ރާއްޖޭގެ އިޤްތިޞާދީ ހާލަތު މިއަދު އޮތް ހިސާބަށް ބަލާއިރު، މިއީ ރާއްޖޭގައި ބްރިޖު އަޅަންވީ ވަގުތު ނޫންކަމުގައި ޕީޕީއެމްގެ ރައީސް، އަދި އަދިކޮޅު ލީޑަރު ރައީސް ޔާމީން ވިދާޅުވެއްޖެއެވެ.

އިދިކޮޅު ކޯލިޝަނުން މިރޭ "މަވެސް ޕީޕީއެމް" ނަމުގައި ބޭއްވި ޖަލްސާގައި ވާހަކަ ދައްކަވަމުން ރައީސް ޔާމީން ވިދާޅުވީ ރާއްޖޭގެ އިޤްތިޞާދީ ހާލަތާއިމެދު ދުނިޔޭގެ ބޮޑެތި ޖަމްއިއްޔާތަކާއި، މާލީ އިދާރާތަކުން ފާޅު ކުރަމުންދާ ކަންބޮޑުވުންތަކަކީ ވަރަށް ސީރިއަސްކޮށް ނަގަންޖެހޭ ކަންތައްތަކެއްކަމަށެވެ. އެކަންކަން ބޮލާލައި ޖަހައި، އެއްބަޔަކު ކުރި ކަމެއް ކުރަން ހިތުއަޅައި، ވާދައަށް ކަމެއްކޮށްލުމުގެ ނިޔަތުގައި އިޤްތިޞާދަށް ވާނެ ގޮތެއް ނުބަލައި ކަންކަން ކުރުމަކީ ކޮށްގެންވާނެ ކަމެއް ނޫންކަމަށް ރައީސް ޔާމީން ވިދާޅުވިއެވެ.

އެމަނިކުފާނު ވިދާޅުވީ ރާއްޖޭގެ ފައިސާގެ އަގު މިއަދު ނެތްކަމަށެވެ. ދުނިޔޭގެ އިޤްތިޞާދާއި، ޤައުމުގެ ހާލަތު މިއަދުއޮތް ހާލަތަށް ބެލުމެއްނެތި މުސާރަތައް ބޮޑުކޮށް، ކަންކަން ކުރަމުންދަނީ ރާއްޖޭގެ އިޤްތިޞާދަށް އެއްވެސް ވަރަކަށް ބެލުމެއް ނެތިކަމަށް ރައީސް ޔާމީން ވިދާޅުވިއެވެ.

ދިވެހި ރުފިޔާއަކީ، ފާހާނައިގެ ގެންގުޅޭ ޓީޝޫ ޕޭޕަރާއި ހަމައަށް ދަށްވެއްޖެނަމަ، މިއީ ވަރަށް ޒިންމާދާރުކަން ކުޑަކޮށް ހިންގާ ދައުލަތެއް. ދައުލަތުގެ ފައިސާ ނެތްއިރު، ކޮން ބްރިޖެއްތޯ އަޅަން މިއުޅެނީ. ބަޔަކު ބްރިޖު އެޅިއޭކިޔާފަ ބްރިޖު އަޅަންނުޖެހޭ. ބްރިޖެއް އެޅީތީ ބްރިޖެއް އަޅަންޔާ މިކަން ހަމައެއް ނުޖެހޭ. ޚަރަދު ދެކޮޅެއް ނުޖެހޭ.

– ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ މިސަރުކާރުން އަޅަން ގަސްތުކުރާ ބްރިޖަކީ އިޤްތިޞާދީ ގޮންތުން އަދި މާލީ ގޮތުން ކޮން މަންފާއެއް ކުރާނެ ބްރިޖެއްކަން މިސަރުކާރަށް ހާމަކުރެވިފައި ނުވާކަމަށެވެ. ނަމަވެސް އެމަނިކުފާނުގެ ވެރިކަމުގައި އެޅި ބްރިޖަކީ ކިހާވަރެއްގެ މަންފާއެއް ކުރާނެ ބްރިޖެއްކަން އެމަނިކުފާނު ވިދާޅުވެ ނުދެއްވިޔަސް މިއަދު ދިވެހި ރައްޔިތުންނަށް ސާފުވާނެކަމަށެވެ.

