ތަލަވުމަކީ ބަޔަކު މަލާމަތްކުރަން ޖެހޭ ވަރުގެ ކަމެއް ނޫން ކަމަށާއި، ބޮލީވުޑްގެ ގިނަ ތަރިންތަކެއް ވެސް ބޮލުގައި އިސްތަށި ފެޅުވުމަށް ހެއާ ޓްރާންސްޕްލާންޓް ސާޖަރީ ހަދާފައިވާ ކަމަށް މޮޑެލް އެކްޓަރު ޕަރަސް ޗަބްރާ ބުނެފިއެވެ.
"ބިގް ބޮސް 13″ ގައި ބައިވެރިވެ މަޝްހޫރުކަން ހޯދި ޕަރަސް މިހެން ބުނެފައިވަނީ، އޭނާގެ ބޮލުގައި އިސްތަށި ނުހުންނާތީ އަބަދުވެސް އިސްތަށިގަނޑެއް ޖަހާފައި ހުންނަ ވާހަކައާ ބެހޭގޮތުން ނޫހަކުން ކުރި ސުވާލަކާ ގުޅިގެންނެވެ. އެގޮތުން، ބޮލުގައި އިސްތަށިގަނޑެއް ޖަހާފައި ހުންނާތީ ގިނަ ބަޔަކު މަލާމަތް ކުރޭތޯ އެހުމުން ޕާރަސް ބުނީ، މަލާމަތް ކުރިކަމުގައި ވިޔަސް އޭނާގެ ފަރުވާލެއް ނެތް ކަމަށެވެ.
"އަހަންނަކަށް ހިއެއް ނުވޭ އަހަންނަށް މަލާމަތްކުރުމުގެ ހައްގެއް އެއްވެސް މީހަކަށް އޮންނާނެ ހެންނެއް. އެއީ، އަހަރެން ބޮލުގައި އިސްތަށި ނެތް އިރެއް އެމީހުންނަށް ފެނިފައެއް ނުވާނެ. އަބަދުވެސް އަހަރެންގެ ބޮލުގަ އިސްތަށިގަނޑެއް އޮއްވާ ފެންނާނީ. މިސާލަކަށް ތަލަކޮށް ހުއްޓައި ފެނިގެން މަލާމަތް ކުރަން ރަނގަޅު"، ޕަރަސް ބުންޏެވެ.
މީގެ އިތުރުން ޕަރަސް ބުނީ، ބޮލުން އިސްތަށި ފައިބާ ތަލަވުމަކީ އާދައިގެ ކަމެއް ކަމަށާއި، މަޝްހޫރު މީހުންނަށް ބެލިކަމުގައި ވިޔަސް އެކަން ފެނިގެންދާނެ ކަމަށެވެ. އެގޮތުން، ރަންބީރު ކަޕޫރާއި ޝާހިދު ކަޕޫރު މެން ފަދަ ތަރިންނަކީ ހެއާ ޓްރާންސްޕްލާންޓް ހަދާފައިވާ ތަރިން ކަމަށް ޕަރަސް ބުންޏެވެ.
"އަހަންނަކީ އެކްޓަރަކަށް ވިއްޔާ، އެކި ކެރެކްޓާތަކާ އެއްގޮތަށް އަހަރެންގެ ސިފަޔަށް ބަދަލު ގެނެވޭނެ. މި ދާއިރާގަ މީހުން ބަލައިގަންނަނީ ބޮލުގަ ހުންނަ އިސްތައްޓަށް ބަލައިގެންނެއް ނޫން"
– ޕަރަސް
"ބިގް ބޮސް 13″ އަށްފަހު ޕާރަސް ގިނައިން ފެނިފައިވަނީ ވީޑިއޯ ލަވަތަކުންނެވެ. އަދި "ބިގް ބޮސް 14″ ގައި ވެސް، ބައިވެރިއެއްގެ ކަނެކްޝަނަށް ވެގެން ޕަރަސް އެއް ހަފްތާ ބިގްބޮސްގެ ގޭގައި މަޑުކޮށްފައިވެއެވެެ.
