މާލޭ ރައްޔިތުންނަށް ދިމާވެފައިވާ ބޯހިޔާވަހިކަމުގެ މައްސަލަ ޙައްލުކުރުމަށްޓަކައި، ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވެވަޑައިގެންފައިވާ ވައުދާއި އެއްގޮތަށް މާލެ ސަރަޙައްދުން ދޫކުރުމަށް ހަމަޖެހިފައިވާ ގޯތިތައް ދޫކުރުމަށްޓަކައި މާދަމާ ހުޅުވާލާނެއެވެ.
ޕްލޭނިން މިނިސްޓަރ މުހައްމަދު އަސްލަމް މިމަހުގެ 15 ވަނަ ދުވަހު ރައްޔިތުންގެ މަޖިލީޙުގައި ވާހަކަ ދައްކަވަމުން ވިދާޅުވީ މާލެ ސަރަހައްދުން ގޯތި ދިނުމަށްޓަކައި ރައީސުލްޖުމްހޫރިއްޔާ ނިންމަވާފައިވާ ނިންމެވުމާ އެއްގޮތަށް މިމަހުގެ 26ވަނަ ދުވަހު (މާދަމާ) ގޯތިތަކަށް ކުރިމަތިލުމަށް ހުޅުވާލާނެކަމަށެވެ. ނަމަވެސް ގޯތިތަށް ދޭނެ ސަރަހައްދަކާއި، އަދި ގޯތިތަކާގުޅޭ މާބޮޑު ތަފްސީލެއްވެސް މިނިސްޓަރ ދެއްވާފައެއްނުވެއެވެ.
މާދަމަ ޕްލޭނިން މިނިސްޓްރީން ގޯތިތަކަށް ހުޅުވާލާއިރު، ގޯތި ދޭނެ އުސޫލުތަކާއި، ކުރިމަތިލެވޭނެ މީހުންގެ ޝަރުތުތައްވެސް ހާމަކުރާނެކަމަށް މައުލޫމާތު ލިބެއެވެ. އަދި ގޯތި ދޫކުރަނީ ކޮން ސަރަހައްދަކުން ކަމަށާއި، ގޯތީގެ ބޮޑުމިންވެސް މާދަމާ އިއުލާން ކުރާނެކަމަށް ބެލެވެއެވެ. މައުލޫމާތު ލިބިފައިވާ ގޯތި ދޫކުރުމަށް މާދަމާ އިއުލާން ކުރާނީ ގުޅިފަޅުންނެވެ.
މާލޭގެ ރައްޔިތުންނަށް ޚާއްސަކޮށްގެން ދޫކުރާ ފުރަތަމަ 3000 ގޯތި ދޫކުރުމަށްޓަކައި މިމަހުގެ ތެރޭގައި ހުޅުވާލާނެކަމަށް ރައީސުލްޖުމްހޫރިއްޔާ ވަނީ އެންމެފަހުން އެމަނިކުފާނު ބޭއްވެވި ނޫސްވެރިންގެ ބައްދަލުވުމުގައި އިއުލާން ކުރައްވާފައެވެ. މާލޭގެ ރައްޔިތުންނަށް ގޯތި ދިނުމުގެ ވަޢުދަކީ މިސަރުން ވެރިކަމަށް ވަޑައިގަތުމަށްޓަކައި މާލޭގެ ރައްޔިތުންނަށް ވެފައިވާ ވައުދެކެވެ. ނަމަވެސް މިކަން ތަންފީޒު ކުރުމުގައި މިނިސްޓަރ އަސްލަމަށް އެންމެ އެކަށީގެންވާ ގޮތަށް މަސައްކަތް ނުކުރެވޭކަމަށް މަޖިލީހުގައި ހިމެނޭ މާލެއަށް ނިސްބަތްވާ މެމްބަރުންވެސް ދަނީ ވިދާޅުވަމުންނެވެ.
މިސަރުކާރުން ވެރިކަމަށް ވަޑައިގަތުމަށް ވެފައިވާ އެންމެ ބޮޑު އެއްވައުދަކީ ބޯހިޔާ ވަހިކަމުގެ ވައުދެވެ. މިމަސައްކަތް ހަވާލު ކުރެވިފައިވާ ވަޒީރުގެ ހައިސިއްޔަތުން އަސްލަމަށް މިކަމުގައި އެއްވެސް ނަތީޖާއެއް ނެރެވިފައި ނުވާކަމަށް ގިނަ ބަޔަކު ދަނީ ބުނަނުންނެވެ. މިހާތަނަށް މިސަރުކާރުން އެޅި އެންމެ ފްލެޓެއްވެސް ފެންނަން ނެތްއިރު، ވަރަށް އަވަހަށް މިސަރުކާރުން އަޅާ ފްލެޓްތަކާއި، ހައުސިން މަޝްރޫޢުތައް ފެށިގެންދާނެކަމަށް އަސްލަމް ދަނީ ވިދާޅުވަމުންނެވެ.
ނަމަވެސް ކޮންމެ އަހަރަކު މަޖިލީހަށް ރައީސުލްޖުމްހޫރިއްޔާ ދެއްވާ ރިޔާސީ ބަޔާނުގައި ހައުސިން މިނިސްޓްރީގެ ފަރާތުން ކުރާ މަސައްކަތުގެ ވާހަކަފުޅު ދައްކަވާއިރު، މެމްބަރުންނަށް އަޑުއިވިގެންދަނީ ތަކުރާރުކޮށް އެއްވާހަކަތަކެވެ. ބޯހިޔާވަހިކަމުގެ ވައުދު ފުއްދުމަށް ކޮންމެ އަހަރަކުވެސް ފްލެޓް އަޅާނެ ވާހަކައާއި، މާލޭ ރައްޔިތުންނަށް ބީހިޔާވަހިކަން ލިބޭނެކަމުގެ ވާހަކައެވެ. ނަމަވެސް ވެރިކަން ނިމެން އަހަރަކަށް ވެފައިވާއިރު މިވައުދު ފުއްދުމުގައި ސަރުކާރު ވަނީ ފެއިލްވެފައިކަމަށް މަޖިލީހުގައި ހިމެނޭ އެމްޑީޕީއަށް ނިސްބަތާ މާލެ ތަމްސީލް ކުރާ ގިނަ މެމްބަރުން ދަނީ ވިދާޅުވަމުންނެވެ.