އެމަނިކުފާނު ވިދާޅުވީ، ވިލިމާލެ ބްރިޖަކީ ޗައިނާ ސަރުކާރުން ހިލޭ އަޅަން ވައުދުވެފައިވާ ބްރިޖެއްކަމަށެވެ. ނަމަވެސް އެމަނިކުފާނަށް ވެރިކަން ނުލިބުމުން އެކަން ހުއްޓުނީކަމަށެވެ. ރައީސް ޔާމީން ވިދާޅުވީ އެމަނިކުފާނު ވެރިކަމުގައި އެޅި ޗައިނާ ފްރެންޑުޝިޕް ބްރިޖުގެ އަގަކީ 210 މިލިޔަން ޑޮލަރުކަމަށެވެ. މިފައިސާގެ ތެރެއިން ލޯނުގެ ގޮތުގައި ސަރުކާރުން ދައްކަން ޖެހުނީ އެންމެ 68 މިލިޔަން ޑޮލަރު ކަމަށާއި، އެދަދު ދައްކަން އޮތީވެސް ދެ ޕަސެންޓް އިންޓަރސެޓްގައި 20 އަހަރުން ކަމަށެވެ.

ރައީސް ޔާމީން ވިދާޅުވީ މިސަރުކާރުން އަޅާ ބްރިޖަށް 400 މިލިޔަން ޑޮލަރަކީ ދައުލަތުން ދައްކަންޖެހޭ ފައިސާކަމަށެވެ. ނަމަވެސް މިއީ މިވަރުގެ ހޭދައެއްކޮށްގެން ރައްޔިތުންނަށް މާލީ އެއްވެސް މަންފާއެއް އޮތް ބްރިޖެއް ނޫންކަމަށް ރައީސް ޔާމީން ވިދާޅުވިއެވެ. އަދި މީގެ އިންޓަރސްޓުވެސް، މާލީ ބުރަވެސް އިންތިހާއަށް ބޮޑުކަމަށް ރައީސް ޔާމީން ވިދާޅުވިއެވެ.

ތިލަމާލެ ބްރިޖަކީ 6.7 ކިލޯ މީޓަރުގެ ބްރިޖެކެވެ. މިއީ 500 މިލިއަން ޑޮލަރުގެ މަޝްރޫއެކެވެ. އެއީ 7 ބިލިއަނަށްވުރެ ގިނަ ރުފިޔާއެވެ. މި މަޝްރޫޢު ކުރިއަށް ގެންދަނީ އިންޑިއާ ސަރުކާރުން ދޭ 100 މިލިއަން ޑޮލަރުގެ ގްރާންޓާއި 400 މިލިއަން ޑޮލަރުގެ ލައިން އޮފް ކްރެޑިޓްގެ ދަށުންނެވެ. އަދި ދަޢުލަތުން ޚަރަދުކުރުމަށްވެސް ވަނީ ހަމަޖެހިފައެވެ.

ރައީސް ޔާމީން ވިދާޅުވީ މިކަންކަމާއި ދިވެހި ޒުވާނުން ފުންކޮށް ވިސްނާލަން ޖެހޭކަމަށެވެ. ނިމިދިޔަ ވެރިކަމުގައި ކުރެއްވު ކޮންމެ ކަމަކީ ސީދާ ރައްޔިތުންނާއި ގުޅުންހުރި ކަންތައް ކަމަށާއި، އެއީ ބްރިޖާއި، ދަރުމަވަންތަ ހޮސްޕިޓަލާއި، ކޮތަރު ކޮއްޓަށް ބެލިނަމަވެސް ކޮށްފައިވާނީ ރައްޔިތުންނަށް އެގައި މާލީ މަންފާ ބޮޑު މަޝްރޫތަކެއްކަމަށެވެ. ވާދައަށް ކަމެއް ކުރުމަކީ އޭގެ ނަތީޖާ އޭގެ ބުރަ ދިވެހި ރައްޔިތުން އުފުލަންޖެހޭނެ ކަމަށްވިދާޅުވެ ރައީސް ޔާމީން ވަނީ މިސަރުކާރަށް ވަރަށް ބޮޑަށް ފާޑު ވިދާޅުވެފައެވެ.