މާފުށީ ޖަލަށް ވަގަށް ވަންނަން މަސައްކަތްކުރި މީހަކު ޖަލަށްލާން ކްރިމިނަލް ކޯޓުން ހުކުމްކޮށްފިއެވެ.
މާފުށީ ޖަލަށް ދަންވަރުގެ ވަގުތެއްގައި ވަގަށް ވަންނަން މަސައްކުރީ ދެމީހެކެވެ. އޭގެ ތެރެއިން އެކަކު ހަތަރު މަހާއި ސައުވީސް ދުވަހަށް ޖަލަށް ލާން ހުކުމްކޮށްފައިވާއިރު، އަނެއް މީހާ ވަނީ 53،600 ރުފިޔާއިން ޔޫރިމަނާކޮށްފައެވެ. މިމައްސަލާގައި ޖަލަށް ވަގަށް ވަންނަން މަސައްކަތް ކުރީ ރ.މަޑުއްވަރީ، ފަހިއަލި، އިސްމާއިލް ހައްމާދު އާއި، ނ.މަނަދޫ، ކެރީބިއަން، އިބްރާހިމް ޖަޒުލާންއެވެ. މީގެ ތެރެއިން ޖަލަށްލާން ހުކުމްކުރީ ހައްމާދުއެވެ.
މިދެމީހުން ވަގަށް ޖަލަށް ވަނުމަށް މަސައްކަތް ކޮށްފައިވަނީ 2019 ވަނަ އަހަރުގެ ތެރޭގައައި، މާފުށީ ޖަލުގެ އިރު ދެކުނު ފަރާތުންނެވެ. އެދެމީހުން އެސަރަހައްދައް ވަދެފައިވަނީ ޑިންގީއެއްގައެވެ. އެސަރަހައްދަކީ އެފަދަ އުޅަދުތައް ވަނުން މަނާ ސަރަހައްދެއްކަން އެނގޭ ގޮތަށް ބޯޑުވެސް ކަރެކްޝަނުން ވަނީ ބަހައްޓާފައެވެ. މިމީހުން ޑިންގީ އެސަރަހައްދުގެ ބޭރުގައި ބޭއްވުމަށް ޖަލަށް ވަންނަން މަސައްކަތް ކުރީ ފަތާފައި އެހިސާބަށް ގޮސްގެންނެވެ.
މިދެމީހުން ޖަލަށް ވަނުމަށްޓަކައި، ޖަލުގެ ޖަލުގެ ފާރުމަތީގައި ތިއްބާ ފުލުހުންނަށް ފެނުމުން ފިލަން ވަނީ މަސައްކަތްކޮށްފައެވެ. ނަމަވެސް ފުލުހުން ވަނީ އެސަރަހައްދުން އެމީހުން ހައްޔަރުކޮށްފައެވެ. މިމައްސަލާގައި ދައުލަތުން ހުށަހެޅި ހެކީންގެ ހެކިބަހުން ކުށް ސާބިތުވާކަމަށް މައްސަލަ ބައްލަވާ ޤާޒީ ވަނީ ނިންމާފައެވެ. މިދެމީހުންގެ ތެރެއިން ޖަލުހުކުމް އިއްޔެ ހައްމާދު ޖަލުގައި ހޭދަކުރި، މުއްދަތު އުުނިކުރުމުން ހުކުމުން ދެން ތަންފީޒު ކުރަންޖެހެނީ 4 މަހާއި 6 ދުވަހެވެ.
މައްސަލައިގައި ދެން ދައުލަތުން ދައުވާކޮށްފައިވާ ޖަޒުލާން އޭނާގެ ބަންދު ޖޫރިމަނާ އަދަބަކަށް ބަދަލުކޮށްދިނުމަށް އެދުމުން ކޯޓުން ވަނީ އޭނާގެ މައްޗަށް 53،600 ރުފިޔާގެ ޖޫރިމަނާ ހުކުމެއް އިއްވާފައެވެ. އަދި އެ ފައިސާ ހަ މަސް ދުވަހުގެ ތެރޭގައި މީރާއަށް ދެއްކުމަށް ވެސް ވަނީ ހުކުމްކޮށްފައެވެ.
