ކައިވެންޏަށް ދެމަހުގައި ބަނޑުބޮޑުކަން އިއުލާން ކުރި، ބޮލީވުޑްގެ ބަތަލާ އާލިއާ ބަޓް ފިލްމީ ދާއިރާއިން ބްރޭކެއް ނެގިކަން އިއުލާން ކޮށްފިއެވެ.
އޭނާ އެކަން އިއުލާން ކޮށްފައިވަނީ އެންމެ ފަހުން ޝޫޓިން ނިންމާލި "ރޮކީ އޯރް ރާނީކީ ޕްރޭމް ކަހާނީ"ގެ ސެޓުންނެވެ. އެ ފިލްމުގެ ޝޫޓިން ނިންމާލިކަން އިއުލާން ކުރުމަށް ބޭންވި ކުޑަ ކޭކު ފެޅުމެއްގައި އާލިއާ ވަނީ އެކަން އިއުލާން ކޮށްފައެވެ.
އާލިއާ ބަނޑުބޮޑުކަން އިއުލާން ކުރި އިރު އޭނާ ހުރީ ހޮލީވުޑަށް ތައާރަފް ވާ ފިލްމުގެ ޝޫޓިންގައި ޔޫކޭގައެވެ. ކުރިންވެސް ނޫސްތަކުން ރިޕޯޓް ކޮށްފައިވާ ގޮތުގައި އާލިއާ ބަނޑުބޮޑު ވުމާއި ގުޅިންގެން ބްރޭކެއް ނަގާނެއެވެ.
ފިލްމުގެ ޝޫޓިންގައި ދެން އާލިއާ ބައިވެރި ވާނީ އަންނަ އަހަރުއެވެ. ފިލްމުގައި ބާކީ އޮތީ ހަމައެކަނި ލަވައެއްގެ ޝޫޓިންއެވެ. އޭނާ ސޯޝަލް މީޑިއާއަށް ދޫކޮށްލި ވީޑިއޯގައި ބުނެފައިވަނީ އެ ޓީމުގެ މަތިން ވަރަށް ބޮޑަށް ހަދާން ވާނެ ކަމަށެވެ.
View this post on Instagram
"ރޮކީ އޯރް ރާނީކީ ޕްރޭމް ކަހާނީ" އަކީ ކަރަން ޖޯހަރު 5 އަހަރަށް ފަހު އަލުން ޑައިރެކްޓަރުގެ ގޮނޑީގައި އިށީންނަ ފިލްމެވެ. މި ފިލްމުގެ ލީޑުން އާލިއާ އާއެކު ފެނިގެން ދާނީ ރަންވީރު ސިންގްއެވެ. މިއީ މިދެތަރިން އެކުގައި ކުޅޭ ދެވަނަ ފިލްމެވެ. މީގެ ކުރިން ދެތަރިން އެކުގައި ވަނީ "ގަލީ ބޯއީ" އިން ފެނިގެން ގޮސްފައެވެ.
