ހޯމް މިނިސްޓަރަކަށް ދީނީ އިލްމުވެރިޔަކު ހުންނަވައިގެން ހައްގަކާއި ނުލައި ދެޢިލްމުވެރިންނަށް މުދަތުޖެހުމަކީ ހުތުރުކަމެއް ކަމުގައި ދީނީ އިލްމުވެރިޔާ ޝައިޚު އަހުމަދު ސަމީރު ވިދާޅުވެއްޖެއެވެ.

ޝައިޚު ސަމީރު މިހެން ވިދާޅުވީ، ޔޯގާ ހަރަކާތާއި ގުޅިގެން ހިނގައިދިޔަ ހަމަނުޖެހުންތަކުގެ ތުހުމަތުގައި ދީނީ ދެ ޢިލުމުވެރިން ކަމުގައިވާ، ޝައިޚު ނިޝާންއާއި، ޝައިޚު ފަޒުލޫން ބަންދުން ދޫނުކޮށްލައި، ވާނުވާގައި އެތައް ދުވަހު ބައިތިއްބާތީ އެކަމުގެ ކަންބޮޑުވުން ފާޅު ކުރައްވައި ކުރެއްވި ޓުވީޓެއްގައެވެ.

ދެފަހަރެއްގެ މަތީން ޝައިޚުންގެ ބަންދުގެ މުއްދަތު އިތުރުކޮށްފައިވާއިރު، މިހާތަނަށް ޝައިޚުން މިކަމުގައި އަދާކުރި ދައުރެއް ފުލުހުންވެސް އަދި ކަމާއި ގުޅުންހުރި އެހެން އިދާރާއަކުންވެސް ވިދާޅުވެފައި ނުވެއެވެ. ޝައިޚު ސަމީދު ވިދާޅުވީ ރާއްޖޭގެ ހޯމް މިނިސްޓަރަކަށް ދީނީ އިލްމުވެރިޔަކު ހުންވައިގެން ރާއްޖޭގެ ދީނީ ދެ އިލްމުވެރިޔަކަށް އެއްވެސް ހައްގަކާއި ނުލައި ބަންދުގެ މުއްދަތު ޖަހަމުންދާތަން ބަލަން ހުރުމަކީ ހުތުރުކަމެއްކަމަށެވެ.

ޔޯގާ ފަތުރަން ގަދަބާރު ދައްކަމުންދާ ބޭރު ޤައުމެއްގެ ނުފޫޒަށް 2 ޝައިޚުންގެ ބަންދުގެ މުއްދަތު، ހައްގަކާއި ނުލައި ދިކޮށް، ދެމެހެއްޓުމަށް ކޯޓުގައި، އެދެމުންދާ ދިއުމަކީ ހޯމް މިނިސްޓަރަކަށް ދީނީ އިލްމުވެރިޔަކު ހުންނަވައިގެން ކުރައްވަން ހުތުރުކަން ބޮޑުވެގެންވާ ކަމެއް.

– ޝައިޚު ސަމީރު ވިދާޅުވިއެވެ.

ޢިމްރާނަށް ގިނަ ބައެއް ފާޑުކިޔުން އަމާޒުވީ، ޔޯގާ ހަރަކާތަށް ހުރަސްއަޅައި ހަމަނުޖެހުން ހިންގިކަމުގެ ތުހުމަތުގައި ދީނީ ޢިލްމުވެރިންތަކެއް ހައްޔަރުކޮށް ބަންދަށް ގިނަ ދުވަސްތަކެއް ޖަހާފައިވީނަމަވެސް، އެއްޖިންސުން ގުޅުންހިންގި މައްސަލާގައި ތުހުމަތުކުރެވޭ މީހުން ހައްޔަރުކޮށްފައިނުވާތީއެވެ.

ފާޑުކިޔުންތަކަށް ރައްދުދެއްވައި އިމްރާން ރޭ ކުރެއްވި ޓުވީޓެއްގައި ވިދާޅުވީ ހަގީގަތަކީ ބަޔަކަށް ގަބޫލުކުރެވުނަސް ނުކުރެވުނަސް ވޭތުވެދިޔަ 3 އަހަރާއި ބަޔަށް ނުވަތަ 2005 އިން ފެށިގެން މިހާތަނަށް ބެލިނަމަވެސް އަދާލަތުގެ ޢިލްމުވެރިންނަށްވުރެ ބޮޑަށް ދީނަށް ޚިދުމަތްކުރި ޕާޓީއެއް ނުވަތަ ޖަމާޢަތެއް މިރާއްޖޭގައި ނޯންނާނެކަމަށެވެ.

ޢިމްރާންގެ މި ޓްވީޓައި ގުޅިގެންވެސް ގިނަ ބަޔަކު ވަނީ އެމަނިކުފާނަށް ފާޑުވިދާޅުވެފައެވެ. ދީނީ ކަންކަމުގެ ހިމާޔަތުގައި އަދާލަތު ޕާޓީ އުފެދުނުނަމަވެސް، އެޕާޓީ ބޮޑަށް ހަރަކާތްތެރިވަމުން އަންނަނީ ސިޔާސީ ކަންކަމުގައިކަމަށް ގިނަ ބަޔަކު ބުނެއެވެ. މިފަހުން ރާއްޖޭގައި ދީނާއި ޚިލާފް އެތައް ކަމެއް ހިނގައިގެންދާއިރުވެސް މީގެ ކުރިން އަދާލަތު ޕާޓީގެ ޢިލްމުވެރިން އަދާކުރަމުންދިޔަ ދައުރު އަދާކުރަން ނުފެނެއެވެ.