ރައީސް ސާލިހު މިއަދު ބޭއްވެވި ޕްރެސް ކޮންފަރެންސް ނިންމަވާލެއްވިތާ ކުޑަ ވަގުތު ކޮޅެއްގެ ތެރޭގައި ގިނަ ބައެއްގެ ޓެކްސްޓް މެސެޖްތަކެއް ލިބެމުންދާ ކަމަށާއި، އަދި މިއީ އަމިއްލަ އެދުން އިސްކޮށް ވެރިކަމަށް ފައިނަގަންވީ ވަގުތު ނޫންކަން ސާފުކޮށްދެއްވުމުގެ ގޮތުން ނަޝީދު ޓުވީޓު ކުރައްވައިފިއެވެ.

ރައީސް ސާލިހު މިއަދު ބޭއްވެވި ޕްރެސް ކޮންފަރެންސް ނިންމަވާލެއްވިތާ ކުޑަ ވަގުތު ކޮޅެއްގެ ތެރޭގައި ނަޝީދު ކުރެއްވި ޓުވީޓުގައި ވިދާޅުވެފައިވަނީ، ވަރަށް ގިނަ ބަޔަކު މެސެޖު ކުރައްވަމުން ގެންދަވާތީ، މިއަދުގެ ހާލަތަކީ، އަމިއްލަ އެދުން އިސްކޮށް ވެރިކަމަށް ފައިނަގަންވީ ވަގުތު ނޫން ކަމަށެވެ.

މިއީ ބޭރު ފައިސާގެ ރިޒާވް ރަގަޅުކޮށް ރައްޔިތުންގެ ސަލާމަތްތެރިކަން ދެމެހެއްޓޭނެ ގޮތަކާމެދު ވިސްނާ މަގަށް އަޅުވަންވީ ވަގުތު.

ނަޝީދު ކުރެއްވި ޓުވީޓުގައި ވިދާޅުވެފައި ވެއެވެ.

Varah gina beyfulhun text kurahvaathee dhanavan.Alhugadah fennagothugai miadhuge haalathakee amilla unmeedhu iskoh verikamah fainaganvee vagutheh noon. Mee beyru faisage reserve ragalhukoh rayyithunge salaamaiytherikan dhemehetteyne gothaamedhu visnaa magah alhuvaanvee vaguthu

— Mohamed Nasheed (@MohamedNasheed) June 8, 2022

މިއަދު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިން ކުރި ސުވާލުތަކަށް ޖަވާބު ދެއްވަމުން ރައީސް ސާލިހު ވިދާޅުވީ 2023 ވަނަ އަހަރުގެ ރިޔާސީ އިންތިޚާބު ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އެމަނިކްފާނަށް އެބައޮތް ކަމުގައެވެ.

އަދި މިހާރު އޮތް ކޯލިޝަނާއެކު އެމްޑިޕީ ނިކުމެ، ރިޔާސީ އިންތިޚާބު ކާމިޔާބު ކުރަން ބޭނުންވާ ކަމަށްވާނަމަ އޮތް ޗޮއިސްއަކީ އެމަނިކްފާނުކަމަށް ގަބޫލު ކުރައްވާކަމަށްވެސް މި ޕްރެސް ކޮންފަރެންސްގައި ފުރަތަމަ ފަހަރަށް ރައީސް ސާލިހު ވަނީ ވިދާޅުވެފައެވެ.

ކުރިއަށް އޮތް ރިޔާސީ އިންތިޚާބުގައި ވާދަކުރެއްވުމާއި ގުޅޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ރައީސުލްޖުމްހޫރިއްޔާ ވިދާޅުވީ، ރާއްޖެއަށް އޮތް އެންމެ ރަނގަޅު ގޮތަކީ އެމްޑީޕީ ވެރިކަމުގައި އޮތުންކަމަށެވެ. އެމްޑީޕީގެ ވެރިކަމެއް ބޭއްވުމަށްޓަކައި، ކުރަންޖެހޭ މަސައްކަތް ކުރުމަކީ ޕާޓީގެ ތެރެއިން ކުރަންޖެހޭ މުހިންމު މަސައްކަތެއްކަމަށް ރައީސް ވިދާޅުވިއެވެ.

އެމަނިކުފާނު ވިދާޅުވީ، ޕާޓީ ތެރެއިން ރިޔާސީ ކެނޑިޑޭޓަކު ކަނޑައެޅުމުގައި އަމަލުކުރާނީ ޕާޓީގެ އުސޫލުތަކާއި އެއްގޮތަށް ކަމަށެވެ. އެންމެ ރަނގަޅު ގޮތަކީ ޕްރައިމަރީއަކުން އިންތިޚާބުގައި ވާދަ ކުރާނެ ކެނޑިޑޭޓަކު ކަނޑައެޅުންކަމަށްވެސް އެމަނިކުފާނު ވިދާޅުވިއެވެ. ރާއްޖޭގައި މިއަދު ގަބޫލު ކުރަންޖެހޭ ހަގީގަތަކީ ކޮންމެ ކެނޑިޑޭޓަކު ނެރުނު ކަމުގައިވީނަމަވެސް ކޯލިޝަނެއްގެ ތެރެއިން ނޫނީ ވެރިކަމަށް ނާދެވޭނެ ކަންކަމަށް ރައީސް ވިދާޅުވިއެވެ.

