ބޮލީވުޑްގެ މެދު އުޑުގައި ފިޔަ ޖަހަމުން އަންނަ އެކްޓްރެސް އަނުޝްކާ ޝަރުމާ، އޭނާގެ ފިރިމީހާ، އިންޑިއާ ކްރިކެޓް ކެޕްޓަން ވިރާޓް ކޯލީ އާއި ފުރަތަމަ ފަހަރަށް ދިމާވި ގޮތް އެނގޭ ހެއްޔެވެ.؟
އިންޑިއާގެ މުނިފޫހިލުވުމުގެ ޚަބަރުތައް ގެނެސްދޭ ނޫސްތަކުން ވަނީ ވިރާޓާއި އަނުޝްކާ ބައްދަލުވިގޮތް އަނުޝްކާއާ ހަވާލާދީ ހިއްސާކޮށްފައެވެ.
އަނުޝްކާއާއި މަޝްހޫރު ކްރިކެޓް ކުޅުންތެރިޔާ ވިރާޓް ފުރަތަމަ ބައްދަލުވީ، 2013 ވަނަ އަހަރު ޝޭމްޕޫ އިޝްތިހާރެއްގެ ޝޫޓުންނެވެ. އެ އިޝްތިހާރު ޓީވީން ދައްކަން ފެށުމާއެކު، ގިނަ ބަޔަކު ވަނީ އެދެމީހުންގެ މެދުގައިވާ ކެމިސްޓްރީ ކަމުގޮސްގެން ވާހަކަ ދައްކާފައެވެ. ނަމަވެސް އަނުޝްކާ ބުނީ އޭރު އެކަހަލަ އެއްވެސް ގުޅުމެއް ވިރާޓާ ނޯންނާނެ ކަމަށެވެ.
އަނުޝްކާ ބުނީ ފުރަތަމަ ބައްދަލުވިއިރު ވިރާޓަކީ ވަރަށް ފޮނި މީހެއް ކަމަށް އޭނާއަށް ހީވި ކަމަށާއި، އެހެންކަމުން އޭނާ ވެސް ވިރާޓްގެ ކުރިމަތީގައި "ފޮނިވީ" ކަމަށެވެ.
އެކަމަކު 3 ދުވަސް ހޭދަވި އެ ޝޫޓިންގައި، ވިރާޓުގެ ހަގީގީ ސިފަ އެނގިގެން ދިޔަކަމަށް އަނުޝްކާ ބުންޏެވެ. އެގޮތުން ވިރާޓަކީ ވަރަށް ވިސްނޭ، މީހުންނާ ގުޅޭ، މަޖާ މިޒާޖެއްގެ މީހެއްކަން އެނގުމުން އޭނާ ވަރަށް ކަމުދިޔަ ކަމަށް އަނުޝްކާ ވަނީ ބުނެފައެވެ. އެއާއެކު، އަނުޝްކާގެ ގޭގައި އޮތް ކެއުމަކަށް ގާތް ރައްޓެހިންނަށް ދައުވަތު ދިންއިރު ވިރާޓަށް ވެސް ދައުވަތު ދިން ކަމަށާއި، "ހުރިހާ ކަމެއްގެ ފެށުމަކީ" އެއީ ކަމަށް އަނުޝްކާ ބުންޏެވެ. އަނުޝްކާ ވަނީ، އެ ޝޭމްޕޫ އިޝްތިހާރު ކުޅުމުގެ ފުރުސަތު ލިބުނީތީ އެކަމަށް ޝުކުރުއަދާކޮށްފައެވެ.
އަނުޝްކާއާއި ވިރާޓް ކައިވެނިކުރީ 2017 ގައެވެ. އަދި އެދެމަފިރިންނަށް ވަނީ އަންހެން ކުއްޖަކު ލިބިފައެވެ. އެކުއްޖާގެ ނަމަކީ ވަމިކާއެވެ.
