ތިލަމާލެ ބްރިޖު މަޝްރޫޢުގެ ދަށުން ރާއްޖެއަށް އިންޑިއާ ސިފައިން އެތެރެކުރަން އުޅޭކަމަށް ނައިފަރު ދާއިރާގެ މެންބަރު އަދި ޕީޕީއެމްގެ ނާއިބު ރައީސް އަޙްމަދު ޝިޔާމް ތުހުމަތުކުރައްވައިފިއެވެ.
ބްރިޖު މަޝްރޫއު ހިންގާ އެފްކޮންސްއިން ވަނީ މާލެ ވިލިމާލެ ގުޅުވާލާ ބްރިޖު އަންނަ އަހަރުގެ ޖުލައިމަހަށް ނިމޭނެކަމަށް ބުނެފައެވެ. އަދި މި އަހަރު ނިމޭއިރު އެ މަޝްރޫޢު ހިންގަން ރާއްޖޭގައި 1000އަށްވުރެ ގިނަ އެކުންފުނީގެ މުވައްޒަފުން ތިބޭނެކަމަށްވެސް އެކުންފުނިން ބުންޏެވެ.
މިކަމާއި ގުޅިގެން ޝިޔާމް ވިދާލުވީ 2023ގެ ރިޔާސީ އިންތިޚާބުގެ ކުރިއަށް ބްރިޖު ހެދުމުގެ ނަމުގައި ގިނަ ޢަދަދެއްގެ އިންޑިއާ ސިފައިން މި މަޝްރޫޢުގެ ކޯޓާގައި ރާއްޖެ އެތެރެކުރަން އުޅޭކަމަށެވެ. މިހާރުވެސް މިރާއްޖޭގެ އެކި މަސައްކަތްތެރިންގެ ގޮތުގައި އިންޑިއާ ސިފައިން ހަރަކާތްތެރިވާކަމަކީ އެންމެން ދައްނަ ހަގީގަތެއްކަމަށްވެސް ޝިޔާމް ވިދާޅުވިއެވެ.
ޝިޔާމް މިގޮތަށް ތުހުމަތުކުރައްވާފައިވާއިރު، އިދިކޮޅުން އަންނަނީ ރާއްޖޭގައި އިންޑިއާ ސިފައިން ޤާއިމްވެ ތިބޭކަމަށް ބުނެ އެކަމާއި ދެކޮޅަށް އަޑު އުފުލަމުންނެވެ. އަދި އިންޑިއާ ސިފައިން ރާއްޖެއިން ބޭރުމަށް ގޮވާލާ އިންޑިއާ އައުޓް ހަރާކްތ ރާއްޖޭގައި އަންނަނީ ފުޅާކުރަމުންނެވެ.
ނަމަވެސް އެއީ ޤައުމީ ސަލާމަތަށް އޮތް ނުރައްކަލެއްކަމަށްބުނެ ރައީސްގެ ޤަރާރަކުން ވަނީ އެ ހަރަކާތް ހުއްޓުވުމަށް އިދާރާތަކަށް އަމުރުކުރައްވާފައެވެ.
One Response
މިމީހުންނަށް މިފެންނަނީ ބްރިޖް ހެދިޔަސް، ޑޮކްޓަރަކަށް ޓިޗަރަކަށް އަޔަސް، ކޮންސްޓްރަކްސަން މަސައްކަތުއަޔަސް ހުސް އިންޑިޔާ ސިފައިންނެވެ. ތިޔަ ތިއްބަވަނީ ހަމަ ހޭގައި ހެއްޔެވެ؟ ތިޔަ އުޅެނީ ކޮންބަޔަކު ހެއްދޭނެ ކަމަށް ހެއްޔެވެ؟ އެއްދުވަހަކު ބުނި ޔާމީން ދެތިން އަންހެނުން މަގުމައްޗަށް ނެރޭއިރަށް އިންޑިޔާ މިލިޓްރީ ބިރުންގޮސް ފައިބައިގެން ހިގައްޖެއެވެ. އަދިވެސް ދޮގާއި މަކަރުން ދިވެހިން ހެއްލޭނެ ކަމަށް ހެއްޔެވެ؟