އެމެރިކާގެ ރިޔާސީ އިންތިޚާބު އޮޅުވާލައިފައިވާ ކަމަށް ތުހުމަތުކޮށް އިންސާފޯހޯދުމަށް ގޮވާލާ ޓްރަމްޕަށް ތާއީދު ކުރާ ފަރާތްތަކުން އެމެރިކާގެ ވޮޝިންގޓަން ޑީސީގައި މުޒާހަރާ ކޮށްފިއެވެ.
ޓްރަމްޕަށް ތާއީދުކުރާ އެތައްހާސް އެމެރިކާ ރައްޔިތުން ވޮޝިންގްޓަން ޑީސީއަށް އެއްވެ މުޒާހަރާ ކޮށްފައިވާއިރު، ޖޯ ބައިޑްންއަށް ތާއީދުކުރާ މަދު ބަޔަކުވެސް ވަނީ އެމެރިކާގެ ސުޕްރީމް ކޯޓު ދޮށަށް އެއްވެ ބައިޑްންއަށް ތާޢީދު ކުރާކަން ހާމަކުރުމުގެ ގޮތުން މުޒާހަރާ ކޮށްފައެވެ.
ޓްރަމްޕްއާއި ދެކޮޅަށް މުޒާހަރާ ކުރި ފަރާތްތަކުން ވޮޝިންޓަން ޑީސީގައި ހުންނަ ޓްރަމްޕްއަށް ތާޢީދު ކުރާ މީހުން އެއްވެ ތިބި ހޮޓަލާއި ދިމާއަށް މިސްރާބުޖެހުމުން އެމީހުން ހުއްޓުވުމަށް ފުލުހުން ކުރި މަސައްކަތުގެ ތެރޭގައި މުޒާހަރާ ކުރާ ފަރާތްތަކާ ފުލުހުންނާއި ދެމެދު ކުމަތިލުންތައްވެސް ހިގާފައި ވެއެވެ.
ހޮނިހިރު ދުވަހު ޓްރަމްޕަށް ތާއީދުކޮށް މުޒާހަރާ ކުރުމަށް އެއްވި ފަރާތްތަކަކީ އެމެރިކާގެ ކަނާތުފިޔަ އަށް ނިސްބަތްވާ ގުރޫޕަތަކަށް ތާއީދުކުރާ ފަރާތްތަކެވެ. މި ހުރިހާ ގްރޫޕްތަކަކީ ތަފާތު ފިކުރުތަކަށް ނިސްބަތްވާ ގްރޫޕްތަކެއް ކަމަށްވި ނަމަވެސް، މިހުރިހާ ގްރޫޕްތަކުންވެސް ޓްރަމްޕަށް ތާއީދުކޮށް މިއެއްވުމުގައި އަޑުއުފުލާފައި ވެއެވެ. އަދި މީގެތެރޭގައި ރިޕަބްލިކަން ޕާޓީއަށް ނިސްބަތްވާ އެމެރިކާގެ ކޮންގްރެސްގެ ބައެއް މެމްބަރުންވެސް ހިމެނި ވަޑައިގަންނަވައެވެ.
ފާއިތުވެދިޔަ ހަފްތާގައި ޓްރަމްޕަށް ތާއީދުކުރުމުގެ ގޮތުން ފަތާތު ތިން އިވެންޓެއް ކުރިޔަށް ދާނެކަމަށް ސޯޝަލް މީޑިއާގައިވަނީ ޚަބަރު ފަތުރާފައެވެ. މީގެތެރޭގައި ހިމެނެނީ "ވަގަށް ނެގުން ހުއްޓާލާ" އިވެންޓާއި، "ޓްރަމްޕަށްޓަކާ ބާއްވާ ހިގާލުން" އަދި މީގެ އިތުރުން "މިލިއަން ބޮޑު ހިގާލުން" މިނަމުގައި ބާއްވަން ހަމަޖެހިފައިވާ އެއްވުމެވެ. މިގޮތުން މި އެއްވުންތަކުގައި ބައިވެރިވުމަށްޓަކާ އެތައްހާސް ބަޔަކުވަނީ މެންދުރުވުމުގެ ކުރިން، ވައިޓް ހައުސްގެ އިރުން އޮންނަ ފްރީޑަމް ޕްލާޒާއަށް އެއްވާން ފަށާފައެވެ.