ކާމިޔާބު ކަމާއިއެކު ގުޅިގެން ކޯލިޝަނެއްގެ ތެރެއިން ވެރިކަންކޮށް އިންތިޚާބު ކާމިޔާބު ކުރުމަށްޓަކައި އެމްޑީޕީއަށް އޮތް އެންމެ ރަނގަޅު ޗޮއިސްއަކީ އެމަނިކުފާނުކަމާށް ރައީސް ވިދާޅުވިއެވެ. އަދި އިންތިޚާބު ކޯލިޝަނަކާއިއެކު ކާމިޔާބު ކުރެވޭނެ ކަމުގެ ފުރިހަމަ ޔަގީންކަން އޮތްކަމަށް ރައީސް ޞާލިހު ވިދާޅުވިއެވެ.

އެންމެ މުހިންމމީ އެމްޑީޕީއަށް ވެރިކަން ލިބުން. އެއީ މުޅި ރާއްޖެއެށް ވެސް އެންމެ ފައިދާ ހުރިގޮތް. މިހާރު ފެށިފައިވާ މަޝްރޫޢުތައް ހުއްޓުމެއްނެތި ކުރިއަށް ގެންދިއުމުގައިވެސް ވެރިކަން އޮތުން މުހިންމު. އަޅުގަނޑުމެންނަށް އެނގިގެން ދިޔަކަމީ އެކަނި އެއްވެސް ޕާޓީއަކަށް ވެރިކަން ކާމިޔާބެއް ނުވާނެކަން. ގިނަ ޕާޓީ އެކުވެގެން ހެދޭ ކޯލިޝަނަކުން ނޫނީ ކާމިޔާބު ނުވާނެކަން އަޅުގަނޑުމެނަށް ވަނީ ސާފުވެފަ. އަޅުގަނޑަކީ ޕާޓީތެރެއިން މިކަމަށް އޮތް އެންމެ ރަނގަޅު ޗޮއިސް. އަޅުގަނޑަށް ޔަގީންކަން އެބައޮތް ކޯލިޝަނާއިއެކު ކުރިއަށް ގޮސް އިންތިޚާބު ކާމިޔާބު ކުރެވޭނެކަން.

2023ގެ ރިޔާސީ އިންތިޚާބުގައި ކުރިމަތި ލައްވުމުގައި ރައީސް ދެކި ވަޑައިގަންނަވާ ގޮތެއް ހާމަކުރެއްވިއިރު، އެމްޑީޕީގެ ޕްރައިމަރީ އޮގަސްޓް 19 ވަނަ ދުވަހު ބޭއްވުމަށް ވަނީ ނިންމާފައެވެ. މި ޕްރައިމަރީގައި، އެމްޑީޕީގެ ޓިކެޓްގައި ވާދަކުރާނެ ކެނޑިޑޭޓެއް ސާފުވެގެންދާނެކަމަށް ބެލެއެވެ.

އޯގަސްޓްމަހު ބާއްވާ އެމްޑީޕީގެ ކޮންގްރެސްގައި ޤާނޫނު އަސާސީއަށް ގެންނަން ފެންނަ އިޞްލާހުތައް ހުށަހެޅުމަށް އެމްޑީޕީގެ ރައީސް އަދި ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވަނީ ނިންމަވާފައެވެ. އެއީ ރާއްޖޭގެ ވެރިކަމުގެ ނިޒާމް ބަރުލަމާނީ ނިޒާމަކަށް ބަދަލުކުރުމަށެވެ. ޤާނޫނު އަސާސީއަށް ރައީސް ނަޝީދު ގެންނަން ބޭނުންފުޅުވާ ބަދަލުތަކުގެ ތެރޭގައި މިނިވަން މުއައްސަސާތަކުގެ ޢަދަދު އެކުލެވިގެންވާ ގޮތަށް ގެންނަން ޖެހޭ އިސްލާހުތައް ކޮންގްރެސްއިން ފާސްކުރުމާއި، ސުޕްރީމް ކޯޓުގެ ފަނޑިޔާރުންގެ އަދަދު ގާނޫނު އަސާސީގައި ކަނޑައެޅުމަށާއި، ގާނޫނު އަސާސީގައި ކަނޑައަޅާނެ ލާމަރުކަޒީ އިތުރު އުސޫލްތައް ކަނޑައެޅުމާއި، ވެރިކަމުގެ ނިޒާމް ބަދަލުކުރުމަށް ފެންނަ ނުފެންނަ ވޯޓެއް ނެގުމަށް ހިމެނެއެވެ.

އަދި ނިޒާމު ބަދަލުކުރުމަށް ފެންނަ ނުފެންނަ ވޯޓް ނަގާނެ ތާރީޚެއް ކަނޑައެޅުމާއި، ފެންނަ ނުފެންނަ ވޯޓުގެ ނަތީޖާއާ އެއްގޮތައް ވެރިކަމުގެ ނިޒާމް ކަނޑައެޅުމަށް ކޮންގްރެސްއިން އެއްބަސްވުންވެސް ރައީސް ނަޝީދުގެ ހުށައެޅުއްވުންތަކުގައި ހިމެނެއެވެ.