ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހްގެ ރަނިންމޭޓްކަން ޖުމްހޫރީ ޕާޓީގެ ލީޑަރު ގާސިމް އިބްރާހިމަށް ހުށައަޅުއްވާފައިވާ ކަމަށް މަހިބަދޫ ދާއިރާގެ މެންބަރު އަހުމަދު ތޯރިގް (ޓޮމް) ވިދާޅުވެ ދެއްކެވި ވާހަތައް ޖުމްހޫރީ ޕާޓީން ދޮގުކޮށްފިއެވެ.
ރައީސުލްޖުމްހޫރިއްޔާ މިއަދު މާމިގިއްޔަށް ކުރައްވާ ދަތުރުފުޅަށް އިޝާރާތް ކުރައްވާ ތޯރިގް ވިދާޅުވީ ޖުމްހޫރީޕާޓީގެ ލީޑަރުގެ ރިޔާސީ އުއްމީދު ނިމުމަކަށް ގެނެސް ރައީސް ސޯލިހުގެ ރަނިންމޭޓްކަން އެމަނިކުފާނަށް ހުށަހަޅުއްވާފައިވާ ކަމަށެވެ. އަދި މިއާއިއެކު ޤާސިމް 2023ގައި ވެރިކަމަށް ވަޑައިގެންނެވުމަށް ކުރައްވާ އުންމީދު ފަޑުވެގެން ދިޔައީކަމަށް ޓޮމް ވިދާޅުވިއެވެ.
ޓޮމްގެ ވާހަތަކާއި ގުޅިގެން ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ އެޑްވައިޒަރ އިލްހާމް އަހްމަދު ވިދާޅުވީ މިއީ ކަނޑައެޅިގެން ދޮގުވާހަކަތެއްކަމަށެވެ. މިއަދުގެ މަޝްވަރާތަކުގައި ރައީސް ޞާލިހުގެ ރަނިން މޭޓްކަން ޤާސިމަށް ހުށަހަޅާފައި ނުވާކަމަށް އިލްހާމް ވަނީ ވިދާޅުވެފައެވެ.
ޚިޔާލީ ވާހަކައެއް. ކަނޑައެޅިގެން ދޮގެއް https://t.co/vj4ITdWowh
— Ilham Ahmed (@ilhammaldives) June 10, 2022
ރިޔާސީ އިންތިހާބާ ގުޅޭގޮތުން ރައީސް ވިދާޅުވީ 2023ގެ އިންތިހާބުވެސް އެއް ޕާޓީއަކަށް އެކަނި ނިކުމެ ކާމިޔާބު ނުކުރެވޭނެ ކަމަށެވެ. އަދި އެމަނިކުފާނަށް އޮތް ޔަގީން ކަމަކީ ކޯލިޝަނަކާއެކު ނިކުންނަވާ 2023 ކާމިޔާބު ކުރެއްވުން ކަމަށެވެ.
އިލްހާމް މީގެ ކުރިންވެސް ވިދާޅުވެފައިވަނީ ޖޭޕީގެ ކައުންސިލް ނުވަތަ ލީޑާޝިޕުން ގޮތެއް ނުނިންމާހާ ހިނދަކު ޖޭޕީގެ ފަރާތުން އަންނަ އަހަރުގެ ރިޔާސީ އިންތިޚާބުގައި ވާދަކުރައްވާނީ ގާސިމް ކަމަށެވެ. އަންނަ އަހަރު އޮންނަ ރިޔާސީ އިންތިޚާބުގައި ވާދަކުރައްވާނެ ކަން ގާސިމް އަދި ރަސްމީކޮށް އިޢުލާން ކޮށްފައެއް ނުވެއެވެ. ނަމަވެސް ޖޭޕީގެ އިސް ބޭފުޅުން ގެންދަވަނީ އަންނަ ރިޔާސީ އިންތިޚާބުގައި ގާސިމް ވާދަކުރައްވާނެ ކަމަށް ވިދާޅުވަމުންނެވެ.
ގާސިމް ރިޔާސީ އިންތިޚާބުގައި ވާދަކުރައްވާނެ ކަމަށް ޖޭޕީގެ މެންބަރުން ވިދާޅުވަމުން ގެންދަވާއިރު ގާސިމް އަކީ މި ސަރުކާރު ކޯލިޝަންގެ އެންމެ މުހިއްމު އެއް ބައިވެރިޔާއެވެ.
