އެމެރިކާގެ ސިއްޙީ އިދާރާތަކުން، އިންތިޚާބީ ރައީސާއެކީ މަސައްކަތް ކުރަން ފެށުމަށް، ގައިންގަޔަށް އަރާ ބަލިތަކާބެހޭ އެމެރިކާގެ ޚާއްސަ މާހިރު، އަދި އެގައުމުގެ ކޯވިޑް19 ޓާސްކް ފޯހުގެ ވެރިޔާ ޑރ. އެންތަނީ ފައުޗީ ގޮވާލައްވައިފިއެވެ.
ފައުޗީ މިގޮތަށް ގޮވާލައްވާފައިވަނީ، މިހާރު އެމެރިކާގައި ކޮންޓްރޯލުން ނެއްޓެމުންދާ ކޯވިޑް19ގެ ހާލަތާއި ގުޅޭގޮތުން އެމެރިގާގެ ޓީވީ ޗެނަލްއެއް ކަމުގައިވާ ސީއެންއެންއަށް ދެއްވި އިންޓަވިއުއެއްގައެވެ.
ޑރ. ފައުޗީއަކީ އެމެރިކާގެ ނޭޝަނަލް އިންސްޓިޓިއުޓް އޮފް އެލާޖީ އެންޑް އިންފެކްޝަސް ޑީސީސަސްގެ ޑިރެކްޓަރވެސް މެއެވެ. މި އިންސްޓިޓިއުޓަކީ، ކޯވިޑް19 ބައްޔާ ގުޅޭގޮތުން މިވަގުތު އެމެރިކާގައި ސިއްޙީގޮތުން ނިންމަންޖެހޭ މުހިންމު ނިންމުންތަކުގައި އެންމެ ފަހުބަސް ބުނާ މުވައްސަސާއެވެ.
"އެގޭނޭ ފަދައިން އަހަރެންވަނީ އިންތިގާލީ އެތަކެއް ސަރުކާރަކާ އެކީ މަސައްކަތް ކޮށްފަ. އަދި ފާއިތުވެދިޔަ 36 އަހަރު ދުވަހުގެ ތެރޭގައި އަހަރެން ވަނީ 6 ރައީސަކާ އެކީ މަސައްކަތް ކޮށްފަ. އިންތިގާލީ މަރުހަލާގައި އަންނަ ސަރުކާރާއި، ނިމިގެންދާ ސަރުކާރާއި ދެމެދު ސުލްހަވެރިކަމާއެކީ މައުލޫމާތު ހިއްސާކުރެވިގެން ދިއުމަކީ ކޮންމެހެން މުހިންމު ކަމެއްވެ." ޑރ. ފައުޗީ ވިދާޅުވެފައި ވެއެވެ. "ހުރިހާ ކަމެއް ހުއްޓުމަކަށް ގެނެސްފަ، މަސައްކަތްތައް އެއްބައެއްގެ އަތްމަތިން އަނެއްބައެއްގެ އަތްމައްޗަށް ބަދަލު ވުމުގެ ބަދަލުގައި، ނަކަލު ވާންވާނީ ހިގަހިގާ އޮތް ސަރުކާރެއް."
އެމެރިކާގެ ރައީސް ޓްރަމްޕް އިންތިޚާބުގެ ނަތީޖާ ގަބޫލު ކުރައްވާފައި ނުވާތީ، އިންތިޚާބު ނިމުނުތާ 3 ހަފްތާ ފާއިތުވެގެން ދާއިރުވެސް، އެމެރިކާގައި ސަރުކާރު ބަދަލުވުމުގެ މަރުހަލާ އަދިވެސް ރަސްމީ ސިފައެއްގައި ފެށިގެން ގޮސްފައެއް ނުވެއެވެ.
