މުސްލިމުންގެ ޢީދަކީ، ފާފަތަކުން ދުރުވެ، އެއްބައިވަންތަކަށް މަގު ކޮށާ ދުވަހަކަށް ހެދުމަށް މިއަދުގެ ޢީދު ޚުތުބާގައި ގޮވާލައިފިއެވެ.
މާލެ ސަރަހައްދުގައާއި، ރާއްޖޭގެ ގިނަ ރަށްރަށުގައި ބޮޑު ޖަމާއަތުގައި މިއަދުގެ ޢީދު ނަމާދު ވަނީ ޖަމާއަތުގައި ކޮށްފައެވެ. މިއަދުގެ ޢީދު ޚުތުބާގައި އެންމެ ބޮޑަށް ބާރު އަޅައި ގޮވާލާފައިވަނީ އެއްބައިވަންތަކަން ޤާއިމް ކުރުމަށާއި، އެކުވެރިކަން އާލާކުރުމަށެވެ. ހަމަ މިއާއިއެކު ފާފަތަކުން ދުރުހެލިވެ އިސްލާމީ ރީތި އަދަބުތަކުގެ ތެރޭގައި ޢީދުގެ ހަރަކާތްތައް ފާހަގަ ކުރުމަށް ޚުތުބާގައިވަނީ ގޮވާލާފައެވެ.
ޢީދަކީ މުސްލިމުންނާއި ކޮންމެ އަހަރަކުވެސް ބައްދަލުކުރާ އެންމެ އުފާވެރި ދުވަސްތަކަށްވުމުން އީދުގެ ދުވަސްތަކުގައި އުފާވެރިކަމާއިއެކު މުނިފޫހި ފިލުވުމަކީ އީދުގައި ހުއްދަކުރާ ކަމެއްކަމަށް ޚުތުބާގައި ބުނެފައިވެއެވެ. އީދުގައި އެކަނިވެރިންނާއި، ނިކަމެތި ފަގީރުންގެ މުހުތާދުތައް ފުއްދައި ދިނުމަކީ އެންމެ ބޮޑަށް ބާރުއަޅާ ކަންތައްތައްކަމަށް ޚުތުބާގައި ބުނެފައިވެއެވެ.
ޢީދުގެ އުފާ ފާހަގަކުރާއިރު، މާތް ރަސްކަލާންގެ ހަރާމްކުރައްވާފައިވަ ކަންކަމުން ދުރުހެލުވުމަށް ވަނީ ގޮވާލާފައެވެ. މަސްތުވުމާއި، ޒިނޭކުރުމާއި، މާރާމާރީއާއި، ގޭންގުކުށްތަކުން ދުރުހެލިވެ އިސްލާމީ ރީތި އާދަތަކުގެ ތެރެއިން އީދުގެ އުފާފާހަގަ ކުރުމަށް ޚުތުބާގައިވަނީ ގޮވާލާފައެވެ.
އިސްލާމީ އީދުތަކުގައި އޮތީ އުފާވެރިކަމާއި މުނިފޫހިފިލުވުމެވެ. ހިތްތަކުގެ ސާފުކަމުންނާއި މޫނުތަކުގެ އުފާވެރި ކަމުންނެވެ. އެކަނިވެރިޔާގެ އެކަނިވެރިކަން ފިލުވައިދީގެންނެވެ. ފަގީރު މީހާގެ މުހުތާދުތައް ފުއްދައިދީގެން ނެވެ. ނިކަމެތި މީހާ ބާރުވެރި ކޮށްދީގެންނެވެ.
– ޚުތުބާގައި ބުނެފައިވެއެވެ.
ޢީދު ޚުތުބާގައި ވަނީ އިސްލާމީ އުންމަތުގެ ތެރެއިން ރަސޫލުބޭކަލުންގެ ހަޔާތްޕުޅުގައި އީދު ދުވަސްފާހަގަ ކޮށްފައިވާ ގޮތަށްވެސް އަލި އަޅުވާލާފައެވެ. އެގޮތުން އިބްރާހިމްގެ ފާނާއި އެކަލޭގެ ފާނުގެ ދަރިކަލުން އިސްމާއިލްގެ ފާނަށް ޢީދުގައި ކުރިމަތިކުރެއްވި އިމްތިހާނަށް ވަނީ އަލި އަޅުވާލާފައެވެ. މިފަދަ ކޮންމެ ހާދިސާއަކުން ޢީދުގެ މާތްކަމާއި މަތިވެރިކަން މުސްލިމުންގެ ހިތްތަކަށް ގެންނަންޖެހޭކަމަށް ޚުތުބާގައި ވަނީ ވިދާޅުވެފައެވެ.
އީދުގެ އުފާ ފާޅުކުރާއިރު، ދުނިޔޭގެ އެކި ކަންކޮޅުތަކުގައި ހާލުގައި އުޅޭ މުސްލިމު އަޚުންނާއި އުޚުތުންގެ މަތީން ހަނދާންއާކޮށް، އެމީހުންނަށް ހެޔޮގޮތް މިންވަރު ކުރެއްވުމަށް ދުޢާކުރެއްވުމަކީވެސް ޢީދުގައި ޚާއްސަ އިސްކަމެއް ދޭންޖެހޭކަމެއްކަމަށް ޚުތުބާގައި ވިދާޅުވިއެވެ.
