އެމެރިކާގެ ރައީސް ޖޯ ބައިޑްން މެދުއިތުމައްޗަށާއި އަރަބި ބައްރަށް ކުރައްވަމުން ގެންދަވާ ދަތުރުފުޅުގައި މިއަދު ސައުދީ އަރަބިއާގެ ވަލީ އަހުދު މުއްމަދު ބިން ސަލްމާން (އެމްބީއެސް)އާއި އެކީ ބޭއްވުނު ބައްދަލުވުން ކުރިޔަށް ދިޔައީ، މަރާލާފައިވާ ސައުދީ ޖާރނަލިސްޓް ޖަމާލް ޚަޝޯގީ މަރުގެ ހިޔަނި އެޅިގެން ކަމުގައި މީޑިއާތަކުން ރިޕޯޓު ކޮށްފިއެވެ.
މިއަދު ސައުދީ އަރަބިއާގެ ޖިއްދާގައި ބައިޑްން ސައުދީ ވަލީ އަހުދު މުހައްމަދު ބިން ސަލްމާންއާއި ބައްދަލުކުރައްވާ، ޖަމާލް ޚަޝޯގީ މަރާލާފައިވާ ވުމަކީ އެމެރިކާއިން ބަލައިގަންނާނޭ ކަމެއް ނޫންކަމުގައި އެމްބީއެސްއަށް ދެންނެވިކަމަށް، ބައްދަލުވުމަށްފަހު ބައިޑް ނޫސްވެރިންނާއި ބައްދަލު ކުރައްވާ ވިދާޅުވެފައި ވެއެވެ. އަދި އެމެރިކާގެ ޖާސޫސީ އިދާރާއިން ކުރި ތަހުގީގުން މި ޖަރީމާ ހިންގާފައިވަނީ، އެމްބީއެސް ހުއްދަ ދީގެން ކަމަށް ދައްކާފައިވާކަމަށްވެސް އެމްބީއެސްގެ އަރިހުގައި ބައިޑްން ދެންނެވި ކަމަށްވެސް ފަހުން ވިދާޅުވެފައި ވެއެވެ.
ބައިޑްންގެ ވާހަކަތަކުގެ ރައްދުގައި، ޚަޝޯގީގެ މަރުގެ ޒިންމާ އަމިއްލަފުޅު ގޮތުން އުފުއްލަވަން ޖެހިވަޑަގަންނަވާނޭ ކަމަށް ގަބޫލު ނުކުރައްވާނޭކަމަށް ބައިޑްއަށް މުހައްމަދު ބިން ސަލްމާ ދެނެވި ކަމަށް ބޭރުގެ ބައެއެއް މީޑިއާތަކުން ރިޕޯޓު ކޮށްފައި ވެއެވެ.
އަދި މި ޖަރީމާގައި އަމަލީ ގޮތުން ޝާމިންވި ފަރާތްތަކަށް މިހާރު ހައްގު އަދަބު ދަނީ ދެވެމުންކަމަށްވެސް އެމްބީއެސް ބައިޑްންއަށް ދެނެވިކަމަށްވެސް ބޭރުގެ މީޑިއާތަކުން ރިޕޯޓު ކޮށްފައި ވެއެވެ.
ތުރުކީގައި ހުންނަ އެމެރިކާގެ އެމްބަސީގައި ޖަމާލް ޚާޝޮގީ މަރާލާފައިވަނީ މުހައްމަދު ބިން ސަލްމާންގެ އަމުރަށްކަމަށް އެމެރިކާގެ ޖާސޫސީ އިދާރާ ސީއައިއޭއިން ހިންގި ތަހުގީގަށްފަހު އެ މުވައްސަސާއިން ވަނީ ނިންމާފައެވެ.
އަދި ފާއިތުވެދިޔަ ރިޔާސީ ކެމްޕޭންގައި ބައިޑްން ވިދާޅުވެފައިވަނި ޚާސޮގީ މަރާލި މީހުން ޒިންމާދާރު ކުރުވާނެ ކަމުގައެވެ. އަދި ބައިޑްން ވިދާޅުވެފައިވަނީ މި ޖަރީމާއަށް ސައުދީ ޖަވާބުދާރީ ނުވެއްޖެނަމަ އެގައުމު ދުނިޔެއިން އެކަހެރި ކުރައްވާނޭ ކަމުގައެވެ.
އެހެންނަަވެސް، ވެރިކަމުގެ 3 ވަނަ އަހަރު ސައުދީއަށް ކުރައްވާ ދަތުރުފުޅުގައި ބައިޑްން މުހައްމަދު ބިން ސަލްމާންއާއި ބައްދަލު ކުރައްވާތީ އެމެރިކާގެ ސިޔާސީ މަސްރަހުގައިވެސް ބައިޑްންއަށް ވަނީ ފާޑުކިއުން އަމާޒުވެފައެވެ.
