ސްޓެލްކޯ އިން ދޭ ކަރަންޓުގެ ހިދުމަތަށް އަރާފައިވާ ޖޫރިމަނާ މައާފު ކުރެވޭނެ އުސޫލެއް ހަދަމުންދާ ކަމަށް ބުނެފިއެވެ.
ސްޓެލްކޯ އިތުރަށް ހަރުދަނާ ކުރުމަށް އޮނިގަނޑަށް ގެނެސްފައިވާ ބަދަލުތަކާއި، ކުންފުންޏާއި، ކަސްޓަމަރުންގެ ކުރިއެރުމަށް ގެންގުޅުއްވާ ތަސައްވުރާއި ގުޅޭ މައުލޫމާތު ހިއްސާ ކުރެއްވުމަށް ސަންގު ޓީވީގައި ރޭ ވާހަކަ ދައްކަވަމުން ސްޓެލްކޯގެ މެނޭޖިންގ ޑިރެކްޓަރ އަހުމަދު ޝަރީފު ވިދާޅުވީ ކަރަންޓު ބިލުގެ ޖޫރިމަނާ މައާފު ކުރެވޭނެ އުސޫލެއް މިހާތަނަށް ނެތް ކަމަށާ، އެހެންކަމުން މިފަދަ އުސޫލެއްގެ މަސައްކަތް ފަށާފައިވާ ކަމަށެވެ.
މަގާމާ ހަވާލުވުމަށް ފަހު، އެ ކުންފުނީގެ ކަންކަން ދިރާސާކޮށް، ރަނގަޅުކުރަން ޖެހޭ ކަންކަމަކީ ކޮބައިތީ ބެލި ބެލުމުން ބައެއް ކަންކަން ފާހަގަވެފައިވާ ކަމަށެވެ. އަދި ސްޓެލްކޯއަކީ ހަރުދަނާ އުސޫލުތަކެއްގެ ދަށުން ހިންގަމުން އަންނަ ކުފުންޏެއް ނަމަވެސް، ކޮންމެ ކަމެއްގައިގައި ކަންކަން ރަނގަޅު ކުރެވޭނެ ޖާގަ އޮންނާނެ ކަމަށް ގަބޫލުކުރާ ކަމަށް ވިދާޅުވިއެވެ.
އެގޮތުން، ރައްޔޮތުންނާ ގުޅިފައި ހުރި ކަންކަމުގައި މީގެ ކުރިން ހަދާފައި ހުރި ބައެއް އުސޫލުތައް އެހާ ހަރުދަނާ ގޮތެއްގައި ހެދިފައި ނެތްކަން ފާހަގަ ކުރެވޭ ކަމަށް ޝަރީފް ވިދާޅުވިއެވެ. އަދި ކަރަންޓު ބިލުގެ ޖޫރިމަނާ މައާފު ކުރެވޭނެ އުސޫލެއް ގާއިމް ކުރުމަކީ ވަރަށް ގިނަ ކަސްޓަމަރުންގެ ޝަކުވާ އޮތް މައްސަލައަކަށް ވުމުން މިކަމަށް އަވަސް ހަލެއް ހޯދުމަށް މަސައްކަތްތައް ކުރެވިފައިވާކަމަށެވެ.
ޖޫރިމަނާ އަރަމުން ގޮސް ޖޫރިމަނާ ބޮޑުވެގެން ގޮސްފައި އެބަހުރި. މިހެން ގޮސް އަސްލު ބިލަށް ވުރެ ޖޫރިމަނާ އެތަށް ތަނެއް ބޮޑުވެފައި އެބަހުރި. މިސާލަކަށް ބިލް ދައްކަން ޖެހޭ މީހާގެ ބާރުގެ ދަށުގައި ނެތް ކަމެއް ދިމާވެގެން، ނޫނީ އޭނާއަށް ނޭނގޭ ކަމެއް ދިމާވެގެން ބިލްގެ ޖޫރިމަނާ އަރާނަމަ އެ ޖޫރިމަނާ މައާފު ކުރެވޭނެ އުސޫލެއް މިހަދަނީ. ޝަރީފް ވިދާޅުވިއެވެ.
މީގެ އިތުރުން ޝަރީފު ވިދާޅުވީ ކޮންމެ އަހަރެއްގެވެސް އެންމެ ބޮޑު ޝަކުވާ ކަމަަށްވާ ކަރަންޓު ބިލް ބޮޑުވުމުގެ މައްސަލަ އަށް ހައްލު ހޯދަން ވެސް މަސައްކަތް ފަށާފައިވާ ކަމަށެވެ. ސްޓެލްކޯއާއި ޝަރީފް ހަވާލުވި ފަހުން ދަނީ ކުންފުނި ހިންގެވުމުގައާއި، ކަސްޓަމަރުންނަށް ލުއި ފަސޭހަ ގޮތްތައް ގާއިމް ކުރުމަށް އިދާރީ ބޮޑެތި ބަދަލުތަކެއް ގެންވަމުންނެވެ.
