އައްޑޫގައި މަރާލި ޒުވާނާގެ މައްސަލާގައި ތަހުގީގަށް ހުރަސް އަޅައި ނުފޫޒު ފޯރުވަން އުޅުނު ކަމުގެ ތުހުމަތުގައި މީހަކު ހައްޔަރުކޮށްފިއެވެ.
ފުލުހުން ވިދާޅޫވީ މިދިޔަ މަހުގެ ދެވަނަ ދުވަހު ދަންވަރުގެ ވަގުތެއްގައި ގްރޫޕް ހަދައިގެން އައްޑޫ ސިޓީ ފޭދޫ ގެއަކަށްވަދެ ތޫނު ހަތިޔާރު ބޭނުންކޮށްގެން އުމުރުން 21 އަހަރުގެ ޒުވާނަކަށް ހަމަލާ ދިނުމާއި ގުޅިގެން އޭނައަށް ފަރުވާދެމުން ދަނިކޮށް މަރުވެފައިވާ މައްސަލައިގެ ތަހުގީގަށް ހުރަސް އަޅައި ނުފޫޒު ފޯރުވަން އުޅުނު ކަމުގެ ތުހުމަތުގައި މިމަހުގެ ފުރަތަމަ ދުވަހު އުމުރުން 37 އަހަރުގެ ފިރިހެނަކު ކޯޓު އަމުރެއްގެ ދަށުން ހައްޔަރުކޮށްފައިވާކަމަށެވެ.
އޭނާ ފުލުހުންގެ ބެލުމުގެ ދަށަށް ގެނެސްފައިވަނީ މިމައްސަލައިގެ ތުހުމަތުގައި ބަންދު ކުރެވިފައިވާ ކުޑަކުއްޖަކަށް ނުރަނގަޅު ނުފޫޒު ފޯރުވައި ފުލުހުން ކުރަމުންދާ ތަހުގީގަށް ހުރަސް އަޅައި، ފުލުހުންގެ ދައުރު އަދާކުރުމަށް ހުރަސް އެޅުމާއި އެކަމަށް ދަތިކުރަމުންދާ މައްސަލައިގެ ތުހުމަތުގައެވެ. މިމީހާގެ އިތުރުންވެސް އެހެން ބައެއް ފަރާތްތަކުންވެސް މިމައްސަލައިގެ ތަހުގީގަށް ނުފޫޒު ފޯރުވައި ހުރަސް އެޅުމަށް މަސައްލަތް ކުރަމުންދާތީ އެކަން ބަލައި އަޅަންޖެހޭ ފިޔަވަޅު އެޅުމުގެ މަސައްކަތް ކުރަމުންދާކަމަށްވެސް ފުލުހުން ވަނީ ބުނެފައެވެ.
މިމައްސަލާގައި މިހާތަނަށް 18 އަހަރުން ދަށުގެ ދެ ކުއްޖަކު ހިމެނޭހެން ޖުމްލަ ހަތްމީހަކު ވަނީ ހައްޔަރުކޮށްފައެވެ. އެގެ ތެރޭގައި ހިމެނެނީ 18 އަހަރުން ދަށުގެ ދެކުދިންގެ އިތުރުން 18 އަހަރާއި 28 އަހަރާއި ދެމެދުގެ ފިރިހެނުންނެވެ. މިމައްސަލައިގައި ބަންދުގައި ތިބި ބައެއް މީހުން ޝަރީއަތް ނިމެންދެން ބަންދުކޮށްފައިވާއިރު އަނެއްބައި މީހުން ބަންދުގެ މުއްދަތު ތިންވަނަ ފަހަރަށް ވަނީ އިތުރުކޮށްފައެވެ.
މިމައްސަލާގައި މިހާތަނަށް ލިބިފައިވާ ކުރިއެރުންތަކާއި، ހޯދިފައިވާ ހެކިތަކާއި ބެހޭގޮތުން ޕީޖީ އޮފީހާއި މަޝްވަރާކުރެވި ތަހުގީގް ފުރިހަމަކުރުމަށް ކުރަންޖެހޭ މަސައްކަތް ކުރަމުންދާކަމަށް ފުލުހުން ވިދާޅުވެއެވެ.
