ރާއްޖޭގެ ފަތުރުވެރިކަމުން ފެންނަނީ އުންމީދުން ފުރިގެންވާ މުސްތަގްބަލެއްކަމަށް ޓޫރިޒަމް ދާއިރާގެ ވިޔަފާރިވެރިޔާ އަދި މަޓީގެ ނައިބު ރައީސް ހުސައިން އަފީފް ވިދާޅުވެއްޖެއެވެ.
ރާއްޖޭގެ ފަތުރުވެރިކަމުގެ ސިނާޢަތަށް 50 އަހަރު ފުރުން ފާހަގަ ކުރުމަށް، މަޓީން ބޭއްވި އެވޯޑް ހަފްލާގައި ވާހަކަދައްކަވަމުން އަފީފް ވިދާޅުވީ، ފަތުރުވެރިކަމަކީ އަބަދުވެސް ބަދަލުވަމުންދާ ދާއިރާއެއްކަމަށެވެ. އަދި މި ދާއިރާ ފެންނަނީ އުންމީދުން ފުރިގެންވާ މުސްތަގްބަލެއް ކަމަށާއި، މި ދާއިރާ ކުރިއަށް ގެންދިއުމަށް ރަށްފުށުގެ އުސޫލުތައް ދޫކޮށްނުލުމަށް އަފީފް އިލްތިމާސްކުރެއްވިއެވެ.
އަފީފް ވިދާޅުވީ، އާ ޖީލުގެ މަސައްކަތްތަކާ ދޭތެރޭ ހިތްހަމަ ޖެހިވަޑައިގަންނަވާކަމަށާއި، މި ދާއިރާގައި މަސައްކަތް ކުރާ ޒުވާނުންގެ ފަރާތުން، ކުޅާދާނަ، މަސައްކަތްތައް ފެންނަމުން ދިއުމަކީ ލިބިވަޑައިގަންނަވާ ވަރަށް ބޮޑު އުފަލެއްކަމަށެވެ. ޓޫރިޒަމް ދާއިރާގައި މިހާރު މަސައްކަތް ކުރަމުން އަންނަ ފަރާތްތަކަކީ އެކަމަށް ބޭނުންވާ މަތީ ތައުލީމު ލިބިފައިވާ ފަރާތްތައް ކަމުން، އެ މީހުންގެ މަސައްކަތްތަކުން "ޕްރޮފެޝަނަލް" އުސޫލުތައް ފެންނަކަމަށް ވިދާޅުވެ އަފީފް ތަޢުރީފްކުރެއްވިއެވެ.
ޓޫރިޒަމް ދާއިރާ ކުރިއަށް ގެންދިއުމުުގައި ސަރުކާރުތަކުން ވެސް ވަރަށް ބޮޑު އެހީތެރިކަމެއް ލިބެމުންދިޔަކަން ފާޙަގަކުރައްވާ އަފީފް ވަނީ، ކޯވިޑުގެ ދަތި ހާލަތުގައި ރައީސް އިބްރާހިމް މުހައްމަދު ސާލިޙް ދެއްވި އިރުޝާދުތަކާއި ގެންގުޅުއްވި ތޫނުފިލި ވިސްނުންފުޅަށް ތައުރީފް ކުރައްވާފައެވެ. އެގޮތުން އެމަނިކުފާނުގެ ލީޑާޝިޕާއި އިރުޝާދުގެ ދަށުން މުޅި ޤައުމު އެކަތިގަނޑަކަށް ހައްދަވައި ކޯވިޑާ ދެކޮޅަށް މަސައްކަތް ފެށިކަން އަފީފް ފާހަގަކުރެއްވިއެވެ. މިކަމުން ޕްރައިވެޓް ސެކްޓަރއާއި ސަރުކާރުގެ ގުޅުމުގެ ލާމަސީލް މިސާލެއް ދައްކުވައި ދިން ކަމަށް އަފީފް ވިދާޅުވިއެވެ.
މި ހަފްލާގައި ޓޫރިޒަމް ދާއިރާ ކުުރިއަރުވަން ކުރީގެ ރައީސް އިބްރާހިމް ނާސިރު އަދި ކުރީގެ ރައީސް މައުމޫން އަބްދުލް ގައްޔޫމު ކުރެއްވި މަސައްކަތްތައް ފާހަގަކޮށް ހާއްސަ އެވޯޑެއް ދީފައިވެއެވެ އަދި ޓޫރިޒަމްގެ ހަތަރު ޕައިނިއަރުންނަށް އެވޯޑު ދީފައިވެއެވެ. މީގެ އިތުރުން ޓޫރިޒަމް ދާއިރާގެ އިންވެސްޓަރުންނާއި ޓުއާ އޮޕަރޭޓަރުންނާއި އެއާލައިންތައް ހިމެނޭ ގޮތަށް ޖުމްލަ 57 އެވޯޑެއް ދީފައިވެއެވެ.
