ބައެއް މީހުންނަށް ކާއެއްޗެއްސަކީ ބާރުގަދަ ބޭހެއް ކަހަލަ އެއްޗެކެވެ. އޭގެ ބާރުގަދަކަން ޓައިވާނުގައި ކޯމާއެއްގައި އޮތް ކުއްޖަކުވެސް މި ވަނީ ސާބިތުކޮށްދީފައެވެ. އޭނާއަށް އެންމެ ކަމުދާ ކާއެއްޗެހީގެ ވާހަކަދެއްކުމުން ހޭވެރިކަން ވީއެވެ.
މީޑިއާ ރިޕޯޓްތައް ބުނާގޮތުގައި، އެ ފިރިހެން ކުއްޖައަކީ 62 ދުވަސް ވަންދެން ކޯމާގައި އޮތް ކުއްޖެކެވެ. އޭނާ ކޯމާއިން ތެދުވެފައި ވަނީ އޭނާއަށް އެންމެ ކަމުދާ ޗިކަން ފިލެޓްގެ ވާހަކަދެއްކުމުންނެވެ.
މީޑިއާ ރިޕޯޓްތައް ބުނާގޮތުގައި، އުމުރުން 18 އަހަރުގެ ޗޫ ނަމަކަށް ކިޔާ ކޯމާއަކަށް ގޮސްފައި ވަނީ ސްކޫޓާ ދުއްވަނިކޮށް ހިނގާދިޔަ އެކްސިޑެންޓެއްގެ ސަބަބުންނެވެ. އެ އެކްސިޑެންޓުގައި ޗޫގެ ހަށިގަނޑަށް ވަރަށް ގެއްލުން ލިބުނެވެ. ޑޮކްޓަރުން އޭނާ ސަލާމަތް ކުރެވޭތޯ ވަރަށް މަސައްކަތްކޮށްފައި ވެއެވެ.
އޭނާއަށް ރަނގަޅުވާނެ ކަމަށް އުއްމީދުގައި އާއިލާއިން އެކި ކަހަލަ ކަންކަން ކުރިއެވެ. އެކި ވާހަކަ އޭނާ ކައިރީ ދެއްކިއެވެ. އެކަމަކު އޭނާ ހޭއަރާފައެއް ނުވެއެވެ.
ނަމަވެސް އޭނާގެ ބޭބެ ހޮސްޕިޓަލަށް އައިސް ދެއްކި ވާހަކައަކުން އޭނާގެ ހަށިގަނޑަށް ގޮތްގޮތްވިއެވެ.
"ކޮއްކޯ، އަހަރެން މި އުޅެނީ ކޮއްކޮއަށް އެންމެ މީރު ޗިކަން ފިލެޓް ކާން". އޭނާއަށް އެންމެ ކަމުދާ ކާއެއްޗެހީގެ ވާހަކަ އަޑުއަހާފައި އޭނާގެ ލޭނާރުތަކަށް އަސަރުކުރިއެވެ. އަދި އޭނާއަށް ހޭވެރިކަން އައިސް، އޭނާގެ ލޭނާރުތައް ވަރަށް ބާރަށް މަސައްކަތް ކުރަން ފެށިއެވެ. އަދި މާގިނަ އިރުތަކެއް ނުވެ، އޭނާގެ ހާލު އާއްމު ހާލަތަކަށް އައެވެ.
އޭނާ ވަނީ ފަހުން ހޮސްޕިޓަލަށް އައިސް ސްޓާފުންނަށް ޝުކުރު އަދާ ކޮށްފައެވެ.
