އަބަދު ފިލްމުތަކުގެ ހީރޯއެއްގެ ރޯލު ނުކުޅެ، ވިލަން ނުވަތަ ނުބައި މީހެއްގެ ރޯލުވެސް ކުޅެލަން ބޭނުން ވާކަމަށް ރަންބީރު ކަޕޫރު ބުނެފިއެވެ.

އޭނާގެ ކުރިއަށް އޮތް ފިލްމު "ޝަމްޝޭރާ"ގެ ޕްރޮމޯޝަނަލް ވީޑިއޯއެއްގައި ވާހަކަ ދައްކަމުން އޭނާބުނީ، ފިލްމުކުޅުމަށް ޝައުގުވެރިވީ ހިސާބުން ފެށިގެންވެސް އެންމެންގެ ދޫމަތީ ނަންކިޔާލެވޭ ވަރުގެ ވިލަން ކެރެކްޓާއެއް ކުޅެލަން ބޭނުންވާކަމަށެވެ. އެގޮތުން "ޝަމްޝޭރާ"ގައި ސަންޖޭ ދަތު ދައްކައިދީފައިވާ ފަދަ ކެރެކްޓަރ އެއް ކުޅެލުމަކީ އަބަދުވެސް ހުވަފެނެއް ކަމަށް ރަންބީރު ވަނީ ބުނެފައެވެ.

ފިލްމު "ޝަމްޝޭރާ"ގައި ސަންޖޭ ފެނިގެންދާނީ ވަރުގަދަ ނުބައިބައި މީހެއްގެ ރޯލުންނެވެ. ރަންބީރު ބުނީ ސަންޖޭ އަކީ އޭނާ އަބަދުވެސް ވަރަށް ބަލައިގަންނަ މޮޅު އެކްޓަރެއް ކަމަށެވެ. އެގޮތުން މިހާރު ބޮލީވުޑްގައި ތިބި "ވިލަން" އިންގެ ތެރޭގައި އެންމެ މޮޅު ވިލަންއަކީ ސަންޖޭ ކަމަށް ރަންބީރު ވަނީ ބުނެފައެވެ.

ރަންބީރު ބުނީ ފިލްމެއްގައި ހީރޯއަކަށް އޭނާގެ "ހީރޯގިރީ" ނުވަތަ ހީރޯ ވަންތަކަން ދައްކާލެވެނީ ވެސް ވަރުގަދަ ވިލަންއެއް އެފިލްމުގައި ހިމެނޭނަމަ ކަމަށެވެ. މީގެ އިތުރުން ބައެއް ފިލްމުތަކުގެ ހީރޯއަށްވުރެ ނުބައި ކެރެކްޓަރ މަޝްހޫރު ވެފައި ވާކަން ވެސް ރަންބީރު ވަނީ ފާހަގަ ކޮށްފައެވެ. އެގޮތުން ފިލްމު ޝޯލޭގައި ގައްބަރު ސިންގ، ފިލްމު މިސްޓަރ އިންޑިއާގައި މޮގެންބޯ އަދި ފިލްމު އަގްނީޕަތު ގައި ކަންޗާ ޗީނާގެ ކެރެކްޓަރ ފާހަގަކޮށްލެވޭ ކަމަށް ރަންބީރު ވަނީ ބުނެފައެވެ.

މީގެކުރިން މުޅީންވެސް ހީރޯގެ ރޯލުތައް ކުޅެފައިތިބި ބޮޑެތި ސްޓާރުންވެސް ވިލަން ރޯލުތަކާ ދިމާއަށް ދާތަން ފެންނަކަމަށް ރަންބީރު ވަނީ ބުނެފައެވެ.

ރަންބީރު މިހާރު ޕްރޮމޯޝަން ތަކުގައި މަސައްކަތް ކުރަމުންދާ ފިލްމު ޝަމްޝޭރާ އިން އޭނާ ފެނިގެންދާނީ ވާނީ ކަޕޫރާއެކުއެވެ. ފިލްމު ސިނަމާތަކުގައި ދައްކަން ފަށާނީ މިމަހުގެ 22 ވަނަ ދުވަހުއެވެ.