ސްޓެލްކޯއިން ކޮންސްޓްރެކްޝަން މާކެޓަށް ވަނުމުގެ ވިސްނުމެއްނެތް ކަމުގައި ސްޓެލްކޯގެ މެނޭޖިން ޑިރެކްޓަރ އަހުމަދު ޝަރީފް ވިދާޅުވެއްޖެއެވެ.
ސްޓެލްކޯގެ އެމްޑީ މިހެން ވިދާޅުވީ ސަރުކާރުން ހިއްސާވާ ބައެއް ކުންފުނިތަކުން އެ ކުންފުނިތަކުގެ ވިޔަފާރި ފުޅާކުރުމުގެ ގޮތުން ކުންފުނި އުފެއްދި ބޭނުން ނޫން އެހެން ދާއިރާތަކުގައި މަސައްކަތް ކުރާކަމަށް ބުނެ ބައެއް ފަރާތްތަކުން ސްޓެލްކޯއަށް ތުހުމަތު ކުރާ ވާހަކަތަކާއި ގުޅިގެންނެވެ.
ޝަރީފް ވިދާޅުވީ ސްޓެލްކޯއިން އިމާރާތްކޮށް، ކޮންސްޓްރެކްޝަން ދާއިރާއަށް ވަނުމުގެ ވިސްނުމެއް ނުގެން ގުޅުއްވާކަމަށެވެ. އެފަގަދަ ގޮތަކަށް ކުންފުނީގެ ސިޔާސަތު ބަދަލު ކުރުމުގެ ވިސްނުމެއްވެސް ނުގެން ގުޅުއްވާކަމަށެވެ. އަދި އެފަދަ އެއްވެސް މަޝްރޫޢަކަށް ބިޑްވެސް ކޮށްފައި ނުވާނެކަމަށް ޝަރީފް ވިދާޅުވިއެވެ.
ސްޓެލްކޯއިން އިމާރާތް ކުރުމުގެ މަޝްރޫޢުތަކަށް ބިޑް ނުކުރޭ، އަދި ކޮންސްޓްރެކްޝަން މާކެޓަށް ވަނުމުގެ ވިސްނުމެއްނެތް.
– ޝަރީފް ވިދާޅުވިއެވެ.
ސަރުކާރު ހިއްސާވާ ކުންފުނިތައް އިމާރާތް ކުރުމުގެ ދާއިރާއަށް ވަނުމަކީ ސަރުކާރުގެ ސިޔާސަތެއް ނޫން ކަމަށާއި އެކަން އެގޮތަށް ކުރުމާއި މުޅިން ދެކޮޅު ކަމަށް ޕްލޭނިން މިނިސްޓަރ މުހައްމަދު އަސްލަމްވެސް ވަނީ އިއްޔެ މަޖިލީހުގައި ވިދާޅުވެފައެވެ.
ވިޔަފާރި ފުޅާކުރުމުގެ ނަމުގައި ކަމާއި ނުގުޅޭ އެހެން ދާއިރާތަކަށް ސަރުކާރުގެ ކުންފުނިތަކުން ވަނުމަކީ އެ ކުންފުނިތަކުގެ މައިގަނޑު މަސައްކަތާމެދު ފޯކަސް ގެއްލޭނެ ކަމެއް ކަމަށާއި އެކަމުގެ ސަބަބުން ލިބޭ ފައިދާއަށްވުރެ ގެއްލުން ބޮޑުވާނެ ކަމަށް އަސްލަމް ވިދާޅުވިއެވެ.
