ބޮލީވުޑްގެ ކުޅަދާނަ ތަރި ކަންގަނާ ރަނާވަތު ތަފާތު 7 "ލުކް" އެއްގައި ފެނިގެންދާ އުންމީދީ ފިލްމު "ދާކަޑް" ގެ ޓްރެއިލާ ދައްކާލައިފިއެވެ.
މީގެ ކުރިން ކަންގަނާ ފެންނަ ގޮތުގެ ޓީޒާ ކޮޅެއް ދައްކާލައި ބެލުންތެރިން ފިލްމަށް ކުރަމުންދާ އިންތިޒާރު ވަނީ އިތުރަށް ބޮޑުކޮށްފައެވެ.
ރަޒްނީޝް ގާއީ ޑައިރެކްޓްކޮށްފައިވާ "ދާކަޑް" އަކީ އެކްޝަން ތުރިލާއެކެވެ. އެ ފިލްމުގައި ކަންގަނާ ފެންނާނީ ސްޕައި އޭޖެންޓް އަގްނީގެ ރޯލުންނެވެ.
ކަންގަނާ ބުނެފައިވާ ގޮތަށް "ދާކަޑް" ވާނީ ބޮލީވުޑްގެ ފިލްމަކުން މިހާތަނަށް ބަތަލާއެއްގެ އެންމެ ވަރުގަދަ އެކްޝަން މަންޒަރުތައް ފެންނާނެ ފިލްމަށެވެ.
ކަންގަނާ އާއެކު މި ފިލްމުގެ މުހިންމު ރޯލުތަކުން އަރުޖުން ރާމްޕަލް، ދިވްޔާ ދައްތާ، ޝާރިބް ހާޝްމީ އަދި ސަސްވަތާ ޗައްޓާޖީ ވެސް ފެނިގެން ދާނެއެވެ.
ދީޕަކް މުކުތު އަދި ސޮހޭލް މަކްލައި ޕްރޮޑިއުސް ކޮށްފައިވާ މި ފިލްމު ރިލީޒްކުރާނީ އަންނަ މަހު 20 ގައެވެ.
