ރައްޔިތުންގެ ހައްގުގައި މަސައްކަތް ކުރުމަށް މާތް ރަސްކަލާންގެ ގަންދީ ހުވާކޮށްގެން ތިއްބަވާ ބޭފުޅުން ކޮށްގެން ތިއްބެވި ހުވައަކީ ކުޅޭކުޅޭ އެއްޗެއްކަމަށް ހީކޮށްގެން ނުވާނެކަމަށް ދީނީ އިލްމުވެރިޔާ ޑރ.މުހައްމަދު އިޔާޒު ވިދާޅުވެއްޖެއެވެ.

ދެޖިންސުގެ މީހުންގެ ވަނާތައް ފާޅުކޮށް، މީހުން ދިރިއުޅޭ ރަށެއްގައި ބޭއްވުމަށް މަސައްކަތް ކުރަމުންދާ ބޮޑީބިލްޑިން މުބާރާތާއި ގުޅިގެން އެމްޑީޕީގެ ޕާލިމަންޓްރީ ގްރޫޕްގެ މެމްބަރު އަލީ އާޒިމް ދެއްކެވި ވާހަތަކާއި ގުޅިގެން ޑރ.އިޔާޒު ވަނީ ގިނަ ކަންތައްތަކެއް ފާހަގަ ކުރައްވާފައެވެ.

ދީނީ އިލްމުވެރިޔާ ޝައިޚު ޝަފީޢުގެ ވާހަތަކާއި ގުޅިގެން އާލީ އާޒިމް ވަނީ ރާއްޖޭގައި ކުޅޭ ކުޅިވަރުތަކާއި، ކުރާ މަޖަލަކީ މުޅިން ހަރާން ކަންތައްތޯ ސުވާލު ކުރައްވާފައެވެ. ވަކިވަކި ކަންކަމަށް އަލި އަޅުވާލައި އާޒިމް ވިދާޅުވީ ފުރަތަމަ ގޯސްކަމަށް ވާހަކަ ދެއްކީ ލަވަޔާއި، މިޔުޒިކު ކަމަށާއި، އެއަށްފަހު ޔޯގާއާއި، އެނޫންވެސް ކުޅިވަރުތައް ކަމަށެވެ. އަދި މިހާރު ބޮޑީ ބިލްޑިން މުބާރާތަށް ފާޑުކިޔާއިރު، ކުރިއަށް އޮތްތަނުގައި ފުޓުބޯޅަވެސް މިލިސްޓުގައި ހިމެނިދާނެ ކަމާއިމެދު އާޒިމް ވަނީ ސުވާލު އުފައްދަވާފައެވެ.

އާޒިމްގެ ސުވާލަށް ޖަވާބު ދެއްވަމުން ޑރ.އިޔާޒު ވިދާޅުވީ އިސްލާމް ދީނުގައި ކުޅިވަރު ހަރާމް ނުވާނެކަމަށެވެ. ނަމަވެސް އިސްލާމްދީނުގައި ކުޅިވަރު ކުޅުމުގައި ވަކި ހުދޫތަކެއް އޮންނަ ކަމަށާއި، ހިންދޫދީނުގެ އަޅުކަމެއް އިސްލާމީ މުޖުތަމަޢެއްގެ ތެރޭގައި ފެތުރުން ހުއްދަ ނުވާނެކަމަށެވެ. ހަމަ އެހެންމެ އިސްލާމްދީން ކަނޑައެޅިގެން ހަރާމް ކުރައްވާފައިވާ އެއްޖިއްސުން ގުޅުން ހިންގުންފަދަ ކުޅިވަރުތައްވެސް ހުއްދަ ނުވާނެކަމަށެވެ.

އިސްލާމްދީނުގައި ކުޅިވަރު ޙަރާމެއް ނޫނެވެ. ނަމަވެސް ކުޅިވަރުގެ ނަމުގައި ހިންދޫދީނުގެ އަޅުކަމެއް އިސްލާމީ މުޖުތަމަޢެއްގެ ތެރޭގައި ފެތުރުން ހުއްދައެއް ނޫނެވެ. ހަމައެހެންމެ, ކުޅިވަރެކޭ ކިޔާފައި އެއްޖިންސުން ގުޅުން ހިންގުންފަދަ ފާޙިޝްޢަމަލުތަކަށް ހިތްވަރުދީ ފެތުރުންވެސް ހުއްދައެއްނޫނެވެ.

– ޑރ.އިޔާޒު ވިދާޅުވިއެވެ.

އިޔާޒުގެ މިވާހަތަކާއި ގުޅިގެން އާޒިމް ވިދާޅުވީ އެއްޖިއްސުން ގުޅުން ހިންގި މައްސަލަ ކުށްވެރި ކުރާކަމަށެވެ. ނަމަވެސް ރާއްޖެއަކީ ކަންދަހާރަށް ނެހެދޭކަމަށެވެ.

ތިޔަކަންވެސް ކުށްވެރި ކުރަން. އެކަމުގެވެސް މި ރާއްޖެ ކަންދަހާރަކަށް ނުހެދޭނެ.

