ޒިނޭގެ ތުހުމަތު ޘާބިތުކުރަން ގެންނަންޖެހެނީ ހަތަރު ގަނޑު ފޮޓޯއެއް ނޫން ކަމަށާއި، ގެންނަން ޖެހޭނީ ހަތަރު ހެކިން، ކަމަށް ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.

ޑރ.އިޔާޒު މިހެން ވިދާޅުވީ ރައީސް އިބްރާހީމް މުހައްމަދު ސޯލިހް އަންހެން ކުއްޖަކާ އެކު ބަދުއަހްލާގީ އަމަލު ހިންގާ މަންޒަރު ދައްކައިދޭ ފޮޓޯތަކެއް ހުރި ކަމަށް ރައީސް ނަޝީދު ވިދާޅުވުމާ ގުޅިގެން އެމްޑީޕީއާއި އާންމުންގެ ގިނަ ބައެއްގެ ފާޑުކިޔުން ނަޝީދަށް އަމާޒުވެފައިވާ ވަގުތެއްގައެވެ.

ޑރ.އިޔާޒު ވިދާޅުވީ މީހަކު ޒިނޭ ކޮށްފިނަމަ އެކަމުގައި ހެކި ދައްކަން ޖެހޭނެކަމަށެވެ. އެގޮތުން ފިނޭއަށް ކުރެވޭ ތުހުމަތުގައި ހަތަރު ހެކިންގެ ހެކިބަސް ގެންނަންޖެހޭ ކަމަށާއި، އެއީ އެއްގޮތަކަށްވެސް 4 ގަނޑު ފޮޓޯ ހިފައިގެން އައިސްގެން ސާބިތުވާނެ ކަމެއްނޫންކަމަށް އިޔާޒު ވިދާޅުވިއެވެ.

ޒިނޭގެ ތުހުމަތު ޘާބިތުކުރަން ގެންނަންޖެހެނީ ހަތަރު ހެކިން. ހަތަރު ގަނޑު ފޮޓޯއެއް ނޫން. މުހައްމަދު ނަޝީދަށް މިވަރުގެ އަސާސީ ކަންތައް ނޭނގޭ މީހަކު ރައްޔިތުންގެ މަޖިލީހުގެ ރިޔާސަތުގައްޔާއި ޖުޑީޝަލް ސާވިސް ކޮމިޝަނެއްގައި ބަހައްޓަން ހެޔޮނުވާނެ.

– ޑރ.އިޔާޒު ވިދާޅުވިއެވެ.

ރައީސް ނަޝީދު ރައީސް ސޯލިހަށް އަމާޒުކޮށް ބޮޑު ތުހުމަތެއް ކުރީ އެއްޖިންސުން ގުޅުން ހިންގި ކަމުގެ ތުހުމަތުގައި ރައީސް ނަޝީދުގެ ކޮއްކޮ ނާޒިމު އަބްދުއްސައްތާރު ހައްޔާރުކުރުމާ ގުޅިގެންނެވެ. ރައީސް ނަޝީދާއި އީވާ މަގާމުން ވަކިކުރުމަށް ބައެއް މެންބަރުންނާއި ބައެއް އާންމުންވެސް ގޮވާލަމުން ގެންދާއިރު މަޖިލިސް މިވަގުތު އޮތީ ޗުއްޓީގައެވެ.

ރައްޔިތުންގެ މަޖިލީހުގެ ޖަލްސާތައް އަލުން ފަށާނީ ކުރިއަށް އޮތް އޮގަސްޓް މަހުގެ ތެރޭގައެވެ. ރައީސް ނަޝީދު މިވަގުތު ހުންނެވީ ވެސް އިނގިރޭސިވިލާތުގައެވެ. ރައްޔިތުންގެ މަޖިލީހުގެ ރައީސް މަގާމުން ދުރުކުރެވޭނީ މަޖިލީހުގެ ޖުމްލަ މެންބަރުންގެ ހަތަރުބައިކުޅަ އެއްބައި މެންބަރުން ސަބަބު ބަޔާންކޮށް މަޖިލީހަށް ގަރާރެއް ހުށަހެޅުމުންނެވެ. ހިނގަމުންދާ މަޖިލީހުގައި ނަމަ ގަރާރު ހުށަހެޅުމަށް މަދުވެގެން 22 މެންބަރުންގެ ސޮއި ބޭނުންވާނެއެވެ.

ގަރާރު ހުށަހެޅުމުން މަޖިލީހުގެ ރައީސްގެ އިތުބާރު ނެތް ކަމުގެ މައްސަލަ މަޖިލީހުގެ އަގުލަބިއްޔަތުން ފާސްކުރެވޭނެއެވެ. އެއީ ހިނގަމުންދާ މަޖިލީހުގައި ތިއްބެވި 87 މެންބަރުންގެ ތެރެއިން 43 މެންބަރުންގެ ތާއީދާ އެކުއެވެ.