަނެއްގައި ސޮއިކުރަން ފަށާފައި މިވަނީ ރައީސް އިބްރާހީމް މުހައްމަދު ސޯލިހް އަންހެން ކުއްޖަކާ އެކު ބަދުއަހްލާގީ އަމަލު ހިންގާ މަންޒަރު ދައްކައިދޭ ފޮޓޯތަކެއް ހުރި ކަމަށް ރައީސް ނަޝީދު ވިދާޅުވުމާ ގުޅިގެން އެމްޑީޕީގެ ބައެއް މަޖިލިސް މެންބަރުން އެކަމާ ވަރަށް ބޮޑަށް ހިތްހަމަނުޖެހުން ފާޅުކުރައްވާ ރައީސް ނަޝީދާ ދެކޮޅަށް ވާހަކަދައްކަވަމުން ގެންދަވާ ވަގުތެއްގައެވެ.

ރައީސް ނަޝީދު ރައީސް ސޯލިހަށް އަމާޒުކޮށް ބޮޑު ތުހުމަތެއް ކުރީ އެއްޖިންސުން ގުޅުން ހިންގި ކަމުގެ ތުހުމަތުގައި ރައީސް ނަޝީދުގެ ކޮއްކޮ ނާޒިމު އަބްދުއްސައްތާރު ހައްޔާރުކުރުމާ ގުޅިގެންނެވެ.

ރައީސް ނަޝީދާއި އީވާ މަގާމުން ވަކިކުރުމަށް ބައެއް މެންބަރުންނާއި ބައެއް އާންމުންވެސް ގޮވާލަމުން ގެންދާއިރު މަޖިލިސް މިވަގުތު އޮތީ ޗުއްޓީގައެވެ. ރައްޔިތުންގެ މަޖިލީހުގެ ޖަލްސާތައް އަލުން ފަށާނީ ކުރިއަށް އޮތް އޮގަސްޓް މަހުގެ ތެރޭގަ އެވެ. ރައީސް ނަޝީދު މިވަގުތު ހުންނެވީ ވެސް އިނގިރޭސިވިލާތުގައެވެ.

ރައްޔިތުންގެ މަޖިލީހުގެ ރައީސް މަގާމުން ދުރުކުރެވޭނީ މަޖިލީހުގެ ޖުމްލަ މެންބަރުންގެ ހަތަރުބައިކުޅަ އެއްބައި މެންބަރުން ސަބަބު ބަޔާންކޮށް މަޖިލީހަށް ގަރާރެއް ހުށަހެޅުމުންނެވެ. ހިނގަމުންދާ މަޖިލީހުގައި ނަމަ ގަރާރު ހުށަހެޅުމަށް މަދުވެގެން 22 މެންބަރުންގެ ސޮއި ބޭނުންވާނެއެވެ.

ގަރާރު ހުށަހެޅުމުން މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ މަޖިލީހުގެ އަގުލަބިއްޔަތުން ފާސްކުރެވޭނެއެވެ. އެއީ ހިނގަމުންދާ މަޖިލީހުގައި ތިއްބެވި 87 މެންބަރުންގެ ތެރެއިން 43 މެންބަރުންގެ ތާއީދާ އެކުއެވެ.