– އާޒިމް ވިދާޅުވިއެވެ.

އާޒިމްގެ މިވާހަތަކަށް ރައްދު ދެއްވައި އިޔާޒު ވިދާޅުވީ ރާއްޖެއަކީ ސައްތައިން ސައްތަ މުސްލިމު ޤައުމަކަށްވާއިރު، ރާއްޖެއަކީ ޔޫރަޕާއި، އަފްޢާނިސްތާނަށްވެސް ނެހެދޭނެކަމަށެވެ. ރާއްޖޭގައި ކުރެވޭ ކޮންމެ ކަމެއް ކުރަންވާނީ އިސްލާމީ އުސޫލުތަކުގެ ތެރެއިންކަމަށް އިޔާޒު ވިދާޅުވިއެވެ. އަދި މިކަންކަން ނެހެޓުމުގައި ގަންދީ ހުވާ ކޮށްގެން ތިއްބެވި ބޭފުޅުން ޚާއްސަ ސަމާލުކަން ދޭންޖެހޭކަމަށް އިޔާޒު ވިދާޅުވިއެވެ.

މިއީ ދިވެހިރާއްޖެ. ޤާނޫނީ ގޮތުން 100% މުސްލިމް ޤައުމެއް. އަފްޣާނިސްތާނެއް އަދި ޔޫރަޕެއްވެސް ނޫން. އިސްލާމީ އުޞޫލުތަކަށް ތަބާވާންޖެހެނީ ހަމައެކަނި ގަންދަހާރަކުއެއް ނޫން. ވީކޮންމެ ތަނެއްގައި. ޚާއްޞަގޮތެއްގައި މަނިކްފާނު ކުރައްވައިގެން ހުންނެވިފަދަ ހުވާ ކުރައްވައިގެން ތިއްބެވި ބޭފުޅުން ސަމާލުވާންޖެހޭ. ހުވަޔަކީ ކުޅޭކުޅޭ އެއްޗެއް ކަމަށް ހީނުކުރައްވާތި.

– އިޔާޒު ވިދާޅުވިއެވެ.

އިސްލާމީ އުޞޫލުތަކަށް ތަބާވާންޖެހެނީ ހަމައެކަނި ގަންދަހާރަކުއެއް ނޫން. ވީކޮންމެ ތަނެއްގައި. ޚާއްޞަގޮތެއްގައި މަނިކްފާނު ކުރައްވައިގެން ހުންނެވިފަދަ ހުވާ ކުރައްވައިގެން ތިއްބެވި ބޭފުޅުން ސަމާލުވާންޖެހޭ. ހުވަޔަކީ ކުޅޭކުޅޭ އެއްޗެއް ކަމަށް ހީނުކުރައްވާތި @aliaazim https://t.co/Oo9d67zvPF

— Dr.Mohamed Iyaz (@dr_iyaz) July 12, 2022

އިޔާޒު ވިދާޅުވީ ޢައުރަ ނިވާކޮށްގެން ތިބެވެސް ކުޅިވަރު ކުޅެވިދާނެކަން ދިވެހި ޤައުމީ ފުޓްބޯޅަޓީމުގެ ކުޅުންތެރިންވަނީ ޘާބިތުކޮށްދީފައިވާކަމަށެވެ. އެގޮތުން ރާއްޖޭގައި އުފެދުނު އެންމެ މޮޅު ކުޅުންތެރިޔާ އަލީ އަޝްފާގު އެނަމޫނާ ދައްކަވަމުންދާކަމަށް އިޔާޒު ވިދާޅުވިއެވެ.

ޢައުރަ ނިވާކޮށްގެން ތިބެވެސް ކުޅިވަރު ކުޅެވިދާނެކަން ދިވެހި ޤައުމީ ފުޓްބޯޅަޓީމުގެ ކުޅުންތެރިންވަނީ ޘާބިތުކޮށްދީފައި. މާތްﷲ އެކުޅުންތެރިންނަށް ހެޔޮޖަޒާ ދެއްވާށި. @AliAshfaq07 https://t.co/e6iFYiWzSn

— Dr.Mohamed Iyaz (@dr_iyaz) July 12, 2022

ބޮޑީބިލްޑިންގ ޗެމްޕިއަންޝިފް ރާއްޖޭގައި ބޭއްވުމާއި ދެކޮޅަށް ދީނީ ބައެއް ޢިލްމުވެރިން ދަނީ ޝުޢޫރު ފާޅު ކުރަމުންނެވެ. މިގޮތުން މީގެ ކުރިން ބޮޑީބިލްޑިން ބޭއްވި ވަރަށް ވުރެއް މާގޯސްކޮށް މިފަހަރު މީހުން ދިރިއުޅޭ ރަށެއްގައި މިކަން ކުރުމަކީ ވަރަށް ދެރަ ކަމެއްކަމަށް އިލްމުވެރިން ދަނީ ވިދާޅުވަމުންނެވެ.