ސްރީލަންކާގެ ރައްޔިތުންގެ ކިބައިން އެމްޑީޕީ ސަރުކާރުން މައާފަށް އެދެންޖެހޭކަމަށް ޕީއެންސީގެ ނާއިބު ރައީސް އަދި މަޑުއްވަރީ ދާއިރާގެ މެންބަރު އާދަމް ޝަރީފް ޢުމަރު ވިދާޅުވެއްޖެއެވެ. އޭނާ މިހެން ވިދާޅުވީ ލަންކާގެ ރައީސް ގޮޓަބަޔާ ރާޖަޕަކްސަ ފިއްލަވައިގެން ރާއްޖެ އައި ޖެޓު ވެލާނާ އިންޓަރނޭޝަނަލް އެއަރޕޯޓްގައި ޖެއްސުމުގެ ހުއްދަ ދެއްވީ ރައްޔިތުންގެމަޖިލީހުގެ ރައީސް މުޙައްމަދު ނަޝީދުކަމަށް ބުނާ ވާހަކަތަކާއި ގުޅިގެންނެވެ. މިކަމާއި ގުޅިގެން ގިނަ ބައެއްގެ ފާޑުކިޔުން ރައީސް ނަޝީދަށް އަމާޒުވެފައިވަނީ އެ ހުއްދަ ދެއްވީ ކޮން ހައިސިއްޔަތަކުންތޯ ސުވާލު އުފައްދަމުންނެވެ.

އާދަމް ޝަރީފް ވިދާޅުވީ، އެކުވެރި ސްރީލަންކާގެ ހާލުގައިޖެހި، ރުޅިގަދަވެފައިވާ ރައްޔިތުންގެ މޫނުމަތީ ސަރުކާރުން ޖެހީ ތަފާލަކުންކަމަށެވެ. މިއީ ވަރަށް ޒިންމާދާރުކަންކުޑަ ހުތުރު އަމަލެއްކަމަށް ސިފަކުރައްވާ އާދަމް ޝަރީފް ވިދާޅުވީ، ބާރުގަދަވާނީ ރައްޔިތުންކަމަށާއި، ލަންކާ ރައްޔިތުންކިބައިން އެމްޑީޕީ ސަރުކާރުން މައާފަށް އެދެންޖެހޭނެކަމަށެވެ.

Ekuveri Sri Lanka ge haalugai jehi, rulhigadhavefaivaa rayyithunge moonumathee sarukaarun mijehee thafaalakun. Miee varah zimmaadhaarukan kuda, huthuru amaleh!
Baaru gadhavaanee rayyithun. Sri Lanka rayyithunge kibain MDP sarukaarun maa'afah edhen jeheyne! https://t.co/HGxUwcrUFm

— Adam Shareef Umar (@Adamshareefz) July 13, 2022

ލަންކާގެ ރައީސް ރާއްޖެ ވަޑައިގަތުމަށްފަހު ރޭ ސިންގަޕޫރަށް ފުރައިވަޑައިގަންނަވާނެކަމަށް އަޑުތައް ފެތުރުނުނަމަވެސް، މިހާތަނަށް ފުރައިވަޑައިގެންފައިނުވާކަމަށް މިޑިއާ ޚަބަރުތައް ބުނެއެވެ. ލަންކާގެ ރައީސް އިސްތއިފާދެއްވާނެކަމަށް ވިދާޅުވިނަމަވެސް މިހާތަނަށް އިސްތިއުފާ ދެއްވާފައެއްނުވެއެވެ. ނަމަވެސް ރައީސްކަމުގެ ބާރުތައް ވަނީ ބޮޑުވަޒީރާ ހަވާލުކުރައްވާފައެވެ.

ސްރީލަންކާގެ އިޤްތިޞާދީ ހާލަތާ ގުޅިގެން ވެރިރަށް ކޮލަމްބޯގައި ފެށި މުޒާހަރާތަކުގެ ބައިވެރިން ރިޔާސީ ގަނޑުވަރަށް ވަދެ އެ ތަން ހިސާރު ކުރުމާ ގުޅިގެން ރާޖަޕަކްސަ ވަނީ އިސްތިޢުފާ ދެއްވައި، އައު ސަރުކާރެއް އެކުލަވައިލުމަށް ފުރުޞަތު ދެއްވާނެ ކަމުގައި ވިދާޅުވެފައެވެ. ނަމަވެސް، އޭގާ ކުރިން، އޭނާ މި ވަނީ ފިއްލަވައިގެން ފުރާވަޑައިގަންނަވާފައެވެ. އޭނާއާއެކު އަނބިކަނބަލުންނާއި ދެ ހަށިފާރަވެރިން ދަތުރު ކުރި ކަމުގައި ރޮއިޓަރސްއިން ބުނެފައިވެއެވެ.

ސްރީލަންކާގެ ބޭރު ފައިސާގެ ރިޒާވް ހުސްވެ، އެ ޤައުމުގެ އިޤްތިޞާދު ފުން ވަޅުގަނޑަކަށް ވެއްޓިފައި މި ވަނީ ރާޖަޕަކްސަގެ ޢާއިލީ ވެރިކަމުގެ ނާގާބިލު ކަމުން ކަމުގައި ސްރީލަންކާގެ ގިނަ ރައްޔިތުން ދެކެއެވެ. އެ ޤައުމުން ތެލާއި ކާބޯތަކެތީގެ ބާވަތްތައް ހުސްވެ، އެ ތަކެތި ހޯދުމަށް އެ ޤައުމުގެ ރައްޔިތުން ދަނީ ބޮޑެތި ތަކުލީފުތަކެއް އުފުލަމުންނެވެ. މިކަމާ ގުޅިގެން ހުކުރު ދުވަހު ފެށި ސިލްސިލާ މުޒާހަރާތަކާ އެކު މުޒާހަރާގެ ބައިވެރިން ވަނީ ރިޔާސީ ގަނޑުވަރާއި ބޮޑުވަޒީރުގެ ގެކޮޅަށް ވެސް ވަދެ އެ ތަންތަން ހިސާރު ކޮށްފައެވެ.

ސްރީލަންކާގެ ހާލަތު ގޯސްވެ ކުރިމަތިވި ފާޑުކިޔުންތަކާއި މުޒާހަރާތަކާ ގުޅިގެން ރައީސް ގޮތަބަޔާ ރާޖަޕަކްސްގެ ބޭބޭފުޅު މަހިންދަ ރާޖަޕަކްސް ވަނީ މޭ މަހުގެ ތެރޭގައި ބޮޑުވަޒީރުގެ މަޤާމުން އިސްތިޢުފާ ދެއްވާފައެވެ. އޭނާ މި ވަގުތު ހުންނެވީ ކޮލަމްބޯގައެވެ. އަދި، ކުރީގެ މާލީ ވަޒީރު ކަމުގައިވާ ބަސިލް ރާޖަޕަކްސަ ފިއްލަވައިގެން ޤައުމު ދޫކޮށް ވަޑައިގަންނަވަން އުޅެނިކޮށް ވަނީ ހުއްޓުވާފައެވެ.