ރައްޔިތުންގެ މަޖިލީހުގެ ރައީސް އަދި ކުރީގެ ރައީސް ރައީސް މުހައްމަދު ނަޝީދު އަވަހާރަކޮށްލަން ދިން ޓެރެރިސްޓް ހަމަލާއާއި ގުޅިގެން ދަޢުވާ އުފުލާފައިވާ މީހުން ޝަރީއަތަށް މީހުން ހާޒިރު ނުކުރެވުނީ މޫސުން ގޯސްވެ "ވައިޓް އެލާޓް" ނެރަފައިވުމުންކަމަށް ކަރެކްޝަނަލް ސާވިސްއިން ބުނެފިއެވެ.
ރައްޔިތުންގެ މަޖިލީހުގެ ރައީސް އަދި ކުރީގެ ރައީސް ރައީސް މުހައްމަދު ނަޝީދު އަވަހާރަކޮށްލަން ދިން ޓެރެރިސްޓް ހަމަލާއާއި ގުޅިގެން ދަޢުވާ އުފުލާފައިވާ މީހުންގެ ޝަރީޢަތުގެ އަޑުއެހުން ކެންސަލްކޮށްފައެވެ.
މިއަދު ހެނދުނު 09:00އަށް ތައާވަލުކޮށްފައިވާ އަޑުއެހުން ކެންސަލްކުރީ ޖަލުގައި ތިބި ދައުވާ ލިބޭ މީހުން ކޯޓަށް ޙާޒިރު ނުކުރެވިގެންކަމަށް ކްރިމިނަލް ކޯޓުން ބުންޏެވެ. މޯލްޑިވްސް ކަރެކްޝަނަލް ސާރވިސްގެ ބެލުމުގެ ދަށުގައި ތިބި މީހުން ޝަރީޢަތަށް ޙާޒިރުނުކުރެވުނީ މޫސުން ގޯސްވެ ކަނޑުގަދަވުމުގެ ސަބަބުންކަމަށް ކޯޓުން ވަނީ ބުނެފައެވެ.
ކަރެކްޝަނުން ބުނެފައިވަނީ ބޮމުގެ ހަމަަލާއާއި ގުޅިގެން ބަންދުކޮށްފއިވާ ފަރާތްތައް މިއަދު ޝަރީއަތައް ހާޒިރު ކުރެވިފައި ނުވަނީ މޫސުމް ގޯސްވެ، މޯލްޑިވްސް މީޓިއޮރޮލޮޖިކަލް ސަރވިސްއިން "ވައިޓް އެލަރޓް" ނެރުމާ ގުޅިގެންނާއި، މި މައްސަލައިގެ ބަންދުމީހުން ވަކި ވަކިން ގެންގުޅެން ޖެހޭތީ ކަމަށެވެ. މިކަން ވާނީ ކޯޓަށްވެސް ހިއްސާކުރެވިފައިކަމަށް ކަރެކްޝަނުން ވަނީ ބުނެފައެވެ. ކަރެކްޝަނުން ބުނެފައިވަނީ މި މައްސަލައަކީ އެސާވިސްއިން ވަރަށް ސީރިއަސް މައްސަލައެއްގެ ގޮތުގައި ދެކޭ މައްސަލައެއް ކަމަށެވެ.
ކަނޑުމަތިން ގައިދީންނާއި، ބަންދުމީހުން އެއްތަނުން އަނެއްތަނަށް އުފުލުމަކީ ރިސްކުބޮޑު ކަމަށްވާއިރު، އަދި އެފަރާތްތަކުގެ ސަލާމަތާއި ރައްކާތެރިކަން ކަށަވަރުކުރުމަކީ ކަރެކްޝަންގެ މައްޗަށް ލާޒިމްކަމަކަށް ވީހިނދު، މޫސުމް ގޯސްވުމުގެ ސަބަބުން ހިނގާފާނެ ހާދިސާއަކަށް ރައްކާތެރި ވުމުގެ ފިޔަވަޅު އަޅަންޖެހޭކަމަށް ކަރެކްޝަނުން ވަނީ ބުނެފައެވެ. މީގެ ކުރިންވެސް މޫސުން ގޯސްވުމުން ޝަރީއަތްތަކަށް މީހުން ނެގެނެވި ކެންސަލް ވެފައިވާކަން ކަރެކްޝަނުން ވަނީ މިބަޔާނުގައި ފާހަގަކޮށްފައެވެ.
ނަޝީދުގެ މައްސަލައިގެ ޝަރީއަތް ކުރިއަށް ނުދާތީ ތަކުރާރުކޮށް އެމަނިކުފާނުގެ ވަކީލުން ދަނީ ކަންބޮޑުވުން ފާޅު ކުރަމުންނެވެ.
