ސްރީ ލަންކާގެ ރައީސްކަމުގެ މަގާމުން ގޮޓަބަޔަ ރާޖަޕަކްސަ އިސްތިއުފާ ދެއްވުމާއި ގުޅިގެން، މި ދައުރުގެ ކުރިޔަށް އޮތް ތަނުގައި އެގައުމުގެ ރައީސްކަން ކުރައްވާނޭ ބޭފުޅަކު އައްޔަން ކުރުމަށް މިއަދު އެގައުމުގެ ގާނޫނުހަދާ މަޖިލިހުގައި ނެގުނު ވޯޓު، މިހާރުގެ ވަގުތީ ބޮޑުވަޒީރު ރަނިލް ވިކްރެމެސިންގެ އައްޔަން ކޮށްފިއެވެ.
ގާނޫނުހަދާ މަޖިލީހުގައި ބޭއްވުނު މިއިންތިޚާބުގެ ރަނިލް ވިކްރެމެސިންގެ ކާމިޔާބު ކުރައްވާފައިވަނީ، އޭނާއާއި ވާދަކުރި، ސްރީ ލަންކާގެ ކުރީގެ ރައީސް ގޮޓަބަޔަގެ ބޭބޭ، މަހިންދަ ރާޖަޕަކްސަގެ އަރިސް ބޭފުޅެއް ކަމުގައިވާ އަލަހައްޕެރުމައާއި ވާދަކުރައްވާ ކާމިޔާބު ކުރައްވައިގެންނެވެ.
މި އިންތިޚާބު ރަނިލސް ކާމިޔާބު ކުރެއްވުމާއި ގުޅިގެން އޭނާ ވަވަޑައިގަންނަވާނީ ސްރީ ލަންކާގެ 8 ވަނަ ރައީސަށެވެ.
ކުރިން، މި އިންތިޚާބުގެ އެންމެ ކުރީގައި ވާދަކުރާނެ ކަމަށް ކުރިން ބެލެވެމުންއައި، އިދިކޮޅު ކެނޑިޑޭޓް ސަޖިދު ޕްރަމަދާސާ ވަނީ އޭނާގެ ނަން އަނބުރާ ގެންދަވާ، ގައުމީ މަސްލަހަތައްޓާކާ، ރަނިލްއާއި ވާދަކުރެއްވި ދުލާސް އަލަހައްޕެރުމާއަށް ތާއީދު ކުރައްވާނޭކަން ހާމަ ކުރައްވާފައެވެ. އެއާއެެކު މިއިންތިޚާބު ވެގެން ދިޔައީ، ވަގުތީ ރައީސް ކަންވެސް އަދާ ކުރައްވަމުން ގެންދެވި ރަނިލްއާއި ދުލާސް އަލަހައްޕެރުމާއާއި ދެބޭފުޅުންގެ މެދުގައި ބޭއްވުނު ވާދަވެރި ރޭހަކަށެވެ.
މި އިންތިޚާބުގައި ވާދަކުރެއްވި 3 ވަނަ ކެނޑިޑޭޓް ކަމުގައިވާ، ނޭޝަނަލް ޕީޕަލްސް ޕަވަރ ޕާޓީގެ ލީޑަރު ވިކްރެމެސިންގެ ޕާޓީން ގާނޫނުހަދާ މަޖިލިހުގައި ތިއްބަވަނީ އެންމެ ތިން މެމްބަރުން ކަމަށް ވާތީ އޭނާއަށް މާބޮޑު ތާއީދެއް ލިބިދާނެ ކަމަކަށް ނުބެލެވެއެވެ.
ސްރީ ލަންކާގެ އިގްތިސާދު އިނދަޖެހި، މުޅިގައުމުގައި ހަމަނުޖެހުން އާންމު، ސްރީ ލަންކާ ސިޔާސީ ބޮޑު ކާރިސާއަކަށް ވެއްޓިގެން ދިއުމާއެކު، ބޮޑުވަޒީރުކަމުގެ މަގާމްގައި ހުންނެވި މަހިންދަ ރާޖަޕަކްސަ ބޮޑުވަޒީރުކަމުގެ މަގާމުން އިސްތިއުފާ ދެއްވުމާއެކު، އޭރުގެ ރައީސް ގޮޓަބަޔަ ސްރީ ލަންކާގެ ބޮޑުވަޒީރުކަމަށް އައްޔަން ކުރެއްވީ ރަނިލް ވިކްރަމެސިންގހެ އެވެ.
މިދައުރުގެ ބާކީ އޮތްތަނަށް، ރައީސްކަމަށް އައްޔަން ކުރެވުނު ރަނިލްއަކީ ފަސް ފަހަރުމަތިން ސްރީ ލަންކާގެ ބޮޑުވަޒީރުކަން ކުރައްވާފައިވާ ބޭފުޅެކެވެ. އަދި އޭނާއަކީ މިހާރު ސްރީ ލަންކާގައި ހުންނެވި ސިޔާސީ ގޮތުން އެންމެ ތަޖުރިބާކާރު އެއް ބޭފުޅާވެސްމެއެވެ.
ރަނިލް އެންމެ ފުރަތަމަ ސްރީ ލަންކާގެ ބޮޑުވަޒީރުކަމަށް އައްޔަން ކުރެވުނީ، 1993 އިން 1994 ވަނަ އަހަރަށް، އެގައުމުގެ ކުރީގެ ރައީސް، ނަރަސިންގހެ ޕްރެމަދާސާ އަވަހާރަ ކޮށްލެވުމާއި ގުޅިގެންނެވެ.
އެއަށްފަހު، 2015ވަނަ އަހަރު ދެވަނަފަހަރަށް ސްރީ ލަންކާގެ ބޮޑުވަޒީރުކަމަށް ރަނިލް އައްޔަން ކުރެވުނީ، އެގައުމުގެ ރައީސްކަން މައިތިރިޕަލަ ސިރިސޭނާގެ ކޯލިޝަންއަށް ކާމިޔާބު ކުރުމާއި ގުޅިގެންނެވެ. އަދި އެއަށްފަހު، 2018ވަނަ އަހަރު ސިރިސޭނާވަނީ ރަނިލް ބޮޑުވަޒީރުކަމުގެ މަގާމުން ދުރުކުރައްވާފައެވެ. އެހެންނަމަވެސް، އޭގެ 4 މަސްފަހުން، ސިރިސޭނާ އެގައުމުގެ ގާނޫނުހަދާ މަޖިލިސް އުވާލެއްވީ ގާނޫނު އަސާސީއާއި ޚިލާފަށް ކަމަށް އެގައުމުގެ ސުޕްރިމް ކޯޓުން ހުކުމް ކުރުމާއި ގުޅިގެން އަނެއްކާވެސް ސިރިސޭނާ ހަމަ އެއަހަރު ރަނިލް ބޮޑުވަޒީރުކަމަށް އައްޔަން ކުރައްވާފައި ވެއެވެ.
ރަނިލް ބޮޑުވަޒީރުކަމުން އިސްތިއުފާ ދެއްވާފައިވަނީ، 2019ވަނަ އަހަރުގެ ނޮވެމްބަރުމަހު، ޔޫއެންޕީ އެއަހަރު ބޭއްވުނު އާންމު އިންތިޚާބުން ބަލި ވުމާއި ގުޅިގެންނެވެ.