މިހާތަނަށް ބޯހިޔާވަހިކަމުގެ އެންމެ ގިނަ މަޝްރޫޢުތަކެއް ހިންގާފައިވަނީ ނިމިދިޔަ ރައީސް ޔާމީންގެ ވެރިކަމުގައެވެ. މާލެ އާއި އަތޮޅުތެރޭގައި އަޅާފައިވާ ގިނަ މަޝްރޫޢޫތައް ނިމި، އެތަންތަނަށް މީހުން ވަދެ އާބާދުވެފައިވަނީ މިވެރިކަމުގެ ތެރޭގައެވެ. ރައީސް ޔާމީންގެ ވެރިކަމުގައި އަޅަންފެށި ހިޔާ މަޝްރޫޢުގައި ހިމެނޭ ފްލެޓްތަކުގެ ތެރެއިން "ވިނަރެސް" ފްލެޓަށް ނަން ބަދަލުކޮށް މިހާރު ނިމިފައިވާ ފްލެޓްތަކަކީވެސް މިސަރުކާރުގެ ފެލެޓްތަކެއްގެ ގޮތުގައި މިނިސްޓަރ އަސްލަމް ވަނީ ވާހަކަފުޅު ދައްކަވާފައެވެ.
މާދަމާ މާލޭގެ ރައްޔިތުންނަށް ގޯތި ދޫކުރާނެ އުސޫލު އާންމުކުރާއިރު، މާލޭގެ ގިނަ ރައްޔިތުން ތިބީ ބިންތައް މާލެއާއި ކައިރި ސަރަހައްދަކުން، ބޮޑު ޖާގައެއްގައި ކުޑައަގެއްގައި ލިބޭނެކަމަށެވެ. މާލޭގެ ތޮއްޖެހުމަށް ކުޑަކުރުމަށްޓަކައި ޅުމާލެއިން ދޫކުރުމަށް ހަމަޖެހިފައިވާ 1000 ގޯތި ދޭނެ ސަރަހައްދު އެޗްޑީސީން ވަނީ މިހާރުވަނީ ކަނޑައަޅައި، ޕްލޭނިން މިނިސްޓްރީއާއި ހަވާލުކޮށްފައެވެ.
ބޯހިޔާވަހިކަމުގެ މައްސަލައަށް ޙައްލެއް ގެނައުމަށްޓަކާ މާލެއަތޮޅު ގިރާވަރު ފަޅު ހިއްކައިގެން މާލޭ ރައްޔިތުންނަށް 2000 ގޯތި ދޫކުރުމުގެ މަޝްރޫޢެއް ރައީސުލްޖުމްހޫރިއްޔާވަނީ މިއަހަރަށް ރައްޔިތުންގެ މަޖިލީސް ހުޅުވާ ދެއްވުމުގެ ގޮތުން ދެއްވި ރިޔާސީ ބަޔާނުގައި އިޢުލާންކުރައްވާފައެވެ. އަދި ހުޅުމާލެއިން 1000 ގޯތި ދޫކުރުމަށްވެސް ވަނީ ހަމަޖެހިފައެވެ. މީގެއިތުރުން ހުޅުމާލޭގައި ކުރިއަށްދާ ހައުސިންގ މަޝްރޫޢުގެ ދަށުން މާލޭގެ ރައްޔިތުންނަށް 5000 ހައުސިންގ ޔުނިޓު ހަމަޖެއްސުމަށް ނިންމަވާ، އިތުރު 2000 ހައުސިންގ ޔުނިޓުގެ މަސައްކަތް ފެއްޓެވުމަށްވެސް ރައީސް ވަނީ ނިންމަވާފައެވެ.
މީގެ އިތުރުން ރާއްޖޭގެ ގިނަ ރަށްރަށަށްވެސް ދިމާވެފައިވާ އިޖުތިމާޢީ އެންމެ ބޮޑު މައްސަލައަކީ އެކަށީގެންވާ ބޯހިޔާވަހިކަމެއް ނެތި ދަތި ޙާލުގައި ކުޑަ ތަންކޮޅެއްގައި ގިނަ ބަޔަކު ތޮއްޖެހިގެން ދިރިއުޅެންޖެހުމެވެ. މިމައްސަލަ ޙައްލުކުރުމަށް ރާއްޖޭގެ އެކި ސަރަޙައްދުތަކުގައި ބޯހިޔާވަހިކަމުގެ 60 މަޝްރޫޢެއްގެ މަސައްކަތް އަންނަނީ ކުރަމުންނެވެ. މީގެތެރެއިން 2159 ހައުސިންގ ޔުނިޓުގެ މަސައްކަތް މިއަހަރުގެ ތެރޭގައި އަދި 2023 ވަނަ އަހަރު 2429 ޔުނިޓު ނިމޭނެކަމަށާއި 2024 ގެ ނިޔަލަށް 3361 ހައުސިންގ ޔުނިޓުގެ މަސައްކަތް ނިމި ރައްޔިތުންނަށް އޭގެ މަންފާކުރާނެ ކަމަށް ސަރުކާރުން ވަނީ ވިދާޅުވެފައެވެ.
