ރާއްޖޭގައި ހެޔޮ ވެރިކަމެއް ޤާއިމް ކުރުމަށްޓަކައި އެމް.ޑީ.ޕީގެ ބާނީ ކަމުގައިވާ މުޙައްމަދު ލަޠީފު (ގޯގޯ ލަޠީފު) އަކީ ބޮޑު ޤުރުބާނީއެއް ވެވަޑައިގެންނެވި ބޭފުޅެއްކަމުގައި އެމްޑީޕީން ބުނެފިއެވެ.
އެމްޑީޕީން ބުނެފައިވަނީ ލަޠީފު މިދުނިޔެ ދޫކުރައްވައި ވަޑައިގަތުމަކީ ޕާޓީއަށް ލިބުނު ފޫނުބެއްދޭ ވަރުގެ ގެއްލުމެއްކަމަށެވެ. އެމްޑީޕީއަށް އޭނާ ކޮށްދެއްވާފައިވާ ޚިދުމަތްތަކަކީ، އަގު ނުކުރެވޭނެހައި މަތިވެރި ޚިދުމަތްތަކާއި، އަދި ގެއްލިގެން ދިޔައީ، ޕާޓީގެ ދެމިއޮތުމަށް މިންނެތް މަސައްކަތްތަކެއް ކޮށްދެއްވި އަގުހުރި ފަހުލަވާނެއްކަމަށް ވަނީ ބުނެފައެވެ.
ލަޠީފަކީ، އެމް.ޑީ.ޕީ. ސިޔާސީ ޕާޓީއެއްގެ ގޮތުގައި އުފަންކޮށް ޕާޓީއިން އަދާހަމައަށް ހޯދާފައިވާ އެންމެހައި ކާމިޔާބީތަކުގެ އެއް ބާނީ. އަދި އެންމެމުހިންމު އެއް ބައިވެރިޔާއެވެ. ދިވެހިރާއްޖޭގައި ޑިމޮކްރަސީ ކުރިއަރުވައި ހަރުދަނާ ކުރުމަށް އެމް.ޑީ.ޕީން އިސްނަގައިގެން ފެށި މަސައްކަތުގެ އެއް މޭސްތިރި. އަދި ޕާޓީގެ އެންމެހައި މެންބަރުންގެ އެންމެގާތް އެއް އެކުވެރިޔާ.
– އެމްޑީޕީން ބުނެފައިވެއެވެ.
ދިވެހިރާއްޖޭގައި ފުރިހަމަ ޑިމޮކްރެޓިކް ވެށްޓެއް ޤާއިމުކުރުމަށް ކުރެއްވި ބުރަ މަސައްކަތުގައި ލަޠީފަށް ކުރިމަތިލައްވަން ޖެހިވަޑައިގަތް ޙާލަތަކީ، އެމްޑީޕީގެ އެއްވެސް މެންބަރެއްގެ ހިތުން ދުވަހަކުވެސް ފިލައިގެންދާނެ ކަމެއްނޫން ކަމަށާއި، އޭނާ ވެވަޑައިގެންނެވި ޤުރުބާނީއަކީ، ޤައުމުގައި ހެޔޮވެރިކަމެއް ޤާއިމުކުރުމަށް އެމް.ޑީ.ޕީން އިސްވެއޮވެ ފެށި މަސައްކަތަށް އިތުރު ހިތްވަރެއް ލިބިގެންދިޔަ ޤުރުބާނީއެއް ކަމަށް އެޕާޓީން ބުނެއެވެ.
ސިޔާސީ ޕާޓީއެއްގެ ގޮތުގައި އެމް.ޑީ.ޕީ. ސްރީލަންކާގެ ވެރިރަށް ކޮލަމްބޯގައި 2004 ވަނަ އަހަރުގެ ޑިސެމްބަރު މަހުގެ 10 ވަނަ ދުވަހު އިޢުލާނު ކުރެއްވި ބޭފުޅަކީވެސް ލަޠީފެވެ. އަދި އެމްޑީޕީގެ ޗެއާޕަރސަންގެ މަޤާމު ހުސްވެފައިވާ ދަނޑިވަޅެއްގައި، އަމިއްލަފުޅަށް އިސްނަންގަވައިގެން އެމަޤާމުގެ މަސްއޫލިއްޔަތުތައް އަދާ ކުރެއްވުމުގައި ލަޠީފު ދައްކަވާފައިވަނީ ހިންގުންތެރިކަމާއި ކެރިވަޑައިގަތުމުގެ މަތިވެރި މިސާލެކެވެ.
އެމްޑީޕީން ވަނީ ލަޠީފަށް ސުވަރުގޭގެ ދާޢިމީ ނިޢުމަތް މިންވަރުކުރެއްވުން އެދި މާތް ރަސްކަލާންގެ ހަޟުރަތުގައި ދުޢާ ދަންނަވާފައެވެ. އަދި ލަޠީފުގެ ޢާއިލާގެ މެންބަރުންގެ ހިތާމައިގައި ބައިވެރިވެ، ޕާޓީގެ އެންމެހައި މެންބަރުންގެ ނަމުގައި ލަޠީފުގެ ޢާއިލާއަށް ތަޢުޒިޔާ ދަންނަވައި، ކެތްތެރިކަން ދެއްވުން އެދި ދުޢާ ދަންނަވާފައެވެ.
