ބޮލީވުޑް ލީޑް ކުރަނީ ޚާނުން ކަމަށް ގިނަ ބަޔަކު ގަބޫލު ކުރެއެވެ. އޭގެތެރޭގައި ޝާހުރުކް ޚާން، ސަލްމާން ޚާން އަދި އާމިރު ޚާނަކީ މިވަގުތު ބޮލީވުޑްގެ އެންމެ ނުފޫޒު ގަދަ ޚާނުން ކަމަށް ވެއެވެ.

ޚާނުންގެ ލިސްޓަށް އިތުރުވާ 4 ވަނަ ޚާނަކީ އެކްޓަރ ސައިފް އަލީ ޚާނެވެ. ނަމަވެސް ސައިފް ބުނި ގޮތުގައި ޚާނުންގެ ތެރެއިން ބޮލީވުޑްގައި އެންމެ ނާކާމިޔާބު ޚާނަކީ އޭނާއެވެ.

"ފިލްމު ކޮމްޕޭނިއަން" އާއި ވާހަކަ ދައްކަމުން 51 އަހަރުގެ އެކްޓަރ ބުނީ، ދެން ތިބި 3 ޚާނުންނަކީ އެމީހުންގެ ފިލްމީ ކެރިއަރުގައި ވަރަށް ކާމިޔާބު ބައެއް ކަމަށް މީހުން ބުނާ ވާހަކައަށް ތާއީދުކުރާ ކަމަށެވެ.

ސައިފް ބުނީ އެ ތިން މީހުންނަކީ އުފެދުމުގައި ވެސް އެކްޓިންގެ ހުނަރު ލިބިފައިވާ ތިން ފަންނާނުން ކަމަށެވެ. އަދި އޭގެތެރެއިން ދެމީހުންނަކީ ކުޑައިރުންސުރެ އެކްޓަރަކަށް ވުމުގެ ހުވަފެންތައް ދެކެމުން އައި ދެމީހުންކަން އެނގޭ ކަމަށް ސައިފް ބުންޏެވެ.

"ސަލްމާންގެ ގޮތެއް ނޭނގޭ، އެކަމަކު ޝާހްރުކާއި އާމިރަކީ އެންމެ ކުޑައިރުންސުރެ އެ އަޒުމުގައި ތިބި ދެމީހުން" ސައިފް ބުނެފައިވެއެވެ.

ސައިފް ބުނީ އޭނާ ބޮލީވުޑަށް ނުކުތް ދުވަސްވަރު އޮންނަ ގޮތަކީ، ސުޕަރސްޓާރަކަށް ވުން ނުވަތަ އެއްވެސް ކާމިޔާބީއެއް ނުލިބި ދާއިރާ ދޫކޮށްދާން ޖެހޭ ކަހަލަ ގޮތަކަށް ކަމަށެވެ.

"އޭރު ނޯވެ ތަފާތު ކެރެކްޓާތައް ކުޅުމެއް ވެސް. އެކަން އައީ މާ ފަހުން" – ސައިފް

ސައިފް ފިލްމީ ދާއިރާއަށް ނުކުތް ދުވަސްވަރު އޭނާގެ ކެރިއަރ ކުރިއެރުވުމަށް އެންމެ ބޮޑު އެހީއެއް ލިބުނީ އަކްޝޭ ކުމާރުގެ ފަރާތުން ކަމަށް ސައިފް ބުނެއެވެ.

"އެދުވަސްވަރު އަކްޝޭއާ އެކީ ވަރަށް ގިނަ ފިލްމު ކުޅެވިފަ ހުންނާނެ. އެ ފިލްމުތަކުގަ އަހަންނަކީ ކިއުޓް އަދި މަޖާ މީހެއް ގޮތަށް ބެލުންތެރިންނަށް ފެނުނީ. އެކަމަކު އަކްޝޭގެ ހުންނަނީ މުޅިން އެހެން ސިފަތަކެއް. އެހެންވީމަ އަހަރެމެން ދެމީހުން އެކަކު އަނެކަކު ފުރިހަމަ ކޮށްދިނީ". ސައިފް ބުނެފައިވެއެވެ.

އެހެންނަމަވެސް ސައިފް ބުނީ، ދެން ތިބި ޚާނުންގެ ކެރިއަރުގައި އެފަދައިން ދެވަނަ މީހެއްގެ އެހީ ބޭނުންނުވާ ކަމަށެވެ. އޭގެ ބަދަލުގައި އެމީހުންގެ ކިބައިގާ ހުރިހާ ސިފަތަކެއް މާކުރިންވެސް ހުރި ކަމަށް ބުންޏެވެ.

ނަމަވެސް ދިރިއުޅުމުގައި ސައިފްއަކީ ނާކާމިޔާބު މީހެއް ކަމަށް ބުނެވެން ނެތް ކަމަށް ވެސް އޭނާ ގަބޫލު ކުރެއެވެ. ބޮލީވުޑްގެ އެންމެ އުހުގައި ވިދާ ބަބުޅަމުން ދާ ތަރި ކަރީނާ ކަޕޫރާ ކައިވެނިކޮށްގެން އުޅޭ ސައިފް އަލީ ޚާނަށް ވަނި މިހާރު ދެ ކުދިންވެސް ލިބިފައެވެ. މީގެ އިތުރުން ސައިފްގެ ފުރަތަމަ ކައިވެނި އަމްރިތާ ސިންގަށް ވެސް އަންހެން ކުއްޖަކާ ފިރިހެން ކުއްޖެއް ވަނީ ލިބިފައިއެވެ.

މިހާރު ޒުވާން އުމުރު ގުނަމުން އަންނަ ސާރާ އަލީ ޚާނަކީ ބޮލީވުޑް ތަރިއެކެވެ. އަދި އިބްރާހިމް އަލީ ޚާންވެސް ވަރަށް ވަހަށް ދާއިރާ އާއި ގުޅޭނެ ކަމަށް އަޑުތަށް ދޭތެރެ ދޭތެރެއިން ވަރަށް ގަދަވެއެވެ. އެހެން ކަމުން އޭނާ ގަބޫލު ކުރާ ގޮތުގައި އޭނާ އަކީ ކެރިއަރުގައި މާކާމިޔާބު ނޫނަސް ދިރިއުޅުމުގައި ކާމިޔާބު މީހެކެވެ.