އެމެރިކާއިން ޔޫކުރެއިންއަށް އަސްކަރީ އެހީތެރިކަން ފޯރުކޮށްދިނުމަށް އެތައް ބިލިއަން ޑޮލަރެއް ޚަރަދު ކުރުމުގެ ކުރިން، އެެމެރިކާގެ ސްކޫލްތަކުގެ ރައްކާތެރިކަން ކަށަވަރު ކޮށްދިނުމަށް ކުރީގެ ރައީސް ޑޮނަލްޑް ޓްރަމްޕް ގޮވާލައްވައިފިއެވެ.

އެމެރިކާގައި ހަތިޔާރު ގެންގުޅުމަށް ތާއީދުކުރާ ފަރާތްތަކުން އިންތިޒާމް ކޮށްގެން ބޭއްވި ޚާއްސަ ބައްދަލުވުމުގެއްގައި ވާހަކަ ދައްކަވަމުން ޓްރަމްޕްވަނީ، ސްކޫލްތަކުގެ ރައްކާތެރިކަން ކަށަވަރު ނުކުރެވެނީސް، އެމެރިކާއިން ޔޫކުރެއިންއަށް 40 ބިލިއަން ޑޮލަރު ފޯރުކޮށްދޭން ނިންމާފައިވާ ނިންމުމާމެދު ސުވާލު ކުރައްވާފައެވެ.

އެމެރިކާގައި ހަތިޔާރު ގެންގުޅޭ މީހުންގެ އެންމެ ބޮޑު ޖަމިއްޔާ، ނޭޝަނަލް ރައިފަލް އެސޯސިއޭޝަންއިން އިންތިޒާމްކުރާ މި ބައްދަލުވުން ކުރިޔަށްދަނީ އެގައުމުގެ ހޯސްޓަން ސިޓީގައެވެ.

މި ކޮންފަރެންސް ބޭއްވިގެން މިދަނީ، އެމެރިކާގެ ޓެކްސަސްގެ ސްކޫލެއްގައި ފާއިތުވެދިޔަ ހަފްތާފައި ދިން ބަޑީގެ ހަމަލާއެއްގައި އެ ސްކޫލުގައި ކިޔަވަމުންދިޔަ 19 ކުޑަކުދިންނާއި ދެ ޓީޗަރަކު މަރުވެފައި ވަނިކޮށެވެ.

"އެހެން ގައުމުތައް ބިނާ ކުރުމުގެ ކުރިން އަހަރެމެން އެބަޖެހޭ އަހަރެމެންގެ އަމިއްލަ ގައުމުގެ ސްކޫލްތަކުގައި ކިޔަވަމުންދާ ދަރިވަރުންނަށް ރައްކާތެރި މާހައުލެއް ކަށަވަރު ކުރަން،" ހުކުރު ދުވަހު ބޭއްވުނު މި ބައްދަލުވުމުގައި ވާހަދައްކަވަމުން ޓްރަމްޕް ވިދާޅުވެފައި ވެއެވެ. ޓްރަމްޕްގެ ވާހަކަފުޅަށް ޖަލްސާގެ ހޯލުގައިތިބި އެތައްބަޔަކުވަނީ ތަރުހީބު ދިނުމުގެ ގޮތުން އަތްޖަހާފައެވެ.

މިމަހުގެ ކުރީކޮޅު އެމެރިކާގެ ކޮންގްރެސްގެ ބޮޑު އަޢުލަބިއްޔަތަކުން، ޔޫކުރެއިންއަށް 40 ބިލިއަން ޑޮލަރުގެ އަސްކަރީ އަދި އިންސާނީ އެހީ ފޯރުކޮށްދިނުމަށް ވަނީ ފާސްކޮށްފައެވެ.

ފާއިތުވެދިޔަ ހަފްތާގައި 18 އަހަރުގެ ޒުވާނަކު، އެމެރިކާގެ ޓެކްސަސްގެ ޕްރައިމަރީ ސްކޫލަށް ވަދެ ދިން ބަޑީގެ ހަމަލާގައި 19 ކުޑަކުދިންގެ އިތުރުން އެ ސްކޫލުގައި ކިޔަވަމުންދިޔަ ދެ ޓީޗަރަކުވެސް ވަނީ މަރުވެފައެވެ.

މި ހަމަލާގައި މަރުވެފައިވާ ކުދިންނަކީ އުމުރުން 7 އަހަރާއި 10 އަހަރާއި ދެމެދުގެ، ގްރޭޑް 3 އަދި 4ގައި ކިޔަވަމުންދިޔަ ކުދިންނެވެ.