ރާއްޖޭގައި ތަރައްޤީކުރާ ދުނިޔޭގެ ފުރަތަމަ ފްލޯޓިން ސިޓީ ޕްރޮޖެކްޓަކީ ބޮޑު އޮޅުވާލުމެއްކަމަށް އިކޮނޮމިކް މިނިސްޓަރު އަދި އެމްޑީޕީގެ ޗެއާޕާސަން ފައްޔާޟް އިސްމާޢީލް ވިދާޅުވެއްޖެއެވެ. ނެދަލޭންޑްސްގެ ޑަޗް ޑޮކްލޭންޑްސް އިން ކުރިއަށް ގެންދާ ފްލޯޓިން ސިޓީ ޕްރޮޖެކްޓް ސަރުކާރުން ހުއްޓުވާފައިވާކަމަށް ވިދާޅުވެ ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވަނީ އެމްޑީޕީގެ ގައުމީ މަޖިލީހުގެ ގްރޫޕްގައި ކަންބޮޑުވުން ފާޅުކުރައްވާފައެވެ.

ޕްރޮޖެކްޓް ހިންގިޔަ ނުދޭން ހުރަސްއަޅަނީ އެ މަނިކުފާނުގެ ނަން ހިމެނޭ ޕްރޮޖެކްޓަކަށް ވާތީކަމަށާއި، އެކަން ހުއްޓުވަން އެންވަޔަރަމަންޓް މިނިސްޓަރު އައިމިނަތު ޝައުނާ ވެސް ވޯޓު ދެއްވިކަމަށް ރައީސް ނަޝީދު ތުހުމަތުކުރެއްވިއެވެ.

ރައީސް ނަޝީދުގެ ވާހަކަތަކަށް ރައްދު ދެއްވަމުން އެމްޑީޕީގެ ޗެއަރޕާސަން އަދި އިކޮނޮމިކް މިނިސްތަރ ފައްޔާޟް އިސްމާޢީލް ވަނީ ޖެނުއަރީ، 2011 ގައި އެންމެ ފުރަތަމަ ސޮއިކުރި އެ ޕްރޮޖެކްޓާ ގުޅޭ ބައެއް ތަފްސީލްތައް ވަޓްސްއަޕް ގްރޫޕްގައި އާންމުކުރައްވާފައެވެ. ފައްޔާޟް ވިދާޅުވީ ފްލޯޓިން ސިޓީ ބޮޑެތި އޮޅުވާލުންތަކެއް ހިމެނޭ ކަމަށާއި ރިސޯޓެއް އަދި ގެތައްވެސް ތަރައްގީކުރާނެ ކަމަކަށް ގަބޫލުނުކުރައްވާކަމަށެވެ.

މި ފަހުން އިކޮނޮމިކް ކައުންސިލަށް ޑަޗް ޑޮކްލެންޑްސް އިން ހުށަހެޅީ އެ މީހުންގެ އަމިއްލަ ފައިދާ ހިމެނޭ ހުށަހެޅުމެއް ކަމުގެ ތުހުމަތު ކުރައްވައި އެދުނު ގޮތަށް އެކަން ކުރަން މެދުވެރިވީ ގާނޫނީ ހުރަސްތަކެއްކަަމަށް ފައްޔާޟް ވިދާޅުވިއެވެ.

ފައްޔާޟް ވިދާޅުވީ ސަރުކާރުން އެކުންފުންޏަށް ދޫކުރި ފަސްފަޅުގެ ތެރެއިން ތިން ފަޅެއް މިހާރުވެސް ވިއްކާލާފައިވާކަމަށެވެ. އެކުންފުނިން އިކޮނޮމިކް ކައުންސިލަށް ހުށަހެޅި ގޮތަށް އެއްބަސްނުވީ މުޅި މި ޕްރޮޖެކްޓުގައި އޮޅުވާލުން ހިމެނޭތީ ކަމަށާއި އެ ފަޅުތައް ބޮޑު އަގުގައި ވިއްކާލައިގެން އެ ކުންފުނިން ބޮޑު ފައިދާއެއް ހޯދާފައިވާ ކަމަށްވެސް ފައްޔާޟް ވިދާޅުވިއެވެ.

