އިންޑިއާ ސިފައިން ބާލަން ގޮވާލާ ހިންގާ "އިންޑިއާ އައުޓް" ކެމްޕެއިނަށް ތާއީދެއް ނެތްކަން ސާބިތުވާކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.

"ބާކީނުވޭ" ހޭޝްޓެގައެކު ކުރެއްވި ޓްވީޓްގައި ނަޝީދު ވިދާޅުވީ ސިޔާސީ ވެރިންގެ ބޭނުމަށްޓަކައި ދިވެހިން ބާކީވެ ނިކަމެތިވާނެކަންކަން ނުކުރުމަށް ހުރިހާ ސިޔާސީ ވެރިން ވިސްނަންވާނެކަމަށެވެ. އިންޑިއާ އާއި ދެކޮޅަށް ހިންގާ ކެމްޕެއިނަކީ ދިވެހިންގެ ތާއީދު އޮތް ކަމެއްނޫންކަން ސާބިތުވަނީ އެކަމުގައި ބައިވެރިވާ މީހުންގެ ޢަދަދު މަދުކަމުންކަމަށް ނަޝީދު ވިދާޅުވިއެވެ.

Siyaasee veringe siyaasee beynumah takai Dhivehin baakeeve nikamethi vaane kankan nukurumah huriha siyaasee verin visnavan vaane. India aai dhekolhah hingaa campaign akee Dhivehinge thaaidhu oiy kameh noon kan saabith vanee ekamugai baiveri vaa meehun madhukamun #Baakeenuvey

— Mohamed Nasheed (@MohamedNasheed) May 26, 2022

އިދިކޮޅު ލީޑަރު ރައީސް ޔާމީން އިސްވެ ހިންގާ އިންޑިއާ އައުޓް ހަރަކާތާއި ސީދާ ދެކޮޅުކަން ރައީސް ނަޝީދު ގެންދަވަނީ ތަކުރާރުކޮށް ހާމަކުރައްވަމުންނެވެ. އިންޑިއާ އައުޓް ހަރަކާތަކީ ޤައުމީ ސަލާމަތަށް އޮތް ނުރައްކަލެއްކަމަށް ބުނެ ރައީސް ޞާލިޙްގެ ޚައްޞަ ރިޔާސީ ޤަރަރާރަކުން ވަނީ އެ ހަރަކާތް ހުއްޓުވުމަށް ކަމާބެހޭ އިދާރާތަކަށް އަމުރުކުރައްވާފައެވެ.

ނަމަވެސް އެ ހަރަކާތް އިދިކޮޅުން ހުއްޓާލާފައެއް ނުވެއެވެ. އެ ހަރާކާތް ހިންގުމަށް މަގުތަކަށް އެއްވެ އިހްތިޖާޖުކުރާއިރު ބެނާތައްވެސް ދަނީ ދަމަމުންނެވެ.

ރައީސް ގެ ގަރާރަށް އިޝާރާތްކުރައްވާ ރައީސް ޔާމީން ވިދާލުވެފައިވަނީ، އިންޑިއާއިން ރާއްޖޭގައި ހިންގަމުންދަނީ ބޮޑެތި ޖަރީމާތަކެއްކަމަށެވެ. "އިންޑިއާ އައުޓް" ގެ ނަމުގައި ޤާނޫނު އަސާސީން ލިބިދީފައިވާ ޚިޔާލުފާޅު ކުރުމާއި، އެއްވެ އުޅުމުގެ މިނިވަންކަމުގެ ބޭނުން ދިވެހި ރައްޔިތުން ކުރުމުން އެކަން ހުއްޓުވަން އުޅެނީ އިންޑިއާގެ ޖަރީމާތައް ފޮރުވުމަށް ކަމަށް ރައީސް ޔާމީން ވިދާޅުވިއެވެ.

ރައީސް ޔާމީން ވިދާޅުވީ އިންޑިއާ އައުޓް ގޮވުން ދުވަސްކޮޅަކަށް ހުއްޓުވައި ބެނާތައް ނެގިދާނެ ކަމަށެވެ. ނަމަވެސް ރައްޔިތުންގެ ހިތުގެ ޝުއޫރާއި، ވިސްނުމުގައި ހުރި ޚިޔާލާއި، ރައްޔިތުން ޤައުމަށްޓަކައި ވާން ބޭނުންވާނީ ޤުރުބާނީ ފުހެލާނެ ގޮތެއް ނޯންނާނެ ކަމަށްވެސް އެމަނިކުފާނު ވިދާޅުވިއެވެ.

ރައީސް ޔާމީން ވަނީ "އިންޑިއާ އައުޓް" ހަރަކާތުގައި އިސްކޮށް އުޅުއްވާ ބޭފުޅުން ހައްޔަރު ކުރަމުންދާތީ އެކަމަށް ފާޑުވިދާޅުވެފައެވެ. އެމަނިކުފާނު ވިދާޅުވީ އެކި ތުހުމަތުތަކުގައި ސާފު ހެކި ހުރި ކަމަށް ވިދާޅުވެ ބައެއް ބޭފުޅުން ހައްޔަރު ކުރަނީ އެއްވެސް އަސާސެއް ނެތި ކަމަށެވެ. އަދި ފުލުހުން ތައްޔާރު ކުރާ އިންޓެލިޖެންސް ރިޕޯޓަކީ މިއަދު އެއްވެސް ރައްޔިތަކު ގަބޫލު ކުރާނެ ރިޕޯޓެއް ނޫން ކަމަށް ވިދާޅުވިއެވެ.

އެމަނިކުފާނު އިތުރަށް ވިދާޅުވީ މި ސަރުކާރަކީ ވަރަށް ބޮޑަށް އިންޑިއާ ދަށުވެ ފިތިބާރުވެފައި އޮތް ސަރުކާރެއް ކަމަށެވެ. "އެއްވެސް ކަހަަލަ އަބުރެއް އިއްޒަތެއް ޝަރަފެއް ދަންނަ ބައެއް ނޫން. އެހާވަރަށް ތިބީ ފިތިބާރުވެފައި،" ރައީސް ޔާމީން ވިދާޅުވިއެވެ.