މިއެއްވުންތަކަކީ ކުރިން ހުއްދަ ހޯދައިގެން ބާއްވަމުން ގެންދާ ހަރަކާތްތަކެކެވެ.
މި މުޒާހަރާތަކުގެ ކުރިން އެއްވުންތަކުގައި ބައިވެރިވެ ވަޑައިގެންފާނެކަމަށް ވިދާޅުވެ ޓްރަމްޕް ވަނީ ޓުވީޓު ކުރައްވާފައެވެ. އަދި ހޮނިހިރު ދުވަހުގެ އެއްވުން ކުރިޔަށް ދަނިކޮށް، ޓްރަމްޕް ވަނީ މޮޓޯކޭޑްގައި ގޮލްފް ކުޅުއްވުމަށް ވަޑައިގެންނެވި މަގުމަތީގައި އެއްވުމުގެ ބައިވެރިންނަށް ހަނާ އަޅުއްވާފައެވެ.
"ޓްރަމްޕަށްޓަކާ ބާއްވާ ހިގާލުން" މިނަމުގައި ބާއްވަން ހަމަޖެހިފައިވާ އެއްވުމުގައި ވާހަކަ ދައްކަވާ ބެފުޅުންގެ ގޮތުގައި ގާނޫނު ހަދާ މަޖިލީހުގެ ރިޕަބްލިކަން ޕާޓީއަށް ނިސްބަތްވާ މެމްބަރުން ކަމުގައިވާ އެރިޒޯނާގެ ގަވަރުނަރު ޕައުލް ގޯސަރ އާއި ޕެންސިލްވޭނިއާރގެ ގަވަރުނަރު މައިކް ކެލީވެސް މި އެއްވުންތަކުގައި ބައިވެރިންނާ މުޚާތަބުކޮށް ވާހަކަ ދައްކަވާނެކަމަށް އެއްވުން އިންތިޒާމްކުރާ ފަރާތްތަކުން ދުރާލާ އިސްތިހާރު ކޮށްފައިވެއެވެ.
ނޮވެމްބަރު މަހުގެ 3 ވަނަ ދުވަހު ބޭއްވުނު އެމެރިކާގެ ރިޔާސީ އިންތިޚާބު ބައިޑްން ކާމިޔާބު ކޮށްފައިވާ ކަމަށް އެމެރިކާގެ ހުރިހާ މީޑިއާއަކުންވެސް ވަނީ އިއުލާން ކޮށްފައެވެ. އަދި ދުނިޔޭގެ ގިނަ ގައުމުތަކުގެ ލީޑަރުންވެސް ވަނީ ބައިޑްންއަށް މަރުހަބާ ކިޔާފައެވެ.
އެހެންނަމަވެސް، ޓްރަމްޕް ގެންދަވަނީ އިންތިޚާބުގެ ނަތީޖާ ގަބޫލުކުރެއްވުމަށް ދެކޮޅު ހައްދަވަމުންނެވެ. އަދި ޓްރަމްޕް ވަނީ އިންތިޚާބުގައި މަކަރުހަދާ އޮޅުވާލާފައިވާ ކަމަށް ތުހުމަތު ކުރައްވާ، މައްސަލަ އެމެރިކާގެ ސުޕްރީމް ކޯޓަށް ހުށަހަޅުއްވާފައެވެ. އެހެންނަމަވެސް، މިހާތަނަށް އައިރި، އިންތިޚާބު އޮޅުވާލާފައިވާ ކަމަށް އެއްވެސް ސާބިތު ހެއްކެއް ޓްރަމްޕްގެ ލޯޔަރުންނަށް ދެއްކިފައި ނުވާކަމަށް މީޑިއާ ރިޕޯޓުތައް ބުނެއެވެ.
