ރާއްޖޭގެ ތަޢުލީމީ ދާއިރާއަށް ޚާއްސަ އިސްކަމެއް ދެއްވައިގެން، ބޮޑެތި ބަދަލު ތަކެއް ގެނެސްދެއްވީ، އެމަނިކުފާނު އެދޭ ތަރައްޤީ ޙާސިލް ކުރުމަށް ކަމުގައި ރައީސުލްޖުމްހޫރިއްޔާ އިބްރާހިމް މުހައްމަދު ޞާލިހު ވިދާޅުވެއްޖެއެވެ.
ރައީސުލްޖުމްހޫރިއްޔާ މިހެން ވިދާޅުވީ، މޭނާ ސްކޫލަށް 75 އަހަރު ފުރޭ އަލިމަސް ޔޫބީލް ފާހަގަކުރުމުގެ ގޮތުން ބޭއްވި ޚާއްސަ ޖަލްސާ ޝަރަފުވެރިކޮށްދެއްވާ ވާހަކަފުޅު ދައްކަވަމުންނެވެ.
ރައީސުލްޖުމްހޫރިއްޔާ ވިދާޅުވީ ޤައުމެއްގެ ރައްޔިތުން ތަރައްޤީގެ މަގުގައި ކުރިއަށް ދާހާ ހިނދަކު، އެބައެއްގެ ތެރޭގައި އެންމެ އަވަހަށް ބަދަލުވަމުން ތަރައްޤީވަމުން އަންނާނީވެސް ތަޢުލީމީ ދާއިރާ ކަމަށެވެ. ރާއްޖޭގެ ސްކޫލް މަދަރުސާތައް ތަރައްޤީކުރުމަށް ގިނަ މަޝްރޫޢުތަކެއް ހިންގަނީވެސް އެ ސަބަބަށްޓަކައި ކަމަށް އެމަނިކުފާނު ވިދާޅުވިއެވެ. އަދި ޤައުމުގެ ކުރިމަގަށް ބޭނުންވާ ފެންވަރަށް ތަޢުލީމީ ހުނަރުވެރި މީހުން ބިނާކުރުމުގެ ބޭނުމުގައިކަމަށެވެ.
ރައީސް ވިދާޅުވީ ހޮޅުދޫގެ އިތުރުންވެސް ރާއްޖޭގެ ހުރިހާ އަތޮޅުތަކެއްގައި، ތަޢުލީމީ ދާއިރާގެ ޢުމްރާނީ ތަރައްޤީއަށް ގިނަ މަޝްރޫޢުތަކެއް މިހާރުވެސް ހިނގަމުން ދާކަމަށެވެ. ކްލާސް ރޫމްތައް އިތުރުކުރުމާއި، މަލްޓިޕާޕަސް ހޯލްތައް ބިނާކުރުމާއި، ސައެންސް ލެބޯޓެރީތަކާއި އޮފީސް ޢިމާރާތްތައް ހެދުމުގެ މަސައްކަތްވެސް އެކި ސްކޫލްތަކުގައި މިހާރުވެސް ކުރިއަށް ދާކަމަށެވެ. އެ މަޝްރޫޢުތައް ނިމުމުން، ސްކޫލްތަކުގައި ހުރި ޖާގައިގެ ދަތިކަމަށް ވަރަށް ބޮޑު ޙައްލެއް ލިބިގެންދާނެކަމަށް އެމަނިކުފާނު ވިދާޅުވިއެވެ.
ދަރިފުޅު އިނގިލިކުރީގައި ލައިގެން، ސްކޫލް ދޮށަށް ދާ ފުރަތަމަ ދުވަހުން ފެށިގެން، ކޮންމެ ބެލެނިވެރިއެއްގެ ހިތުގައި، ހާމަނުކޮށް އޮންނަ ޢަޒުމަކީވެސް، ތިމާގެ ދަރިފުޅަކީ ޤާބިލު ހުނަރުވެރި ކުއްޖަކަށް ހެދުމުގެ ޢަޒުމް. ކިޔެވުމުގެ ފުރުޞަތުތައް ފަހިކޮށްދީގެން، ސަރުކާރުން މަސައްކަތް ކުރަމުން މި އަންނަނީ ބެލެނިވެރިންގެ އެ ޢަޒުމް ޙަޤީޤަތަކަށް ހަދައިދިނުމަށް. އަސާސީ ޚިދުމަތްތައް ތަރައްޤީކުރުމަށް މިހާރު ހިންގާ މަޝްރޫޢުތައް ނިމެމުން ދާވަރަކަށް، ރަށްރަށުގައި ފަންނީ އެތައް ވަޒީފާއެއް އުފެދިގެންދާނެ. އަޅުގަނޑުގެ ވިސްނުމަކީ، އެފަދަ ކޮންމެ ވަޒީފާއަކަށް، އެރަށެއްގެ ތަޢުލީމީ ދިވެހި ޒުވާނެއް ހަމަޖެހިގެން ދިއުން. އަޅުގަނޑުމެން މިއެދޭ ޙަޤީޤީ ތަރައްޤީ ރަށްރަށަށް ލިބެން ފަށާނީ އޭރުން.
– ރައީސް ވިދާޅުވިއެވެ.
ރައީސް ވިދާޅުވީ، މޭނާ ސްކޫލަކީ ނ.ހޮޅުދޫގެ ނަމާ ގުޅިފައިވާ ހޮޅުދޫ ރައްޔިތުންގެ ފަޚުރާއި ޝަރަފުކަމަށެވެ. އަދި ނ. އަތޮޅުގެ ތަޢުލީމީ ދާއިރާއަށް ބަލާއިރުވެސް މޭނާ ސްކޫލަކީ އެފަދަ ދެވަނައެއްނެތް ވަރުގަދަ ތަނބެއްކަމަށް އެމަނިކުފާނު ވިދާޅުވިއެވެ. އެގޮތުން ނ. އަތޮޅުގައި މަތީ ސާނަވީ މަރުޙަލާގައި މެދުކެނޑުމެއްނެތި 2 ސްޓްރީމަށް މިހާރު ކިޔަވައިދޭ ހަމައެކަނި ސްކޫލަކީވެސް މޭނާ ސްކޫލުކަން ރައީސް ފާހަގަކުރެއްވިއެވެ. އަދި ސްކޫލުން ޤައުމީ ފެންވަރުގައި ހޯދަމުންދާ ކާމިޔާބީތައް އެމަނިކުފާނު ފާހަގަކުރެއްވިއެވެ.
