ބޮލީވުޑްގެ ފިލްމުތަކާއި ބައެއް ޑްރާމާތަކުން ފެނިގެން ގޮސްފައިވާ އެކްޓަރ ރާޖް ބައްބަރު 2 އަހަރަށް ޖަލަށް ލާން މުމްބާއީ ކޯޓުން ހުކުމް ކޮށްފިއެވެ.
ބުރާސްފަތި ދުވަހު މުމްބާއީ ކޯޓުން އޭނާގެ މައްޗަށް ހުކުމް އިއްވާފައިވަނީ ވޯޓުލާ މަރުކަޒެއްގެ އޮފިޝަލަކަށް ހަމަލާދިން މައްސަލައެއްގައެވެ. ނަމަވެސް މިއީ 1996 ވަނަ އަހަރު ހިނގާފައިވާ ކަމެކެވެ. ރާޖްގެ މައްޗަށް އުފުލާފައިވަނީ އާންމު ޙިދުމަތްތެރިއަކަށް އޭނާގެ ޑިއުޓީ އަދާކުރުމަށް ހުރަސް އަޅައި އަނިޔާއެއް ދިން މައްސަލައާއެކު އިތުރު 3 ދައުވާއެކެވެ.
ޖަލު ހުކުމުގެ އިތުރުން ކޯޓުން ވަނީ ރާޖްގެ މައްޗަށް 8500 ރުޕީސްގެ ޖޫރިމަނާއެއް ދެއްކުމަށްވެސް ހުކުމް ކޮށްފައެވެ. ވޯޓުލާ މަރުކަޒުގެ އޮފިޝަލް މި މައްސަލަ ފުލުހުންނަށް ހުށަހަޅާފައިވަނީ 1996 ވަނަ އަހަރު މެއި މަހު ކުރިއަށްދިޔަ އިންތިޚާބެއްގެ ތެރެއިންނެވެ.
ފިލްމީ ތަރިއެއްގެ އިތުރުން ރާޖަކީ އިންޑިއާގެ ސިޔާސީ ލީޑަރެއްވެސް މެއެވެ. އެގޮތުން އިންޑިއާގެ ގާނޫނު ހަދާ މަޖިލީހުގެ ތިރިގެއާއި މަތިގޭގެ މެމްބަރު ކަންވެސް އޭނާ ވަނީ ކޮށްފައެވެ.
2 އަހަރުގެ ޖަލު ހުކުމަށް ފަހު އިންޓަރިމް ބެއިލްގެ ދަށުން އޭނާ މިހާރު ވަނީ ދޫކޮށްލާފައެވެ.
