ބޮލީވުޑްގެ މަޝްހޫރު އެކްޓަރ ރަންބީރު ކަޕޫރު އޭނާއަށް ލިބެން އުޅޭ ދަރިފުޅަށް ބޭނުންވާ އެއްޗެހި ގަތުމުގެ މަސައްކަތް ފަށާފައި ވާކަމަށް ރިޕޯޓްތައް ބުނެފިއެވެ.
މިދިއަ އެޕްރިލް މަހުގެ 14 ވަނަ ދުވަހު ކައިވެނި ކުރި ރަންބީރު ކަޕޫރާއި އާލިއާ ބަޓަށް ދަރިއަކު ލިބެން އުޅޭ ކަން އިއުލާން ކުރީ މީގެ ދެދުވަހެއް ކުރިންނެވެ.
ކައިވެންޏަށް ފަހު ވަރަށް ބިޒީކޮށް ދެތަރިން ވެސް މަސައްކަތުގައި އުޅެމުން އަންނަ އިރު އަދި ހަމަޖެހިލައިގެން ހަނީމޫނަށް ދާނެ ވަގުތުވެސް ދެތަރިންނަށް ވަނީ ނުވެފައެވެ.
އާލިއާ މިހާރު މަސައްކަތް ކުރަމުން އަންނަނީ އޭނާ ހޮލީވުޑަށް ތައާރަފްވާ މަސައްކަތުގައެވެ. އޭނާ ހުރީ ވެސް މިވަގުތު ޔޫކޭގައެވެ.
ރަންބީރު ވެސް އަންނަނީ އޭނަގެ ކުރިއަށް އޮތް ފިލްމު ގެ މަސައްކަތް ކުރަމުންވެ. އެއީ އަދި ނަމެއް ދީފައިނުވާ، ޑައިރެކްޓަރު ލަވް ރަންޖަންގެ ފިލްމެކެވެ. ފިލްމްގެ ޝޫޓިންގައި ޝްރައްދާ ކަޕޫރާއި އެކުގައި ރަންބީރު ހުރީ ސްޕެއިންގައެވެ.
އާލިއާގެ ފިލްމުގެ ޝޫޓިން ޖުލައި ނިމުމުގެ ކުރިން ނިންމާލެވޭނެ ކަމަށް ޚަބަރު ލިބެއެވެ. އޭރުން ރަންބީރު އާލިއާ ބަލައި ޔޫކޭއަށް ދާނެ ކަމަށާއި އެއަށް ފަހު އާލިއާ ވިހަންދެން ހުންނާނި ޗުއްޓީގައި ކަމަށް ވެސް ޚަބަރުތައް ހުނެއެވެ.
ކައިވެންޏަށް ދެމަހުގައި އާލިއާ ބަނޑު ބޮޑުކަން އިއުލާން ކުރިއިރު އެމީހުން އެކުގައި ކުޅުނު އަލަތު ފިލްމު "ބްރަމަސްތުރާ" މިއަހަރު ސެޕްޓެމްބަރު މަހުގައި ރިލީޒް ކުރާނެއެވެ. އެ ފިލްމަކީ ދެމީހުންގެ ގުޅުމުގެވެސް ފެށުމެވެ.
