އެމޯޖީ އަކީ މިހާރު އެންމެން ވެސް ބޭނުން ކުރާ އެއްޗެކެވެ. ކުދި ބޮޑު އެންމެން އަދި ޒުވާން ކުދިންނާއި އުމުރުން ދުވަސްވީ މީހުންގެ މެދުގައިވެސް މަގުބޫލު އެއްޗެކެވެ.
ހާއްސަކޮށް ސޯޝަލް މީޑިއާގައި އެމޯޖީ އަކީ ވަރަށް ނުފޫޒު ގަދަ އެއްޗެކެވެ. މިހާރު މަޑުމަޑުން ބަހުރުވައިގެ ގޮތުގައި އެމޯޖީ އަންނަނީ މީހުންގެ މެދުގައި ވަކި ހިއްޕާލަމުންނެވެ. އިއްޔެއަކީ ދުނިޔޭގައި ފާހަގަ ކުރާ އެމޯޖީ ޑޭއެވެ.
17 ޖުލައި އަކީ ކޮންމެ އަހަރަކުވެސް ފާހަގަ ކުރާ އެމޯޖީ ޑޭއެވެ. އެމޯޖީޕީޑިއާގެ ނަމުގައި އެމޯޖީ ތައާރަފް ކުރީ ޖެރެމީ ބާޖްއެވެ. އެމޯޖީ އަކީ ހިޔާލު ފާޅު ކުރުމާ ޝުއޫރު ފާޅުކުރުމާ އިހުސާސްތަށް ފާޅުކުރުމަށްވެސް އެފަދަ ދެވަނައެއް ނެތް އެއްޗެކެވެ.
ސޯޝަލް މީޑީއާ ވަކި ހިއްޕާލައިފާވާ ދުނިޔޭގައި އެމޯޖީއަކީ މިހާރު ވަރަށް އާންމު އެއްޗަކަށް ވަނީ ވެގެން ގޮސްފައެވެ. އެކި ބަހުރުވަ ތަކުން ވާހަކަ ދައްކާ މީހުންގެ މެދުގައި އެމޯޖީ ވަނީ އެންމެންނަށް އެނގޭ ބަހަކަށް ވެގެން ގޮސްފައެވެ.
އެންމެ ގިނަ މީހުންގެ މެދުގައި އެންމެ ހިނގާ، އަދި އެންމެ ގިނައިން ބޭނުން ކުރާ ފަސްވައްތަރުގެ އެމޯޖީ އަކީ:
ލައުޑްލީ ކްރައިން ފޭސް
ރީނދޫ ކުލައިގެ މޫނެއްގައި ލޮލުން ހޯސްލާފައި ކޯރެއްހެން ފެން އަންނަ ގޮތަށް އިންނަ މި އެމޯޖި އަކީ ގިނަ ބަޔަކު ބެނުން ކުރާ އެއް އެމޯޖީއެވެ. ރޯހެން ހީވާ މި އެމޯޖީ އަކީ މީހުންނަށް އޮޅުވާލުމަށް ބޭނުން ކުރާ އެއްޗެކެވެ. އަދި މި އެމޯޖީ އަކީ ވަރަށް ޕޮޒިޓިވް ވައިބެއް ދޭ އެމޯޖީއެއް ކަމަށް ވެއެވެ.
ފޭސް ވިތު ޓިއާސް އޮފް ޖޯއީ
މިއީ އުފަލުން ގޮސް ރޮވޭ ކަހަލަ ގޮތަކަށް ދައްކުވައިދޭ އެމޯޖީއެކެވެ. ވަރަށް އުފާ ވުމުން ނުވަތަ ވަރަށް މަޖާ ވުމުން މި އެމޯޖި ބެނުން ކުރެއެވެ. މީ އަނެކާއަށް ތިބާ ވެފައި ހުރި އުފާ ދެއްކުމަށް ވެސް ބޭނުން ކުރާ އެމޯޖީއެކެވެ.
ރެޑް ހާޓް
ރަތްކުލައިގެ މި ހިތަކީ ލޯބި ދައްކުވައިދޭ އެމޯޖީއެކެވެ. ލޯބިވެރިންގެ މެދުގައި ވަރަށް ގިނައިން ބަދަލުކުރާ މި އެމޯޖީ އަކީ ލޯބީގެ ކޮންމެ ހާލަތަކާއި ވެސް ގުޅޭ އެމޯޖީއެވެ.
ރޯލިން އޮން ފްލޯ ލާފިން
މީ އުފަލުންގޮސް ރޮވޭ އެމޯޖީ ފަދަ އިމޯޖީއެކެވެ. މި އިމޯޖީގެ ބޯ އިންނަނީ އެއް އަރިއަކަށެވެ. މި އެމޯޖީ އާންމުކޮށް ބޭނުން ކުރަނީ ހިނި އައިސްގެން ފަޅައިގެން ދާކަހަލަ ހާލަތް ތަކުގައެވެ.
ޕްލީޑިން ފޭސް
ބޮޑު ދެލޮލާއި އެކު އަންގަ ހުޅުވިފައި އިންނަ މި އެމޯޖީ ގިނަ ހާލަތް ތަކުގައި ބޭނުން ކުރެއެވެ. ކަންބޮޑު ވެފައި އިންނަ ފަދަގޮތަކަށް އިންނަ މި އެމޯޖީ އިން، އުފާ ނުވާ ކަމަށާއި ދެރަވެފައި އިންނަކަން ދައްކުވައިދިނުމަށް ބޭނުން ކުރެއެވެ. އަދި އަނެއްކޮޅުން އަޅާލުމާއި އޯގަތެރި ކަން ދެއްކުމަށްވެސް މި އެމޯޖީގެ ބޭނުން ކުރެއެވެ.
ތިން ހާހައް ވުރެ ގިނަ އެމޯޖީ މިހާރު ހުރިއިރުގައި ހުސް އެމޯޖީ އިން ވާހަކަ ދެއްކުމަކީ ގިނަ ބައެއްގެ މެދުގައި މަގުބޫލު ވަމުން އަންނަ ކަމެކެވެ.
ތިބާ އެންމެ ގިނަ އިން ބޭނުން ކުރަނީ ކޮން އެމޯޖީއެއް ހެއްޔެވެ؟؟
