މި ހިނގާ ޖޫންމަހުގެ 14ވަނަ ދުވަހުން ފެށިގެން އަންނަ ޖުލައިމަހުގެ 19 ވަނަ ދުވަހުގެ ނިޔަލަށް އުމްރާ ވުމުގެ ފުރުސަތު ލިބެނީ ހައްޖުވެރީންނަށް އަކަނި ކަމުގައި ސައުދީ އަރަބިއާގެ މިނިސްޓްރީ އޮފް ހައްޖު އެންޑް އުމްރާއިން ހުކުރު ދުވަހު ހާމަ ކޮށްފިއެވެ.
ސައުދީގެ މިނިސްޓްރީ އޮފް ހައްޖު އެންޑް އުމްރާއިން ކޮށްފައިވާ ޓުވީޓެއްގައި ވިދާޅުވެފައިވަނީ، އުމްރާ ކުރުމަށްޓަކާ ރެޖިސްޓަރވާންޖެހޭ އެޕް ކަމުގައިވާ އީޓްމަރުނާ އެޕްލިކޭޝަންގެ ޚިދުމަތް ދެން ލިބެން ފަށާނީ އަންނަ ޖުލައިމަހުގެ 19 ވަނަ ދުވަހުން ފެށިގެން ކަމުގައެވެ.
މިއަހަރުގެ ހައްޖުގެ އަޅުމަކަށް، ފާއިތުވެދިޔަ ހަފްތާގެ އަންގާރަ ދުވަހުގެ ނިޔަލަށް ސައުދީ އަރަބިއާއަށް އެތެރެ ވެފައިވަނީ 172,562 މީހުންނެވެ.
ހައްޖުގެ އަޅުކަމަކީ އިސްލާމްދީނުގެ 5 ރުކުންތަކުގެ ތެރޭގައި ހިމެނޭ އެއް ރުކުނެވެ. އަދި ކުޅަދާނަކަން ލިބިގެންވާ ކޮންމެ މުސްލިމެއްގެ މައްޗަށް، އުމުރުން އެއްފަހަރު ހައްޖުވުމަކީ ވާޖިބެކެވެ.
ހައްޖުގެ އަޅުކަމަކީ ދުނިޔޭގައި ބޭއްވޭ އެންމެ ބޮޑު ދީނީ އެއްވުމެވެ. ކޯވިޑް ކާރިސާގެ ކުރިން، 2019ވަނަ އަހަރު 2.5 މުސްލިމުން ހައްޖުގެ އަޅުކަމަށް ސައުދީ އަރަބިއާއަށް ޒިޔާރަތް ކޮށްފައި ވެއެވެ.
އެހެންނަމަވެސް ކޯވިޑް ކާރިސާއާއި ގުޅިގެން، ފާއިތުވެދިޔަ އަހަރުތަކުގައި ސައުދީ ސަރުކާރުންވަނީ ހައްޖުގެ އަޅުކަން އަދާކުރުމުގެ ފުރުސަތު ދޭ މީހުންގެ އަދަދު ވަރަށް ބޮޑުތަނުން މަދު ކޮށްފައެވެ.
