ޖުލައި މަހުގެ 8 ވަނަ ދުވަހު ހިނގި ހާދިސާއެއްގައި ލިބިވަޑައިގެންނެވި ޒަޚަމްތަކަށް ފަރުވާދެމުން ދަނިކޮށް ޖަޕާނުގެ ކުރީގެ ބޮޑުވަޒީރު ޝިންޒޯ އަބޭ އަވަހާރަވުމާ ގުޅިގެން އެމަނިކުފާނުގެ ހަނދާނުގައި ހުޅުވާފައިވާ ތަޢުޒިޔާގެ ދަފްތަރުގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙް މިއަދު ސޮއިކުރައްވައިފިއެވެ.
ދިވެހިރާއްޖޭގައި ހުންނަ ޖަޕާނުގެ އެމްބަސީގައި ހުޅުވާފައިވާ މި ތަޢުޒިޔާގެ ދަފްތަރުގައި ރައީސުލްޖުމްހޫރިއްޔާ ލިޔުއްވި ބަޔާނުގައި ޝިންޒޯ އަބޭ ސިފަކުރައްވާފައި ވަނީ ޖަޕާނުގެ ކުރިއެރުމާ ތަރައްޤީއަށްޓަކައި ގިނަގުނަ އަގުހުރި މަސައްކަތްތަކެއް ކުރައްވާފައިވާ ދުރުވިސްނިވަޑައިގަންނަވާ ލީޑަރެއްގެ ގޮތުގައެވެ. އަދި، އެމަނިކުފާނަކީ ރާއްޖެއާ ގާތް ގުޅުމެއް ބޭއްވެވި ބޭފުޅެއްކަމަށާއި، ޝިންޒޯ އަބޭގެ ހަނދާންތައް ރާއްޖޭގެ ރައްޔިތުން އަބަދުވެސް އާކުރާނެކަމުގައި އެ ބަޔާނުގައި ރައީސުލްޖުމްހޫރިއްޔާ ލިޔުއްވާފައިވެއެވެ.
އަބޭ އަވަހާރަ ކޮށްލާފައިވަނީ، މިދިޔަ ހަފްތާގެ އާދީއްތަ ދުވަހު އޮތް، ގާނޫނުހަދާ މަޖިލިހުގެ މަތިގޭގެ އިންތިޚާބުގައި ވާދަކުރާ އެލްޑީޕީގެ ކެނޑިޑޭޓުންނަށް އޭނާ ކެމްޕޭން ކުރައްވަން ހުންނަވަނިކޮށް ބަޑިން ހަމަލާ ދީއެވެ.
މިހާދިސާ ތަހުގީގު ކުރަމުންދާ އިންވެސްޓިގޭޓަރުން ވިދާޅުވެފައި ވާގޮތުގައި، ޔަމަގަމީ، އަބޭ އަވަހާރަ ކޮށްލާފައިވަނީ، ޔަމަގަމީގެ މަންމަ ފައިސާގެ ބޮޑު އަދަދެއް ދައްކާފައިވާ ދީނީ ގުރޫޕަކާއި އަބޭއާއި އޮންނަ ގުޅުމުގެ މައްޗަށް އޭނާގެ ހިތުގައި އުފެދިފައި އޮތް ރުޅިވެރިކަމުގެ ސަބަބުންނެވެ.
ކުރުކޮށް "ޔުނިފިކޭޝަން ޗަރޗް" ނަމަކަށް ކިޔާ "ދަ ފެމިލީ ފެޑެރޭޝަން ފޯރ ވާރލްޑް ޕީސް އެންޑް ޔުނިފިކޭޝަންއިން" ބޭއްވި ނޫސްވެރިންގެ ބައްދަލުވުމެއްގައި އެ ޖަމާއަތުން ވަނީ، ޔަމަގަމީގެ މަންމައަކީ އެ ޖަމާއަތުގެ މެމްބަރެއްކަމުގައި ބުނެފައެވެ.
ފުލުހުން މައުލޫމާތު ދީފައިވާ ގޮތުގައި ޔަމަގަމީ އެންމެ ފުރަތަމަ މަރާލަން މަސައްކަތް ކޮށްފައިވަނީ މި ގުރޫޕުގެ އެންމެ އިސް ފަރާތެވެ. އެހެންނަމަވެސް ޔަމަގަމީއަށް ގަބޫލު ކުރެވުނު ގޮތުުގައި އޭނާ މަރާލުމަކީ ފަސޭހަކަމެއް ނޫނެވެ.
ފުލުހުން ގަބޫލުކުރާ ގޮތުގައި އޭނާ އަބޭ އަވަހާރަކޮށްލަން ނިންމާފައިވަނީ، މިގުރޫޕުގެ އެންމެ އިސްފަރާތާއި ގުޅުންއޮތް އޯގަނިޒޭޝަންއިން ބޭއްވި ބައްދަލުވުމަކަށް، ފާއިތުވި ސެޕްޓެމްބަރުމަހު އަބޭ ރިކޯޑް ކޮށްފައިވާ ވީޑިއޯއެއް ބެލުމަށްފަހުއެވެ. އެއަށްފަހު އޭނާއަށް ގަބޫލުކުރެވިފައިވާ ގޮތުގައި، އަބޭއަކީ މިޖަމާއަތާއި ގުޅުން އޮތް ފަރާތެކެވެ.
ޔުނިފިކޭޝަން ޗަރޗްއިން ހާމަ ކޮށްފައިވާ ގޮތުގައި ޔަމަގަމީއަކީވެސް އަދި ކުރީގެ ބޮޑުވަޒީރު އަބޭއަކީވެސް އެއްވެސް އިރަކު، އެ ޖަމާއަތުގެ މެމްބަރެއްކަމަށް ރެކޯޑުތަކުން ނުދައްކައެވެ.
ފުލުހުންގެ ފަރާތުން ހާމަ ކޮށްފައިވާ ގޮތުގައި، ޔަމަގަމީ، އަބޭގެ ގަޔަށް ފުރަތަމަ ވަޒަން ޖަހާފައިވަނީ އަބޭއާއި 7 މީޓަރު ދުރުގައި ހުރެގެންނެވެ. އަދި ވެނަ ވަޒަން އަމާޒު ކޮށްފައިވަނީ އަބޭއާއި 5 މީޓަރު ދުރުގައި ހުރެފަައެވެ.
