ޓީޗަރުންގެ މުސާރައަށް ގެނައި ހެޔޮ ބަދަލާއި ގުޅިގެން ރަނގަޅު ޓީޗަރުން މިދާއިރާގައި ހިފެހެއްޓުމަށް ބާރަކަށް ވެގެންދާނެކަމަށް އެޑިޔުކޭޝަން މިނިސްޓަރ ޑރ.އައިޝަތު އަލީ ވިދާޅުވެއްޖެއެވެ. ޓީޗަރުންގެ މުސާއަށް ގެނައި ހެޔޮބަދަލާއި ގުޅޭގޮތުން ރައީސް އޮފީހުގައި ބޭއްވި ޕްރެސްކޮންފަރެންސްގައި މިނިސްޓަރ ވިދާޅުވީ، ރައީސް އިސްނަންގަވައިގެން ވަރަށް ފަހުން ތައުލީމީ ދާއިރާގެ ދިރާސާއެއް ހައްދަވާފައިވާކަމަށެވެ. އަދިދިރާސާއިން ދައްކާގޮތުން ތައުލީމީ ދާއިރާއަށް ނިކުންނަ އައު ކުދިން ފަސްޖެހެނީ ކުރާ މަސައްކަތާއި ލިބޭ މުސާރައާއި ނުބައްދަލު ކަމުންކަމަށް މިނިސްޓަރ ވިދާޅުވިއެވެ. ނަމަވެސް ޓީޗަރުންގެ މުސާރައަށް އައި ހެޔޮ ބަދަލާއެކު ރަނގަޅު ކުދިން މިދާއިރާއަށް ގުޅޭނެކަމަށާއި އަދި މިހާރު ތިބި ރަނގަޅު މުދައްރިސުންވެސް އެހެން ވަޒީފާތަކަށް ނުދާނެކަމަށް އުންމީދުކުރާކަމަށް އެޑިޔުކޭޝަން މިނިސްޓަރ ވިދާޅުވިއެވެ.
މިހާރުވެސް ދެވޭ އުޖޫރައަކީ ރެސްޕޯންސިބިލިޓީއާއި ނުބައްދަލު އުޖޫރައެއް އަޅުގަނޑުމެން ދެމުންމިދަނީ. އެހެންވީމަ އަޅުގަނޑުމެން މި މަސައްކަތް ކުރަނީ އެ ކުރާ މަސައްކަތުގެ ހައްޤު އަގު ދެވޭތޯ. އެހެންވީމަ މިހާރު މިއައި ހެޔޮ ބަދަލާއި އެއްކޮށް ރަނގަޅު އެއްޗެއް މުދަރިއްސުންނަށް އަބުރުވެރިކަމާއިއެކު ދިރިއުޅޭވޭނެ ވަރުގެ އެއްޗެއް ލިބިގެންދާނެ
– ޑރ.އާއިޝަތު ޢަލީ
ޓީޗަރުންގެ މުސާރައަށް ގެނައި މި ބަދަލާއެކީ ޓީޗަރުންގެ މުސާރަތައް 56 ޕަސެންޓު ބޮޑުވާނެއެވެ. އަދި މި ބަދަލާއެކު ރޭންކް 1 ގެ ޕްރިންސިޕަލުންނަށް 82 އިންސައްތަ އަދި ރޭންކް 2ގެ ޕްރިންސިޕަލުންނަށް 59 އިންސައްތައިގެ މުސާރައިގެ ކުރިއެރުމެއް އަންނާނެއެވެ.
ޓީޗަރުންގެ މުސާރަ ބޮޑުކުރެއްވިކަން އިއުލާންކުރެއްވުމަށް މިއަދު ޤައުމާއި މުޚާތަބްކުރައްވާ ރައީސް ވިދާޅުވީ، ތަޢުލީމީ ދާއިރާގެ އިތުރުން އެހެން ދާއިރާތަކުގެ މުސާރައިގެ ފަރަގު އެއްހަމަ ކުރުމަށް މަސައްކަތްކުރައްވާކަމަށް ވިދާޅުވިއެވެ. އެގޮތުން ސަރުކާރުން މިހާރު ފަށާފައިވާ ޕޭ ހާމަނައިޒޭޝަންގެ މަސައްކަތްތަކުގެ ތެރެއިން، ޞިއްޙީ ދާއިރާގެ މުސާރައިގެ އޮނިގަނޑަށް ގެންނަންޖެހޭ ބަދަލުތައް މިހާރު ދިރާސާކުރަމުން އަންނަކަމަށް އެމަނިކުފާނު ވިދާޅުވިއެވެ. މުވައްޒަފުން ކުރާ މަސައްކަތާ އެކަށޭނަ މިންވަރަށް އުޖޫރަ ކަނޑައެޅުމަށް، އަދި އުޖޫރައިގެ ތަފާތުތައް ނައްތައިލުމަށް ފަށާފައިވާ މަސައްކަތް ނިމޭއިރު، ހުރިހާ ދާއިރާއެއްގެ މުސާރަތަކަށްވެސް، ހެޔޮ ބަދަލުތަކެއް އަންނާނެކަމުގެ ޔަޤީންކަން ރައީސް ދެއްވިއެވެ.