އެ ފަޅުގައި އިތުރު ހަ ރަށެއް ހިއްކުމަށް ފަހު އެ މީހުން މަސައްކަތް ކުރަމުން ދަނީ ވިއްކާލުމަށްކަމަށާއި، އެ ކުންފުންޏަށް ދޫކުރި ފަޅުގައި ރިސޯޓް ތަަރައްގީކޮށް، ނުވަތަ އާއްމުކޮށްފައިވާ ކޮންސެޕްޓާ އެއްގޮތަށް ގެތައް ނިންމަފާނެ ކަމަކަށް އޭނާ ގަބޫލެއް ނުކުރައްވާކަމަށް ފައްޔާޟް ވިދާޅުވިއެވެ.

ފައްޔާޟް ވިދާޅުވި ގޮތުގައި ޑަޗްޑޮކްލޭންޑުން މަސައްކަތްކުރަނީ މި ޕްރޮޖެކްޓުގައި ނަޝީދުގެ ނަން ބޭނުންކޮށްގެން ފައިދާ ނެގުމަށްކަމަށެވެ.

ފްލޯޓިންގ ސިޓީގައި ލަގްޒަރީ ފެންވަރުގެ 5000 ހައުސިންގ ޔުނިޓު ތަރައްޤީކުރުމަށްވަނީ ހަމަޖެހިފައެވެ. މާލެ އަތޮޅު އާރަށް ކައިރީ ތަރައްޤީކުރާ ފްލޯޓިން ސިޓީގެ މިމަޝްރޫޢު ނިމިގެންދާއިރު މިސަރަޙައްދަށް ރިސޯޓުތަކާއި ސިޓީ ހޮޓާތަކާއި ބޮޑެތި ފިހާރަތަކުގެ އިތުރުން ސިއްޙީ ޚިދުމަތާއި ސްކޫލްތައް އައުމާއެކު މިއީ އިތުރަށް އުފެދޭ ވަޒީފާތައްކަމަށް މަސައްކަތުގެ ލޯކަލް ކޮންސަލްޓަންޓް ފާހަގަކުރައްވައެވެ.

ފްލޯޓިންގ ސިޓީ އަޅާއިއިރު މުޅިންވެސް ތިމާވެއްޓާއި ރަހުމަތްތެރި ގޮތްތަކެއް ބޭނުން ކުރެވޭނެއެވެ. އަދި މިއީ ރާއްޖޭގައި ހިންގާ މިފަދަ ފުރަތަމަ މަޝްރޫއެއެވެ. މިއީ ރާއްޖޭގެ ގެދޮރު އިމާރާތް ކުރުމުގެ ދާއިރާ ބަދަލު ކޮށްލުމުގެ މަޤްސަދުގައި ކުރިއަށްގެންދާ ބިޔަ މަޝްރޫއެކެވެ.

ރާއްޖޭގައި ފްލޯޓިން ސިޓީއެއް ތަރައްޤީކުރުމަށް އެންމެ ފުރަމަތަ އެއްބަސްވުމަކަށް އައިސްފައިވަނީ 2010 ވަނަ އަހަރު ރައީސް ނަޝީދުގެ ވެރިކަމުގައެވެ. އޭރު ޑަޗް ޑޮކްލޭންޑް ކުންފުންޏާއި މަސައްކަތް ހަވާލުކުރުމަށްފަހު، ކުރިއަށް ނުގޮސް އޮވެ، މިއެއްބަސްވުމުގައި ދެވަނަ ފަހަރަށް ސޮއި ކުރީ 2019 ވަނަ އަހަރު މޭއި މަހުގެ ތެރޭގައެވެ. މިމަޝްރޫއު ހިންގުމަށް ދެވަނަ ފަހަރަށް ވެސް ހަވާލުކުރި ޑަޗް ޑޮކްލޭންޑް ކުންފުންޏާއިއެވެ.