ރައްޔިތުންގެ މަޖިލީހުގެ މިއަހަރުގެ ދެވަނަ ދައުރަށް ހުށަހެޅުނު ގިނަ މަސައްކަތްތަކެއް ނިންމައި މަޖިލިސް ބޮޑު ޗުއްޓީއަށް ގޮސްފިއެވެ.
މަޖިލިސް މިދައުރަށް ޗުއްޓީއަށް ގޮސްފައިވަނީ މުހިންމު ބިލްތަކެއްގެ މަސައްކަތްވެސް ނިންމާފައެެވެ. އޭގެ ތެރޭގައި 45 އަހަރަށްފަހު ހެއްކާއި ބެހޭ ބިލާއި، ކޯޓުތަކުގެ ޤާނޫނާއި އިސްލާހު ގެނައުމާއި، ލާމަރުކަޒީ ޤާނޫނަށްވެސް ވަނީ މުހިންމު އިސްލާހުތަކެއް ގެނެސްފައެވެ. މިދައުރު ނިންމާލީ 22 ޖަލްސާއާއި ގިނަ ކޮމެޓީ މަސައްކަތްތަކެއް ކުރުމަށްފަހުއެވެ.
މިދައުރުގެ ތެރޭގައި ނިންމި މަސައްކަތްތައް:
– 8 ބިލު
– 2 ޤަރާރު
– 3 މައްސަލަ / ސަރުކާރުގެ ފަރާތުން ހުށަހެޅި
– 1 ރިޔާސަތުން ހުށަހެޅި މައްސަލަ
– 2 ކުއްލި މައްސަލަ
– 5 މައްސަލަ / މެމްބަރުން ހުށަހެޅި
– 6 އެހެނިހެން މައްސަލަ
މިދައުރުގެ ތެރޭގައިވެސް މަޖިލީހުންވެސް ވަޒީންނާއި ސުވާލު ކުރުމަށް ގިނަ ވަޒީރުން މަޖިލީހަށް ހާޒިރުކޮށްފައެވެ. އެގޮތުން މިދައުރުގެ ތެރޭގައި 30 ސުވާލަކަށް ޖަވާބު ދެއްވުމަށް އެކި ވަޒީރުން ވަނީ މަޖިލީހަށް ހާޒިރުވެފައެވެ. މިދައުރުގައި މަޖިލީހަށް އެންމެ ގިނައިން ހާޒިރުކުރި ވަޒީރަކީ ޕްލޭނިން މިނިސްޓަރ މުހައްމަދު އަސްލަމެވެ.
މަޖިލީހުގެ ޗުއްޓީއަށް މިހާރު ގެނެސްފައިވާ ބަދަލާއިއެކު މިއީ މަޖިލީހުގެ އެންމެ ކުރި ދައުރެވެ. މިދައުރަށްފަހު ދެން މަޖިލީހުގެ މަސައްކަތްތައް ފަށާނީ އީދު ބަންދާއި، ޖުލައި 26 ބަންދަށްފަހު އޮގަސްޓު މަހުގެ ތެރޭގައެވެ. މަޖިލީހުގެ ފަހު ދައުރުގައި އެންމެ މުހިންމު މަސައްކަތަށް އޮންނާނީ އަންނަ އަހަރަށް ދައުލަތުން ލަފާކުރާ ބަޖެޓްގެ މަސައްކަތެވެ.