އެހެންނަމަވެސް، އިންތިޚާބީ ރައީސް ޖޯ ބައިޑްންގެ ކޯވިޑް19 ޓީމުގެ ފަރާތުން ގެންދަނީ، ޖެނުއަރީ 20ގައި ބައިޑްން ހުވާކުރުމާއިއެކު، މަސައްކަތް ފެށޭވަރަށް ތައްޔާރުވެ ތިބުމުގެ ގޮތުން އެމެރިކާގެ ސިއްޙީ އިދާރަތަކާއި ބައްދަލު އަމިއްލަގޮތުން މަޝްވަރާތައް ބާއްވަމުންނެވެ. އެހެންނަމަވެސް މިހާތަނަށް އައިއިރު އަދިވެސް މިޓީމަށް ޓަރަމްޕްގެ ސަރުކާރުން ކޯވިޑް19ގެ ޑޭޓާތަކާއި އަދި އެމެރިކާގައި ވެކްސިންގ ދިނުމަށް ހަދާފައިވާ ޕްލޭންތަކަގުގެ އެއްވެސް މައުލޫމާތެއް ފޯރުކޮށްދީފައެއް ނުވެއެވެ.
އެމެރިކާގައި މިހާރު ދަނީ ކޮންމެ ދުވަހަކުވެސް ރެކޯޑް އަދަދަކަށް ކޯވިޑް19 އަށް މީހުން ޕޮޒިޓިވް ވަމުންނެވެ. ކޯވިޑް19އާއި ގުޅޭ ރަސްމީ ހިސާބުތައް އާންމު ކުރަމުންދާ އެމެރިކާގެ ޖޯންސް ހޮޕްކިންސް ޔުނިވާސިޓީން އެންމެ ފަހުން އާންމު ކޮށްފައިވާ މަޢުލޫމާތުތަކަށް ބަލާއިރު، މިފަފްތާގެ ހުކުރުދުވަހު އެކަނިވެސް އެމެރިކާގައި 184،000 މީހުން ވަނީ މިބައްޔަށް ޕޮޒިޓިވް ވެފައެވެ. މިއީ މިބަލި އެމެރިކާއިން ފެންނަން ފެށިފަހުން އެއްދުވަހަކުން އެންމެ ގިނަ އަދަދަކަށް އެމެރިކާގައި މިބައްޔަށް މީހުން ޕޮޒިޓިވް ވި ދުވަހެވެ.
ފައުޗީ އިތުރަށް ވިދާޅުވި ގޮތުގައި، ކޮރޯނާ ވައިރަސް ކޮންޓްރޯލު ކުރުމަށް އުފައްދާފައިވާ ވައިޓް ހައުސް ކޮރޯނާ ވައިރަސް ޓާސްކް ފޯހާ ޓްރަމްޕް ބައްދަލު ނުކުރާތާ މިހާރު އެތަކެއް މަސްތަކެއް ފާއިތުވެގެން ހިގައްޖެއެވެ. މި ޓާސްކް ފޯސް ޗެއަރ ކުރައްވަނީ ނާއިބް ރައީސް މައިކް ޕެންސެވެ.
ފައުޗީ ވަނީ، ވައިޓް ހައުސްގެ ޗީފް އޮފް ސްޓާފަކަށް ރޮން ކްލެއިން ބައިޑްން އައްޔަން ކުރައްވާފައިވާތީ އުފާ ކުރައްވާ ކަމަށްވެސް ވިދާޅުވެފައެވެ. އަދި ވިދާޅުވީ އޮބާމާގެ ވެރިކަމުގައި އޭނާ ކްލެއިންއާއެކީ މަސައްކަތް ކުރައްވާފައިވާ ކަމުގައެވެ. އޭރު އޮބާމާ ވަނީ އެދުވަސްވަރު ކުރިމަތިވި އެބޯލާ ކާރިސާ ކޯޑިނޭޓް ކުރުމަށް ސަރުކާރުގެ ފަރާތުން އެންމެ އިސްމީހެއްގެ ގޮތުގައި ކްލެއިން ހަމަ ޖައްސަވާފައެވެ.
ފައުޗީ ވިދާޅުވި ގޮތުގައި ކޯވިޑް19 ކޮންޓްރޯލްކުރެވި، އެމެރިކާ އާންމު ހާލަތަކަށް އެންމެ އަވަސްކޮށްވެސް ގެނެވޭނީ، އަންނަ އަހަރުގެ އެޕްރީލް ނުވަތަ ޖުލައިހާ ތާގައެވެ.
އެމެރިކާގައި މިހާތަނަށް އައިއިރު، ކޯވިޑް19 އަށް 9 މިލިއަން މީހުން ޕޮޒިޓިވްވެ، 200،000 އަށްވުރެ ގިނަ މީހުންވަނީ މަރުވެފައެވެ.
