ދިވެހިރާއްޖޭގެ އިސްލާމީ ޝަޚްސިއްޔަތަށް ގޮންޖެހުން ކުރިމަތިވާކަމަށް އިހުސާސްކުރެވޭނަމަ އެކަމަށް އޮތް އެންމެ ހެޔޮ ފަރުވާއަކީ އެންމެން ގުޅިގެން އިސްލާހަށް މަސައްކަތްކުރުންކަމަށް ހޯމް މިނިސްޓްރީގެ ސްޓޭޓް މިނިސްޓަރ އަދި ސަރުކާރު ކޯލިޝަންގައި ހިމެނޭ އަދާލަތު ޕާޓިގެ ސްޕޯކްސްޕާސަން ޢަލީ ނަޒީރު ވިދާޅުވެއްޖެއެވެ.

ރާއްޖޭގެ ސިޔާސީ ބައެއް އިސް ފަރާތްތަކުގެ ލާދީނީކަން ހާވެއްޖެކަމަށްބުނެ އެކަމުގެ ފާޑުކިޔުން ވަރަށް ބޮޑަށް އަމާޒުވެ ޚިޔާލުތަފާތުވުން އުފެދިފައިވާތީ އެކަމަށް އިޝާރާތްކުރައްވާ ޢަލީ ނަޒީރު ވިދާޅުވީ، ތަފާތުތަކާއި ބައިބައިވުންތައް ދޫކޮށް ދީނީ ޢިލްމުވެރިން މިކަމުގައި އެއްގަލަކަށްއަރާ ނަމޫނާ ދައްކަންޖެހޭކަމަށެވެ.

ވޭތުވެދިޔަ އަހަރުތަކުގައި ދީނީ މުހިންމު ކަންކަމުގައި ޢަދާލަތު ޕާޓީގެ ޢިލްމުވެރިންގެ އިސްނެންގެވުމާއެކު މުހިންމު މަސައްކަތްތަކެއްކުރެވި ކާމިޔާބީ ހޯދިފައިވާކަމަށާއި،  ޢަދާލަތު ޕާޓީ އާއި އެޕާޓީގެ ޢިލްމުވެރިންގެ މަޖިލީސް ދެމިއޮންނާނީ އިސްލާމްދީނަށް ޚިދުމަތްކުރުމުގައިކަމަށް ނަޒީރު ވިދާޅުވިއެވެ.

ރާއްޖޭގެ އިސްލާމީ ޝަޚްސިއްޔަތު ނަގަހައްޓާ ދިވެހި ރައްޔިތުންގެ މެދުގައި ދީނީ ހޭލުންތެރިކަން އިތުރުކުރުމުގެ މަސައްކަތުގައި، ރާއްޖޭގެ ހުރިހާ ދީނީ ޢިލްމުވެރިންނާއެކުވެސް އެބޭފުޅުންގެ ސިޔާސީ ފިކުރަށް ބެއްލެވުމެއްނެތި، ޢަދާލަތު ޕާޓީގެ ޢިލްމުވެރިން ގުޅިގެން މަސައްކަތްކުރައްވާނެކަމަށްވެސް ޢަލީ ނަޒީރު ވިދާޅުވިއެވެ.

ރާއްޖޭގެ އިސްލާމީ ޝަޚްސިއްޔަތު ނަގަހައްޓާ ދިވެހި ރައްޔިތުންގެ މެދުގައި ދީނީ ހޭލުންތެރިކަން އިތުރުކުރުމުގެ މަސައްކަތުގައި، ރާއްޖޭގެ ހުރިހާ ދީނީ ޢިލްމުވެރިންނާއެކުވެސް އެބޭފުޅުންގެ ސިޔާސީ ފިކުރަށް ބެއްލެވުމެއްނެތި، ޢަދާލަތު ޕާޓީގެ ޢިލްމުވެރިން ގުޅިގެން މަސައްކަތްކުރައްވާނެ!

— Ali Nazeer (@alynazeer) July 31, 2022

ސްޓޭޓް މިނިސްޓަރ މިހެން ވިދާޅުވެފައިމިވަނީ، އެއް ޖިންސުން ގުޅުން ހިންގި މައްސަލައިގެ ތުހުމަތުގައި ރައްޔިތުންގެ މަޖިލީހުގެ ރައީސް މުޙައްމަދު ނަޝިދުގެ ކޮއްކޮ، ނާޒިމް ސައްތާރު ހައްޔަރުކުރުމުން އެއީ ސަރުކާރު ކޯލިޝަންގައިތިބި ހައްދުފަހަނަ އެޅުމުގެ ފިކުރުމުގެ މީހުން ރުއްސަން ކުރެއްވިކަމެއްކަމަށް ރައްޔިތުންގެ މަޖިލީހުގެ ރައީސް އަދި އެމްޑީޕީގެ ރައީސް މުޙައްމަދު ނަޝީދު ވިދާޅުވެފައިވަނިކޮށެވެ. މިއާއެކު

އެތައް ބަޔަކު ދަނީ އެމަނިކުފާނަށް ފާޑުކިޔަމުންނެވެ. އޭގެ ތެރޭގައި އެމްޑީޕީގެ މެންބަރުންނާއި އާންމުންނާއި ދީނީ ޢިލްމުވެރިން ހިމެނެއެވެ.

ރައީސް ނަޝިދުގެ އެ ވާހަކަފުޅަކީ އެއްޖިންސުން ގުޅުންހިންގުމަކީ އިންސާނީ ހައްޤެއްކަމަށް ވަކާލާތުކުރާ ފަރާތްތަކުގެ ސަޕޯޓު ހޯދުމާއި، ދީނީ ޢިލްމުވެރިންނަކީ ހަރުކަށި ފިކުރުގެ މީހުން ކަމަށް ބޭރު ދުނިޔެއަށް ބުނެދޭން މަސައްކަތްކުރުން ކަމަށް ބައެއް ފަރާތްތަކުން ތުހުމަތުކުރެއެވެ.

ރައީސް ނަޝީދު ވަނީ ރައީސް ޞާލިޙްގެ ބަދުއަޚްލާގީ ފޮޓޯތަކެއް ހުރިކަމަށްވެސް ވިދާޅުވެ ރައީސް ޞާލިޙަށް އިންޒާރު ދެއްވާފައެވެ. ނަމަވެސް ސަރުކާރުން ވަނީ އެފަދަ ފޮޓޯތަކެއް ނުހުންނާނެކަމުގެ ޔަޤީންކަން ދެއްވާފައެވެ.