ހއ. ދިއްދޫ ބަނދަރު ތަރައްޤީ ކުރުމާއި ޖެޓީ ހެދުމުގެ މަޝްރޫޢަށް ބޭނުންވާ ކޮންކްރީޓް ގަލުގެ ތިންވަނަ ޝިޕްމެންޓް އެރަށަށް ގެންގޮސްފިއެވެ.
އެމްޓީސީސީން ބުނީ، ދިއްދޫ ބަނދަރު މަޝްރޫޢުގެ ކޮންކްރީޓް ގައު އެތުރުމުގެ މަސައްކަތުގެ 72 އިންސައްތަ ވަނީ ފުރިހަމަކުރެވިފައިވާކަމަށެވެ.
ހއ. ދިއްދޫ ބަނދަރު ތަރައްޤީ ކުރުމާއި ޖެޓީ ހެދުމުގެ މަޝްރޫޢަށް ބޭނުންވާ ކޮންކްރީޓް ގަލުގެ ތިންވަނަ ޝިޕްމެންޓް ވަނީ ޕްރޮޖެކްޓް ސައިޓަށް ގެންދެވިފަ. އަދި ކޮންކްރީޓް ގައު އެތުރުމުގެ މަސައްކަތުގެ 72 އިންސައްތަ ވަނީ ފުރިހަމަކުރެވިފަ.#MTCCProjects #RayyithungeKunfuni pic.twitter.com/mFMiSBvhbl
— MTCC Plc (@MTCCPlc) July 28, 2022
މިހާރު ދިއްދޫގައި ބޭނުން ކުރާ ބަނދަރަކީ ފުޅާމިނުގައި 250 ފޫޓުގެ ބަނދަރެކެވެ. ބަނދަރު ބޮޑުކޮށް ނިމޭއިރު ފުޅާމިނުގައި 350 ފޫޓު ހުންނާނެއެވެ. އަދި ދިގުމިން 600 ފޫޓަށް އިތުރު ވެގެން ދާނެއެވެ.
އެމްޓީސިސީގެ ސީއީއޯ އާދަމް އާޒިމް ވިދާޅުވީ ސަރުކާރުން ދިއްދޫގައި މިހާރު ތަރަށްގީކުރާ ބަނދަރަކީ ރާއްޖޭގައި ހަދާ އެންމެބޮޑެތި ބަނދަރުގެ ތެރެއިން ބަނދަރެއް ކަަމަށެވެ. މިމަސައްކަތަކީ ވަރަށް ބޮޑު މަސައްކަތެއްކަމަށާއި މިއީ އަލަށް ބަނދަރެއް ހެދުން ކަހަލަ ބޮޑުމަސައްކަތެއްކަމަށް އާޒިމް ވަނީ ވިދާޅުވެފައެވެ.
މި މަޝްރޫޢުގެ ދަށުން 78،000 އަކަމީޓަރުގެ ސަރަހައްދެއް ފުން ކުރުމާއި 616 މީޓަރު ސަރަހައްދެއްގައި ބޭރުތޮށި ލުމާއި 185 މީޓަރު ސަރަހައްދެއްގައި ރިވެޓްމަންޓް ޖެހުމާއި 326 މީޓަރު ސަރަހައްދެއްގައި އެއްގަމު ތޮށި ލުމާއި 4320 އަކަމީޓަރު ސަރަހައްދެއްގައި ޕޭވްމަންޓް ހެދުމާއި ބަނދަރު ބައްތި ހަރުކުރުމަށްވަނީ ހަމަޖެހިފައެވެ. މި މަޝްރޫއަކީ 69.87 މިލިޔަން ރުފިޔާގެ މަޝްރޫޢެކެވެ.
